“Redi for Evri Gudfala Waka”
1 Taem Jesus sendem olketa disaepol for preach, hem redyim olketa gud firstaem. (Matt. 10:5-14) Nomata iumi no garem staka taem, sapos iumi iusim tu-thri minute for redi bifor iumi go long preaching, datwan bae helpem iumi for kasem gudfala samting.—2 Cor. 9:6.
2 Hao for Redi: For redi gud iumi mas savve gud long buk wea iumi bae givimaot. Iumi mas tingim pipol long ples wea iumi preach tu. Wanem nao olketa warim? Wanem teaching bilong church nao pipol bilivim? Iumi savve lukim samfala idea wea stap long Kingdom Ministry Bilong Iumi and Reasoning From the Scriptures.
3 Wei for lukluk gud long olketa demonstration wea kamap long Service Meeting bae helpem iumi tu. Taem iumi savve gud hao for givimaot wanfala buk, bae hem isi nomoa for redi. Bat for kamap gudfala moa long story bilong iumi, hem gud for tingim wanem iumi bae storyim bifor iumi go long preaching evritaem. And tu, olketa buk wea iumi laek for storyim mas stap long basket.
4 Hao nao iumi savve tingim moa wanem iumi laek for talem? For iumi redi gud iumi mas readim big firstaem. Samfala savve duim datwan long famili study. Samfala raetem long wanfala smol pepa wanem olketa laek storyim and lukluk long datwan bifor olketa storyim long pipol.
5 Hao Hem Helpem Iumi: Wei for redi gud savve mekem iumi hapi and for kamap gudfala moa long preaching waka. Datwan mekem iumi no fraet tumas for preach long pipol. Iumi savve herehere gud long man wea iumi story witim and no tingim nomoa wanem iumi laek for storyim. And tu, wei for savve gud long buk wea iumi storyim bae helpem iumi for givimaot datfala buk.
6 Bible talem iumi for “redi for evri gudfala waka.” (Titus 3:1) No eni nara waka hem gud winim waka for preachim gud nius. Taem iumi redi gud, datwan showimaot iumi respectim man wea iumi story witim and God bilong iumi Jehovah.—Isa. 43:10.