Kwestin Box

◼ Waswe, hem fitim kongregeson for klapem hand bihaen evri part long Theocratic Ministry Skul and Service Meeting?

Bihaen Jehovah wakem disfala earth, “olketa morning star hapi and singaot tugeta, and evri son bilong God start for singaot for givim praise.” (Job 38:7) Olketa angel laek for praisem Jehovah God for evri nambawan samting wea hem wakem, wea datwan hem showimaot bigfala savve, gudfala wei, and paoa bilong hem.

Hem gud for iumi showimaot iumi tinghae long hard waka bilong olketa brata or sista wea givim tok. Long olketa assembly and convention, iumi savve klapem hand bihaen long olketa tok, demonstration, and interview. Bigfala waka nao olketa duim for redyim gud part bilong olketa. Wei for klapem hand showimaot iumi tinghae long hard waka bilong man wea givim tok and gudfala toktok wea Jehovah givim iumi long Bible and from organization bilong hem.​—Isa. 48:17; Matt. 24:45-​47.

Waswe for klapem hand bihaen evri part long Theocratic Ministry Skul and Service Meeting? Hem no tambu for iumi klapem hand enitaem iumi hapi, olsem bihaen student duim firstfala tok bilong hem. Bat wei for klapem hand savve kamap samting iumi duim nating nomoa. Dastawe klosap evritaem, iumi no klapem hand bihaen long evri part long Theocratic Ministry Skul and Service Meeting.

Nomata iumi no klapem hand long evri part long Theocratic Ministry Skul and Service Meeting, iumi savve showimaot iumi tinghae long olketa tok and hard waka olketa duim. Iumi savve duim olsem taem iumi sidaon kwaet and herehere gud long man wea givim tok. Bihaen long meeting, iumi savve go and talem long man wea givim tok hao iumi tinghae long hard waka bilong hem.​—Eph. 1:​15, 16.