Offerim Olketa Magasin wea Witness Abaotem Truth
1. Wanem nao main waka bilong Wastaoa and Awake! magasin?
1 Wastaoa wea Talemaot Kingdom Bilong Jehovah and Awake! magasin hem main samting wea iumi iusim for preach abaotem Kingdom and mekem pipol kamap disaepol. (Matt. 24:14; 28:19, 20) Iumi kasem hapi from wei for evritaem offerim tufala magasin hia taem iumi share long olketa difren part long Kingdom waka.
2. Olketa wanem change nao kamap long Wastaoa and Awake! magasin, and why nao olsem?
2 Insaed long olketa year wea go pas, iumi lukim olketa magasin change long size and samting wea insaed long olketa, and tu, olketa wei wea iumi iusim for givimaot hem change. Main reason for olketa change hia hem for mekem olketa magasin for barava interesting and muvim man, mekem Kingdom message hem kasem heart bilong ‘evri difren kaen man for mekem olketa mas sev and kasem stretfala savve abaotem truth.’—1 Tim. 2:4.
3. Long wanem wei nao bae iumi iusim olketa magasin long ministry?
3 Start kam long January 2006, iumi lane finis hao for iusim olketa difren kaen wei for storyim Awake! magasin long pipol. Distaem bae iumi iusim semkaen wei for offerim wanfala long tufala Wastaoa wea Talemaot Kingdom Bilong Jehovah wea kam evri month long ministry bilong iumi. Olketa idea long wanem for talem abaotem each magasin hem stap long last page bilong Kingdom Ministry Bilong Iumi. Evritaem olketa idea hia hem storyim olketa firstfala article insaed long magasin, bat samfala taem hem olketa nara article wea plande pipol interest tumas long hem. Iu savve iusim olketa idea hia for barava helpem pipol taem iu savve gud long olketa article insaed magasin and changem wei wea iu story for fitim pipol long territory bilong iumi.
4. Why nao maet hem gud for iusim olketa difren story wea no stap long Kingdom Ministry Bilong Iumi?
4 Nomata Kingdom Ministry Bilong Iumi hem garem tufala idea for offerim each magasin, iu savve iusim eni difren idea wea iu laek for iusim. Wanfala reason for duim olsem maet from wanfala long olketa nara article hem fitim plande difren kaen pipol long territory bilong iu. Or maet iu laek for offerim long gudfala wei wanfala article wea iu barava interest tumas long hem.
5. Bifor iu redyim story for datfala magasin, wanem nao iu mas duim?
5 Hao for Redyim Story Bilong Iu: First samting, iu mas savve gud long article wea iu chus for storyim. Maet samfala taem iu no savve gud long evri article insaed magasin bifor iu start for iusim long field ministry. Bat iu mas talemaot olketa article wea iu chus for storyim witim strong wea barava muvim man. Iu savve duim olsem taem iu savve long information wea iu storyim.
6. Hao nao iumi savve redyim story bilong iumiseleva?
6 Mek-tu samting, iusim gudfala tingting taem iu redyim firstfala toktok bilong iu. Maet iu savve iusim wanfala interesting kwestin wea savve muvim man wea join long article for startim story. Depend evritaem long paoa wea Word bilong God garem for kasem heart. (Heb. 4:12) Chusim scripture wea fitim wea join long datfala subject wea iu storyim, bat hem moabeta for iusim scripture wea stap long article wea iu story abaotem. Ting raonem hao for joinim datfala scripture witim datfala article.
7. Hao nao iumi savve mekem story bilong iumi for kamap moabeta?
7 Long Evri Chance: For story bilong iu hem gud wan, iu mas iusim nao. Share witim kongregeson long magasin witnessing long Saturday. Offerim olketa magasin long pipol wea acceptim finis olketa nara literature. Offerim evritaem olketa magasin long olketa Bible study and long difren pipol wea maet stap long ples wea iumi duim return visit. Maet iu savve leavim olketa magasin witim pipol wea iu story witim taem iu go long stoa, taem iu travel, or long taem wea iu weit long clinic. Kamap moabeta long story bilong iu taem iu iusim datwan insaed long full month.
8. Long olketa wanem wei nao Wastaoa and Awake! magasin olketa spesol?
8 Olketa Wastaoa and Awake! magasin olketa spesol. Olketa hia mekhae long Jehovah olsem Ruler bilong universe. (Acts 4:24) Olketa hia comfortim olketa pipol witim gud nius abaotem Kingdom bilong God and strongim faith long Jesus Christ. (Matt. 24:14; Acts 10:43) And tu, olketa hia lukluk long evri samting long world wea fulfillim Bible profesi. (Matt. 25:13) Helpem nara pipol long territory bilong iu for kasem gud samting long evri chance wea iu redi for offerim olketa magasin hia!
9. Wanem nao iumi savve duim for mekem wei for duim wanfala return visit?
9 Bihaen iu offerim magasin, or nomata iu just storyim spiritual samting witim samwan, iu mas redyim wanfala kwestin or talem toktok wea mekem man tingting wea maet mekem wei for wanfala return visit and narafala wei for story abaotem spiritual samting. Sapos iumi strong for plantim olketa seed abaotem truth, iumi savve sure hao Jehovah bae muvim heart bilong olketa wea barava laek for savve long Hem and for servem Hem.—1 Cor. 3:6.