CHAPTER 7 (Part 2)

Organized to Do Jehovah’s Will, page 64-72

Olketa Meeting for “Showimaot Love and Duim Gudfala Waka”

SERVICE MEETING

Service Meeting hem mekhae long preaching waka. Datfala meeting redyim gud iumi for preachim gud nius abaotem Kingdom, and for mekem disaepol and for talemaot hao day bilong God for judgem pipol hem klosap. (Matt. 28:20; Mark 13:10; 2 Pet. 3:7) For duim disfala waka, iumi story long man wanwan and givimaot olketa Bible buk. And wei wea iumi showimaot iumi obeyim olketa samting wea Jehovah talem bae helpem iumi for kamap gudfala moa for duim disfala preaching waka. (Matt. 13:23; John 15:8) From diswan, pipol bae lukim gudfala samting wea iumi kasem from iumi obeyim wanem Bible talem. Service Meeting helpem iumi long evri waka wea iumi duim for God.

Kingdom Ministry Bilong Iumi for evri month hem storyim samting for duim long Service Meeting evri week. Iu savve tekem wanfala Kingdom Ministry long kongregeson bilong iu. Taem presiding overseer kasem niu Kingdom Ministry, hem bae readim and ting raonem olketa difren part and markem olketa brata wea fit for duim olketa part hia long olketa meeting. Hem savve askem nara elder for duim disfala waka for hem.

Olketa elder and samfala ministerial servant wea fit savve duim olketa difren part long Service Meeting. Olketa mas storyim nomoa samting wea stap long Kingdom Ministry and no storyim eni nara samting moa. For duim datwan olketa mas studyim gud part wea olketa kasem for luksavve long olketa main point for storyim, and hao for talem long wei wea olketa brata bae minim and no forgetim. Olketa mas ting raonem gud hao for givim datfala part long wei wea bae helpem kongregeson.

Staka gudfala difren wei stap for duim wanfala part, bat iumi mas no duim long wei wea ova tumas wea bae spoelem wanem iumi bae storyim. Olketa demonstration tu mas no ova tumas. Duim demonstration long hao iu savve story witim pipol long ples wea iu waka, long haos tu haos, long Bible study or long famili. Olketa demonstration mas showimaot olketa samting wea olketa pablisa minim.

Iu savve askem wanfala gud pablisa wea baptaes finis and olketa smol pikinini bilong hem wea hem lanem gud for duim samfala samting, olsem demonstration long part bilong iu. Iu savve story witim olketa and askem kwestin abaotem samfala samting wea happen long olketa. Sapos iu nao bae duim part olsem, ting long datwan olsem worship bilong iu long Jehovah and barava duim gud datfala part.

Evri Christian mas showimaot wei wea bae helpem olketa narawan for followim Jesus Christ and kamap Witness wea dedicate long Jehovah. For duim datwan, Service Meeting helpem iumi for: (1) strong for duim preaching waka and for kamap gud long wei for talemaot gud nius long haos tu haos, long street, or long eni ples wea iumi savve story long pipol; (2) savve hao for duim return visit long pipol wea story gud witim iumi and pipol wea tekem olketa Bible buk; (3) markem taem for duim olketa Bible study evri week and helpem olketa Bible study for savve long organization bilong Jehovah; (4) mekem iumi savve hao for duim enitaem witnessing; (5) showim iumi hao for helpem olketa niu wan, pikinini bilong iumi, and olketa nara young wan for baptaes.

For kasem gud samting from Service Meeting, iumi mas studyim gud Kingdom Ministry firstaem. Samfala taem, olketa part long Service Meeting iusim samfala buk bilong Olketa Jehovah’s Witness. Taem iu studyim gud firstaem, iu bae minim gud and diswan bae helpem iu for givim ansa long olketa part wea kongregeson savve ansa. Sapos iu followim samting wea iu lanem long Service Meeting, diswan bae helpem iu for duim gud preaching waka.

Taem evriwan long kongregeson go long Service Meeting evri week, diswan bae helpem kongregeson for waka tugeta. From iumi olketa Witness wea baptaes duim preaching waka, iumi mas go long disfala meeting for helpem iumi duim datfala waka. Service Meeting savve helpem eniwan wea laek for kamap wakman bilong God wea dedicate long Hem. Markem taem evri week for go long disfala meeting.

Bible hem storyim samfala meeting wea kamap long taem bifor. Long wanfala meeting olsem, bifor Jesus talem olketa disaepol bilong hem for go preach, hem lanem olketa wanem for talem and hao for duim datfala preaching waka. (Matt. 10:5–​11:1; Luke 10:​1-​16) Bihaen, olketa disaepol gohed for garem olketa meeting olsem for storyim olketa samting wea olketa duim long preaching, and diswan strongim olketa for duim disfala waka bilong Kingdom. (Acts 4:​23-​31) Distaem tu iumi gohed for duim sem samting.

THEOCRATIC MINISTRY SKUL

Theocratic Ministry Skul hem helpem evriwan long kongregeson. Long disfala skul iumi savve duim olketa Bible reading, Bible tok, student tok, and olketa nara samting wea savve helpem iumi duim preaching waka. Olketa student kasem help for kamap gudfala moa for givim olketa tok. Evriwan long kongregeson savve kasem gud samting from Theocratic Ministry Skul wea storyim olketa difren samting and wea helpem evriwan for kamap gudfala moa long preaching waka. Samfala taem iumi garem olketa review wea helpem iumi for ting raonem samting wea iumi wanwan lanem for duim preaching waka.

Evri year organization bilong Jehovah givimaot Theocratic Ministry Skul Schedule wea storyim evri samting for datfala skul. Disfala schedule hem talem wanem buk for iusim and hao for duim olketa tok. For staka year nao disfala Theocratic Ministry Skul barava helpem Olketa Jehovah’s Witness for kamap gudfala moa long wei for talemaot Kingdom. Evriwan wea kakam long olketa meeting wea savve long olketa teaching long Bible and obeyim olketa Christian teaching olsem savve joinim skul, nomata olketa niu wan tu.

Taem iumi joinim Theocratic Ministry Skul, diswan showimaot iumi laek kamap gudfala moa long spiritual wei. And tu iumi lanem staka samting wea savve helpem iumi for showimaot “gudfala waka” taem iumi story long pipol abaotem Jehovah. (Matt. 5:​16) Skul hia savve helpem iumi for iusim long gudfala wei taem bilong iumi long preaching waka and for givim olketa gudfala ansa long olketa kongregeson meeting wea savve strongim olketa narawan for duim gudfala samting. Datfala skul bae barava helpem olketa brata for kamap ministerial servant or elder. Gogo hem bae savve hao for duim big part long Service Meeting, and for givim pablik tok.

Skul overseer mas talem firstaem long olketa wea garem tok mekem olketa garem inaf taem for redyim gud datfala tok. Long day wea iumi garem tok long skul, no kam leit long meeting. Iumi mas trae for kam and givim tok bilong iumi. Bat sapos wanfala samting kamap and iumi no fit for givim tok bilong iumi, iumi mas talem skul overseer kwiktaem, mekem hem savve askem narawan for duim.

From iumi garem Theocratic Ministry Skul evri week diswan helpem iumi for kasem staka gud samting. Profet Isaiah hem tok olsem: “Lord Jehovah, helpem mi for story olsem man wea savve finis hao for story, mekem mi savve hao for story long man wea taed.” (Isa. 50:4) Disfala skul barava helpem staka million for story olsem pipol wea Jehovah lanem olketa. Long olketa year wea go pas, olketa wea joinim disfala skul gohed for kamap gudfala moa long spiritual wei and lane hao for kamap gudfala moa for talemaot gud nius abaotem Kingdom. Samting wea pipol bilong God lanem from datfala skul hem helpem olketa for redi evritaem for story long eniwan wea askem kwestin abaotem hope wea olketa garem. Holy spirit barava helpem olketa for story gud long taem olsem. Hem wanfala barava gudfala samting for savve hao for iusim Bible long wei olsem.

Olketa wea joinim Theocratic Ministry Skul savve kasem gud samting sapos olketa iusim library long Kingdom Hall. Datfala library shud garem olketa buk bilong Olketa Jehovah’s Witness, olketa Watch Tower Publication Index, maet samfala difren Bible, wanfala concordance, and samfala nara gudfala buk. Iumi savve iusim olketa buk hia long Kingdom Hall bifor and bihaen long olketa meeting.

KONGREGESON BUK STUDY

Olketa pablisa long kongregeson and olketa narawan wea hipap witim iumi savve kasem gudfala samting from Kongregeson Buk Study wea hem no big olsem olketa nara meeting. Long wanfala buk study olsem tu-thri famili and samfala narawan savve hipap. Olketa study hia kamap long olketa difren ples wea olketa brata and sista long kongregeson stap, and klosap evritaem hem long haos bilong wanfala brata. Kingdom Hall tu hem nara ples for garem buk study.

Buk study savve helpem iumi long wei wea difren from olketa nara meeting bilong kongregeson. Hao nao olsem? Hem olsem bikos long olketa Kongregeson Buk Study iumi studyim gud Bible and from olketa grup hia smol nomoa, hem savve helpem man wanwan for kamap gudfala moa long spiritual wei. Long buk study, iumi herem gudfala toktok from Bible, iumi kasem help for duim preaching waka, and iumi kasem samfala nara spiritual help wea fitim need bilong iumi wanwan. Datfala help hem showimaot hao Jehovah hem kaen tumas and tingim pipol bilong hem.​—Isa. 40:11.

Kongregeson Buk Study overseer hem man for duim study seleva and hem fit for helpem olketa narawan for savve gudfala moa long Bible and iusim datfala savve long gudfala wei. Hem bae duim disfala study and tu, hem bae tingim physical and spiritual need bilong olketa long grup, helpem olketa long preaching waka, duim olketa shepherding kol long olketa long grup and olketa narawan long kongregeson taem need hem kamap. Wanfala ministerial servant wea fit savve duim study sapos no eni elder stap for duim.

Long buk study iumi iusim Bible and buk wea Olketa Jehovah’s Witness wakem. Iumi duim study hia long sem wei olsem iumi duim Wastaoa Study. For startim buk study and for finisim iumi prea. Iumi readim olketa paragraf and man for duim study hem askem olketa kwestin and olketa narawan givim ansa. Iumi readim samfala scripture sapos inaf taem hem stap. Long end long study, brata wea duim study savve askem samfala kwestin for mekem man tingim olketa main point. Taem iumi go long buk study evritaem iumi bae kasem savve and minim samting. Iumi lane for iusim Bible for showim hao olketa toktok wea stap long buk wea iumi studyim hem tru, and tu hao for storyim samting wea iumi lanem long nara man long preaching waka. (2 Tim. 2:​15) Iumi kasem bigfala help long disfala meeting for kamap gudfala moa for lanem pipol for savve long Bible.

From grup hem smol iumi savve ansa staka taem. Datwan helpem iumi and olketa niu wan lane hao for talemaot faith bilong iumi. (Heb. 13:15) Hem gud for iumi lane hao for ansa long toktok bilong iumiseleva and no readim nomoa long buk.

Eniwan nomoa savve readim scripture, bat wanfala nomoa bae readim olketa paragraf. Kongregeson Buk Study overseer nao bae markem wanfala brata wea baptaes wea savve read gud for readim olketa paragraf. Evri week eni nara brata wea fit savve readim olketa paragraf. Sapos no eni brata savve read gud maet overseer seleva readim olketa paragraf or wanfala sista wea savve read gud savve duim.

From iumi garem olketa buk study wea stap klosap long olketa ples wea iumi stap, diswan mekem hem isi for iumi and olketa niu wan for go long datfala buk study. Hem gud for askem nara pipol for kam witim iumi long olketa meeting mekem olketa herem olketa gudfala spiritual toktok and for fren witim gudfala pipol.

Iumi savve hipap for preaching waka long ples for Kongregeson Buk Study tu. Grup savve hipap long ples hia long taem wea hem fitim for go preaching. Sapos iumi followim evri samting hia, olketa buk study savve kamap ples for iumi study and ples for hipap for go preaching.

GRUP FOR GO PREACH

Long olketa difren day long week Olketa Jehovah’s Witness savve hipap long olketa grup for go preaching. Long olketa grup olsem hem gud for storyim wanfala Bible scripture or text bilong datfala day sapos hem storyim preaching waka, olketa difren idea for story long man, or samfala idea from Kingdom Ministry. Bihaen brata wea lukaftarem grup storyim evri samting for duim long preaching, wanfala brata bae prea. Bihaen long prea grup hem redi for go long preaching waka. Long grup iumi herem olketa gudfala idea wea savve helpem iumi long preaching and olketa samting wea savve strongim iumi for go preach. Long olketa grup hia iu savve mekem plan for waka witim samfala wea iu savve helpem olketa long preaching waka. Olketa grup hia bae gohed for 10 go kasem 15 minute nomoa.