Kwestin Box

◼ Wanem nao tufala buk for iumi iusim long olketa Bible study bilong iumi?

Main buk for iumi iusim for startim and duim olketa Bible study hem Wanem Bible Teachim buk. Hem gud tu for iu iusim eni nara buk or wanfala tract wea fitim for faendem wanfala Bible study, bat kwiktaem start for studyim Wanem Bible Teachim buk. Staka gudfala samting savve kamaot taem iumi iusim Wanem Bible Teachim buk for startim olketa study.

Taem iutufala studyim finis Wanem Bible Teachim buk and datfala Bible study hem muv ahed, start for studyim Worshipim God buk. (Col. 2:7) Page 2 hem explainim main goal bilong datfala buk: “Bible encouragem evriwan wea lovem God for ‘minim gud . . . [datfala] hae and deep samting’ bilong olketa spesol truth bilong hem. (Ephesians 3:​18) Mifala redyim disfala buk for duim datwan. Mifala hope diswan bae helpem iu for grow long spiritual wei and for wakabaot long smol road wea lead long laef insaed raeteous niu world bilong God.”

Sapos datfala Bible study hem fit for baptaes bat hem no finisim yet tufala buk hia, datfala study shud gohed bihaen hem baptaes go kasem taem wea mek-tu buk hem finis. Nomata study bilong iu hem baptaes finis, iu savve reportim olketa hour, olketa return visit, and wanfala Bible study. Pablisa wea go witim iu and join insaed long datfala study savve reportim olketa hour tu.