CHAPTER 7 (Part 3)
Organized to Do Jehovah’s Will, page 72-77
Olketa Meeting for “Showimaot Love and Duim Gudfala Waka”
HAO FOR DUIM OLKETA MEETING LONG NIU OR SMOL KONGREGESON
Olketa niu disaepol mekem iumi for garem staka niu kongregeson. Wanfala niu kongregeson maet start long ples wea wanfala kongregeson stap finis or long ples wea no eni kongregeson stap bifor. Datfala niu kongregeson mas garem olketa pablisa wea baptaes and samfala narawan wea evriwan long olketa luksavve long faithful and wise slave and barava laek for duim samting wea datfala slave talem. Klosap evritaem, circuit overseer nao bae ask for wanfala niu kongregeson kamap. Samfala taem maet hem gud sapos wanfala smol grup hem hipap witim kongregeson wea stap klosap long hem.
Samfala taem olketa smol kongregeson garem olketa sista nomoa. Long kongregeson olsem, wanfala sista wea prea or duim eni meeting part mas kavarem gud hed bilong hem for obeyim wanem Bible hem talem. (1 Cor. 11:3-16) Klosap evritaem olketa sista wea duim meeting part bae sidaon long front and story kam long olketa narawan. Olketa sista bae no standap for duim eni meeting part olsem hao olketa brata savve duim. Olketa bae readim and storyim nomoa olketa buk wea Olketa Jehovah’s Witness wakem. Samfala taem olketa savve story tugeta witim olketa narawan or duim olketa demonstration.
Branch office nao bae markem olketa brata wea fit for kamap elder or ministerial servant long wanfala niu kongregeson. Sapos no eni brata stap for duim waka long kongregeson, olsem long grup wea olketa sista nomoa stap, branch office bae markem wanfala sista for lukaftarem olketa leta and duim olketa meeting. Gogo taem wanfala brata wea fit hem stap, hem nao savve duim datfala waka.
SPESOL ASSEMBLY DAY AND CIRCUIT ASSEMBLY
Long olketa smol meeting bilong olketa wea worshipim Jehovah, maet tu-thri nomoa hipap and long olketa bigfala assembly staka thousand nao savve hipap. Evri year olketa kongregeson long wanfala circuit hipap tugeta for wanfala spesol assembly day and for wanfala circuit assembly. Spesol assembly hem for wanfala day nomoa and circuit assembly hem for tufala day. Long olketa assembly hia hem taem for hapi and for “showimaot love” long olketa Christian brata and sista. (2 Cor. 6:11-13) Taem datfala “faithful and wise slave” redyim Bible theme and olketa part long assembly, olketa tingim need bilong evri kongregeson. Olketa assembly hia garem olketa difren wei for teach olsem olketa tok, story tugeta, demonstration, interview, or man actim samting wea happen. Staka taem assembly garem samfala part wea fitim need bilong olketa kongregeson wea hipap for datfala assembly and kaonsel wea barava fitim. Diskaen help bae strongim evriwan wea hipap.
Long olketa spesol assembly day and olketa circuit assembly olketa niu disaepol savve baptaes for showimaot olketa dedicate long Jehovah. Long olketa assembly olsem, evriwan barava hapi for herem olketa story wea olketa narawan talem abaotem waka for preachim gud nius.
DISTRIK CONVENTION
Wanfala taem long year Olketa Jehovah’s Witness garem olketa big hipap. Staka taem hem thrifala day distrik convention wea olketa kongregeson long samfala circuit hipap tugeta. Long olketa kantri wea garem smol branch maet hem isi nomoa for hipimap evri kongregeson long wanfala ples. Long samfala ples olketa distrik convention maet difren lelebet for fitim need bilong datfala kantri or followim samting wea Governing Body nao talem. Samfala taem wanfala convention bae kamap for full kantri. Samfala taem staka thousand Witness from olketa difren kantri savve hipap for olketa international convention wea kamap long samfala difren kantri. Long olketa year wea go pas, nius abaotem olketa bigfala hipap olsem bilong Olketa Jehovah’s Witness mekem staka pipol savve long gud nius abaotem Kingdom.
Pipol wea dedicate long Jehovah enjoyim wei for worship tugeta long olketa distrik, kantri, and international convention. Long olketa convention olsem samfala tok helpem iumi for minim go moa samfala teaching long Bible, iumi kasem olketa niu pablikeson for iumiseleva studyim, for iumi studyim long kongregeson, and iusim long preaching, and tu olketa niu wan savve baptaes. Olketa Jehovah’s Witness tinghae long olketa distrik convention wea mekhae long wei for kamap gudfala moa long spiritual wei and story raonem hao iumi savve gohed for duim disfala Christian waka for preachim gud nius. Long samfala smol branch, distrik convention savve kamap wanfala kantri convention. Olketa big convention olsem showimaot hao pipol bilong Jehovah long full world olketa wanfala big Christian famili wea dedicate and wea showimaot hao olketa nao disaepol bilong Jesus Christ.—John 13:35.
Taem iumi hipap long olketa kongregeson meeting and olketa assembly and convention wea pipol bilong Jehovah garem, iumi herem staka samting wea helpem iumi for duim wanem Jehovah laekem and wea protectim iumi from olketa samting long disfala world wea savve spoelem faith bilong iumi olketa Christian. Iumi wea stap long olketa last day distaem savve thankiu long Jehovah from hem givim olketa nambawan hipap olsem wea savve strongim iumi wea dedicate long hem.
EVENING KAIKAI BILONG LORD
Wanfala taem long year, evri kongregeson bilong Olketa Jehovah’s Witness garem Evening Kaikai Bilong Lord for rememberim day wea Jesus Christ hem dae. (1 Cor. 11:20, 23, 24) For pipol bilong Jehovah, disfala meeting wea kamap evri year hem spesol winim olketa nara meeting. Iumi mas obeyim toktok long Bible for rememberim disfala Evening Kaikai Bilong Lord.—Luke 22:19.
Bible storyim barava day wea Passover kamap. Memorial hem kamap long sem day olsem datfala Passover. (Ex. 12:2, 6; Matt. 26:17, 20, 26) Olketa Israelite mekem disfala Passover wanfala taem long year for rememberim day wea olketa go aot from Egypt long 1513 B.C.E. Long datfala taem Jehovah markem mek-14 day bilong firstfala month olsem taem for olketa kaikaim Passover sheepsheep and for lusim Egypt wea olketa prisoner long hem. (Ex. 12:1-51) For savve long disfala date olketa mas kaontem 14-fala day start long datfala niu moon wea klosap long March 21/22. Klosap evri year, Memorial hem kamap long day wea firstfala full moon hem showaot bihaen long March 21/22.
Long Matthew 26:26-28 Jesus talem hao for duim datfala Memorial. Datfala Memorial hem wanfala tokpiksa kaikai for olketa wea bae rul witim Jesus Christ long Kingdom bilong hem long heven. (Luke 22:28-30) Olketa nara Christian wea dedicate finis and nara pipol savve hipap tu for datfala Evening Kaikai Bilong Lord. Olketa wea kam showimaot hao olketa tinghae long samting wea Jehovah God givim for sevem olketa man wea hem nao Son bilong hem, Jesus Christ. Olketa Jehovah’s Witness barava tinghae long Memorial and olketa trae hard for go long Memorial evri year.
Klosap evritaem wanfala spesol pablik tok savve kamap long olketa kongregeson bilong Olketa Jehovah’s Witness long March or April. Olketa waka hard for askem pipol for kam herem datfala tok. Disfala tok hem for olketa wea laek for mekem God hapi and for mekem olketa barava laek studyim Bible.
Olketa Jehovah’s Witness hapi tumas for hipap tugeta long olketa meeting wea iumi savve “showimaot love and duim gudfala waka.” (Heb. 10:24) Datfala “faithful and wise slave” redyim olketa meeting olsem for givim spiritual kaikai wea fitim need bilong iumi. Evriwan wea worshipim Jehovah and eni narawan wea laek for kasem gud samting mas kam hipap tugeta evritaem. Taem olketa wea worshipim God tinghae long olketa samting wea olketa kasem from organization bilong Jehovah, diswan mekem olketa for waka gud tugeta.