2008 “Holy Spirit Leadim Iumi” Distrik Convention
1. (a) Why nao toktok Paul talem long olketa Hebrew Christian hem fitim taem bilong iumi? (Readim Hebrews 10:24, 25.) (b) Wanem nao klosap kamap wea iumi savve followim toktok bilong Paul?
1 Aposol Paul strongim olketa Hebrew Christian for hipap tugeta and strongim narawan ‘long bigfala wei’ taem olketa lukim hao datfala day hem kakam klosap. (Heb. 10:24, 25) Staka samting showimaot hao “datfala day” wea Paul storyim hem barava klosap! Dastawe, iumi laek for hipap witim olketa brata and sista bilong iumi for kasem spiritual kaikai wea bae strongim iumi long “olketa last day” wea barava nogud. (2 Tim. 3:1) Iumi bae kasem kaikai olsem long 2008 distrik convention.
2. (a) Why nao iumi mas go long thrifala day long convention? (b) Wanem nao iumi savve duim mekem iumi redi for go?
2 Kam Long Thrifala Day: Mifala laekem iufala for kam long thrifala day evriwan. Taem iumi “hipap tugeta,” iumi bae kasem nambawan kaikai. (Heb. 10:25) Start for redi distaem. Talem long boss bilong iu distaem mekem hem savve. Sapos olketa skul pikinini no holiday long taem for convention, talem teacher hao iufala bae gogo long convention. Talem hem hao disfala convention hem part long worship bilong iu. Iu bae kasem blessing from Jehovah taem iu mekhae long evri Kingdom waka.—Matt. 6:33.
3. Wanem nao iumi savve duim for showimaot iumi tingim olketa narawan?
3 Helpem Olketa Narawan for Kam: Paul talem olketa brata bilong hem for “tingim narawan.” (Heb. 10:24) Waswe, eni brata and sista long Kongregeson Buk Study bilong iu needim help for kam long convention? Waswe, iu savve helpem olketa Bible study bilong iu for enjoyim convention witim iu, nomata sapos olketa kam for wanfala day nomoa? Taem iu talem olketa narawan long famili bilong iu wea no Witness abaotem plan bilong iu for convention, askem olketa for kam witim iu. Sapos iu duim olsem, iu savve kasem olketa nambawan blessing.
4. Wanem nao samfala samting for tingim abaotem Spesol Need Rum pepa?
4 Spesol Need: Sapos wanfala pablisa askem ples for stap, Kongregeson Service Komiti shud disaed sapos datfala pablisa hem fit for kasem wanfala Spesol Need Rum pepa. Kongregeson secretary shud readim gud toktok wea mifala raetem long datfala pepa bifor hem sendem go long convention Ruming Department.
5. (a) Wanem nao iumi savve duim for praisem Jehovah taem iumi go long convention? (b) From gudfala wei bilong olketa brata, wanem nao samfala wea waka long hotel talem?
5 Gudfala Waka: Wei for obeyim toktok bilong Jehovah for hipap tugeta long worship savve mekem iumi ‘kasem gudfala samting.’ And winim datwan, iumi savve praisem nem bilong Jehovah. (Isa. 48:17) Staka pipol lukim ‘gudfala wei bilong iumi’ long olketa distrik convention and samfala talemaot tingting bilong olketa. (1 Tim. 5:25) Long wanfala taon wea iumi garem olketa convention for staka year finis, wanfala man wea lukaftarem hotel talem olsem: “Staka pipol long disfala taon story abaotem Olketa Jehovah’s Witness and wanem convention bilong iufala duim for mifala. Mifala savve pipol bilong iufala klinim ples bilong convention, and mifala lukim iufala klinim ples bilong olketa trak. Mifala hapi tumas iufala stap witim mifala long olketa taem olsem. Mifala laekem for iumi gohed fren gud olsem.” Bihaen hem storyim olketa problem wea kamap witim olketa narafala grup, narafala man wea lukaftarem hotel talem hao hem tinghae long olketa brata and sista bilong iumi wea waka tugeta and patient taem olketa stap long hotel. Hem talem olsem, “Mifala laekem pipol for olsem Olketa Jehovah’s Witness!” Gudfala wei bilong olketa brata and sista bilong iumi, wea mekem staka pipol for talem toktok olsem, hem mekem Jehovah, God bilong iumi hapi!
6. Hao nao Matthew 4:4 mekhae long wei for herehere gud long evri part long convention?
6 For kasem laef Jesus talem iumi for herem “evri toktok wea kamaot from mouth bilong Jehovah.” (Matt. 4:4) Long olketa convention, Jehovah givim spiritual “kaikai long barava taem,” wea “faithful and wise slave” nao redyim. (Matt. 24:45) Staka waka nao gohed for redyim gud disfala spiritual feast. For showimaot thankiu long Jehovah for love bilong hem, iumi mas kam and herehere gud long evri part long program.
[Box on page 3]
Taem Bilong Program:
Friday and Saturday
9:20 a.m. - 4:55 p.m.
Sunday
9:20 a.m. - 4:00 p.m.