Iu Savve Kasem Bigfala Blessing!
1. Why nao hem gud for ting raonem regular pioneer waka?
1 Waswe, iu laek for barava hapi? Waswe, taem iu helpem olketa narawan iu savve hapi? Waswe, iu laek for duim samfala waka moa for Jehovah? Sapos ansa bilong iu hem ia long eni kwestin hia, hem gud for iu ting raonem regular pioneer waka. Hem tru, iu mas tingim waka long famili and evri narafala waka wea Bible talem, and tu iu mas tingim sapos iu strong for regular pioneer or nomoa.
2. Storyim samfala spiritual blessing wea olketa regular pioneer kasem.
2 Toktok wea Solomon raetem long Bible storyim hao Jehovah savve givim olketa material blessing. (Prov. 10:22) Distaem, Jehovah savve givim olketa spiritual blessing. Olketa regular pioneer kasem staka spiritual blessing. Olketa barava hapi bikos olketa ‘baem bak taem’ from samting wea olketa seleva laek duim for helpem olketa narawan. (Col. 4:5; Acts 20:35) Jehovah tinghae long love wea olketa showimaot. Diskaen “wei for fren witim God and waka hard for duim datwan” bae gohed for olowe. (Matt. 6:20; Heb. 6:10) So taem olketa pioneer ‘lukluk nomoa long wanfala samting’ and trustim Jehovah for givim wanem olketa needim, olketa fren gudfala moa witim hem.—Matt. 6:22, 25, 32; Heb. 13:5, 6.
3. Hao nao wei for aftarem spiritual blessing hem difren from wei for aftarem material samting?
3 Wei for aftarem material samting savve mekem man “barava laekem olketa krangge samting wea nogud.” (1 Tim. 6:9, 10; Jas. 5:1-3) Blessing wea Jehovah givim no savve olsem. From olketa regular pioneer duim bigfala preaching waka, olketa savve gohed gud long spiritual wei and tingting strong long samting wea important. (Phil. 1:10) Wanfala brata finis from big waka bilong hem for kamap pioneer. Hem talem olsem: “Waka wea mi duim bifor hem kamap wanfala hevi. Pioneer waka hem no olsem. Distaem mi helpem pipol for lanem truth. Datwan barava winim waka wea mi duim bifor.”
4. Wanem blessing nao olketa regular pioneer kasem taem olketa helpem pipol?
4 Pipol Savve Kasem Blessing: Distaem, pipol kasem ‘olketa nogud samting wea mekem laef hard.’ (2 Tim. 3:1) Gud nius nao bae barava helpem pipol olsem. Olketa wea talemaot gud nius bilong Kingdom barava hapi for lukim pipol wea herem gud nius olketa hapi. Olketa regular pioneer barava hapi bikos evri year olketa iusim winim 800 hour for helpem pipol!—1 Tim. 4:16.
5, 6. Wanem nao bae helpem iu for regular pioneer?
5 Waswe, iu tingting strong for regular pioneer? Iu mas “baem bak taem” from samting wea no important tumas. (Eph. 5:15, 16) Staka brata and sista duim datwan and no iusim tumas taem for waka for selen wea datwan minim olketa savve iusim moa taem long Kingdom waka. Waswe, iu savve duim samfala samting mekem iu pioneer witim olketa?
6 Askem Jehovah for bigfala savve mekem iu iusim gud taem bilong iu. (Jas. 1:5) Wanem blessing nao bae iu kasem? Staka spiritual blessing! Jehovah bae givim iu olketa material blessing tu. (Matt. 6:33) Jehovah bae blessim olketa regular pioneer ‘go kasem taem olketa no laekem eni samting moa.’—Mal. 3:10.