Announcement

◼ Literature for January: Eni 192-page buk wea olketa printim bifor 1991. Sapos kongregeson no garem olketa buk hia, iusim Gohed for Luk Aot! brochure. February: Secret for Kasem Hapi Famili. March: Wanem Nao Really Samting wea Bible Teachim? Traem best for startim olketa Bible study. April: Olketa Wastaoa and Awake! magasin.

◼ From March garem faevfala Saturday and faevfala Sunday, hem gudfala month for auxiliary pioneer.

◼ Start long February, and no winim March 2, bae niu pablik tok for olketa circuit overseer nao hem “Wea Nao Iu Savve Kasem Help Taem Iu Kasem Trabol?”

◼ Olketa kongregeson shud mekem olketa arrangement for celebratem Memorial for disfala year long Saturday, March 22, bihaen sun go daon. Tok savve start bifor sun go daon, bat wei for pasim raon bred and wine mas start bihaen sun go daon. Lisin long radio sapos iu laek savve wanem taem nao sun bae go daon long ples wea iu stap. Each kongregeson shud trae for garem Memorial celebration bilong olketa seleva. Bat maet samfala taem hem hard for duim olsem. Taem tu-thri kongregeson iusim sem Kingdom Hall, maet wanfala or samfala long olketa kongregeson hia savve iusim narafala ples for celebratem Memorial. Sapos winim wanfala kongregeson garem Memorial long wanfala Kingdom Hall, markem 40 minute or winim datwan midolwan long olketa Memorial hia mekem evriwan savve kasem gudfala samting from wei for story tugeta bihaen long Memorial. Mas tingim ples for olketa trak stap, and wei for lusim olketa passenger and pikimap olketa. Body of elders long each kongregeson shud disaedem wanem arrangement nao bae hem fitim kongregeson bilong olketa.

◼ Olketa secretary bilong kongregeson shud faendaot sapos olketa garem wanfala pioneer appointment leta (S-202-SP) for each regular pioneer long kongregeson. Sapos olketa no garem, olketa savve raet go long branch office abaotem diswan.