Studyim Worshipim God Buk

Worshipim Datfala Only Tru God buk hem for studyim witim olketa niu wan bihaen olketa studyim Wanem Bible Teachim buk. Taem iumi studyim disfala buk long Kongregeson Buk Study, diswan bae redyim iumi for iusim disfala buk long ministry and bae mekem iumi lovem and tinghae long Jehovah and organization bilong hem. Hao nao iumi savve kasem gud samting taem iumi studyim Worshipim God buk?

Hao for Duim Study: Buk study overseer mas markem gud haomas taem hem iusim for story raonem wanfala paragraf. Wei for storyim disfala review box long end long study bae helpem evriwan for rememberim olketa main point.

Staka chapter long Worshipim God buk garem olketa kwestin long paragraf for ting raonem and storyim tugeta. Samfala kwestin olsem stap long page 48-9. Brata wea readim olketa paragraf bae no readim olketa kwestin hia. Taem overseer hem story raonem olketa kwestin hia witim grup, hem savve askem samwan for readim olketa scripture and eniwan for storyim fitim taem wea stap.

Redi Gud: For redi gud for datfala study hem no minim iumi markem olketa ansa nomoa. Wei for prea and ting raonem olketa scripture bae helpem iumi for redyim olketa koment and heart bilong iumi, wea datwan nao barava important. (Ezra 7:​10) Iumi evriwan savve strongim narawan taem iumi givim koment wea no ova tumas and no long tumas.​—Rom. 1:​11, 12.

Disfala study long Worshipim God buk bae helpem iumi for fren gud witim Jehovah and bae redyim iumi for helpem olketa wea garem gudfala heart for worshipim God witim iumi. (Ps. 95:6; Jas. 4:8) Iumi evriwan savve kasem gud samting from disfala nambawan study.