Chapter 5 (Part 7)
Organized to Do Jehovah’s Will, page 45-49
Olketa Overseer for Shepherdim Olketa Sheepsheep
TAON OVERSEER
Branch office bae appointim wanfala brata for serve olsem taon overseer long taon wea garem winim wanfala kongregeson. Plande taem circuit overseer or olketa circuit overseer sapos tufala serve long taon, recommendim brata wea fit for duim diswan. Taon overseer no lukaftarem eni nara kongregeson bat kongregeson nomoa wea hem serve olsem elder. Branch office maet raet long hem abaotem samfala difren samting, olsem olketa arrangement saed long olketa assembly and olketa skul wea maet kamap long taon wea hem serve. Bat branch office bae raet long evri kongregeson abaotem literature, field service report for each month, and samfala nara samting.
CIRCUIT OVERSEER
Governing Body appointim olketa elder wea fit for serve olsem olketa circuit overseer. Branch office markem olketa for visitim olketa kongregeson wea insaed circuit bilong olketa maet tufala taem insaed long year. Olketa tu visitim olketa pioneer, spesol pioneer, and olketa missionary wea serve long olketa farawe ples. Olketa circuit overseer mekem schedule for visitim each kongregeson and sendem leta long olketa kongregeson firstaem, mekem olketa kasem gud samting from datfala visit.
Presiding overseer bae arrangem olketa samting mekem visit bilong circuit overseer strongim evriwan long spiritual wei. (Rom. 1:11, 12) Bihaen presiding overseer kasem leta abaotem visit and information abaotem olketa need bilong circuit overseer and waef bilong hem (sapos hem marit), hem bae story witim olketa nara brata for redyim literature, ples for stap, and olketa nara important samting. Hem bae mek sure evriwan, and circuit overseer tu, savve long olketa arrangement hia.
Circuit overseer bae story witim presiding overseer abaotem taem bilong olketa meeting and taem bilong olketa meeting for preaching waka. Olketa bae arrangem olketa samting hia followim taem wea fitim datfala ples, idea bilong circuit overseer, and tu, instruction wea stap insaed long Kingdom Ministry Bilong Iumi and olketa leta from branch office. Evriwan long kongregeson need for savve firstaem taem bilong olketa kongregeson meeting, meeting for olketa pioneer, meeting for olketa elder and ministerial servant, and tu, ples and taem wea olketa markem for preaching waka. Diswan bae helpem evriwan for mekem plan for join insaed olketa samting wea bae kamap long datfala week.
From circuit overseer bae chekim olketa kongregeson record long Tuesday aftanun, olketa record hia mas stret and redi bifor circuit overseer hem arrive. Presiding overseer bae mek sure olketa record stap long ples wea circuit overseer bae chekim. Hem gud sapos wanfala long Kongregeson Service Komiti stap for helpem circuit overseer sapos hem needim. Circuit overseer bae lukluk long olketa Congregation’s Publisher Record card, record bilong meeting attendance, record bilong territory, and accounts. Diswan bae helpem hem luksavve long need bilong kongregeson and wei wea hem savve helpem olketa brata wea lukaftarem olketa record hia.
Taem circuit overseer visitim kongregeson, hem bae trae for story witim olketa difren brata and sista long olketa meeting, taem hem duim preaching waka, taem hem kaikai witim olketa, and long olketa narataem. And tu, hem bae garem meeting witim olketa elder and ministerial servant for givim samfala kaonsel from Bible, olketa idea, and encouragement wea bae helpem olketa for duim responsibility bilong olketa for servem and lukaftarem olketa sheepsheep. (Prov. 27:23; Acts 20:26-32; 1 Tim. 4:11-16) Hem bae garem meeting tu witim olketa pioneer for encouragem olketa long waka wea olketa duim and helpem olketa long eni problem wea olketa garem long ministry bilong olketa.
Sapos olketa nara problem kamap taem circuit overseer visitim kongregeson, hem bae deal witim datwan or helpem olketa elder for stretem problem. Hem bae traem best for helpem olketa elder or brata or sista faendem information from Bible wea bae help stretem datfala problem. Sapos samwan or samfala insaed kongregeson duim bigfala rong and olketa elder needim help bilong circuit overseer, hem bae markem taem for helpem olketa. Sapos branch office need for duim samfala samting for stretem disfala problem, then circuit overseer and olketa elder bae raetem evri samting long report and sendem go long branch.
Taem Circuit overseer visitim kongregeson, bae hem attendim evri meeting bilong datfala kongregeson. Maet samfala taem olketa changem taem bilong olketa meeting fitim instruction wea stap insaed long Kingdom Ministry Bilong Iumi or olketa leta from branch office. Hem bae givim olketa tok for encouragem, muvim, and strongim olketa insaed long kongregeson, and tu, givim samfala instruction long olketa. Hem bae trae hard for helpem evriwan for lovem and tinghae long Jehovah, Jesus Christ, and organization. Circuit overseer bae encouragem olketa tu for strong for duim preaching waka, and talem samfala idea long hao for duim preaching waka long gudfala wei.
Wanfala main samting wea circuit overseer duim taem hem visitim kongregeson hem for lead long preaching waka. Maet plande insaed long kongregeson savve changem schedule bilong olketa mekem olketa savve sapotim evri arrangement for duim preaching waka for datfala week. Maet samfala plan for auxiliary pioneer long month wea hem visitim kongregeson. Olketa wea laek for waka witim hem or waef bilong hem long ministry savve arrangem diswan witim presiding overseer. Iu savve kasem gud samting taem iu tekem circuit overseer or waef bilong hem witim iu long olketa Bible study and return visit. For duim diswan, maet iu need for changem taem wea iu duim olketa Bible study or return visit, bat bae iu kasem gudfala samting from diswan. Circuit overseer bae trae for start early long preaching waka evri day sapos diswan fitim ples wea hem stap. Circuit overseer barava tinghae long wei wea iu sapotim evri arrangement for datfala week.—Prov. 27:17.
Evri circuit garem wanfala circuit assembly and spesol assembly day evri year. Circuit overseer garem responsibility for organizem olketa assembly hia. Hem savve recommendim olketa brata for lukaftarem olketa assembly and branch office bae appointim olketa for duim waka evritaem long assembly olsem assembly overseer, and assistant assembly overseer. Olketa waka witim circuit overseer for lukaftarem olketa arrangement for assembly. Diswan bae mekem circuit overseer savve duim main waka bilong hem for lukaftarem assembly program. Circuit overseer markem olketa nara brata wea fit, for lukaftarem olketa nara department. Hem bae arrangem tu for samfala brata duim audit for circuit accounts bihaen long evri assembly.
Circuit overseer givim field service report bilong hem long branch office long end bilong evri month. Hem kasem bak selen tu from branch office for samfala samting hem mas peim for duim waka bilong hem, olsem pasis, kaikai, ples for stap, and olketa nara samting sapos olketa kongregeson no givim selen long hem for olketa samting hia. Olketa traveling overseer trustim promis bilong Jesus hao olketa bae kasem evri samting wea olketa needim sapos olketa gohed for aftarem Kingdom bilong Jehovah firstaem. (Luke 12:31) Olketa kongregeson shud tingim hao hem privilege for showimaot kaenfala fasin long olketa elder hia wea lukaftarem olketa.—3 John 5-8.