Showim Iu Tinghae Long Olketa Buk
1 “Wei for mekem plande buk hem no savve finis.” (Eccl. 12:12) Staka buk wea pipol printim distaem nating gud nomoa. Bat olketa buk wea Watchtower Society printim olketa no olsem. Bikos buk bilong olketa garem gudfala spiritual kaikai wea savve sevem pipol. Olketa buk olsem helpem pipol wea laek savve long Jehovah, and strongim faith bilong olketa wea dedicate and worshipim Jehovah.
2 Iumi laek for givim pipol olketa buk from iumi savve olketa bae kasem gud samting. Tru, iumi no askem selen for olketa buk, bat iumi savve iumi iusim selen for wakem and sendem kam olketa buk. Dastawe, iumi no givim olobaot nomoa olketa buk. Sapos iumi no savve haosholder hem interest or nomoa, iumi savve givim Wastaoa and Awake! magasin or wanfala tract nomoa. Iumi savve go bak and lukim eniwan wea tekem buk, and sapos hem interest yet, iumi savve showim hem narafala buk moa.
3 Samfala pablisa fraet for talem olketa haosholder hao olketa donation nao sapotim disfala waka. Sapos iu talem haosholder, diswan bae helpem hem for savve iumi no mek bisnis long olketa buk bilong iumi. Main samting wea iumi laek for duim hem for preachim gud nius abaotem Kingdom and mekem disaepol. Hem helpem iumi for luksavve hu nao interest. Staka taem pipol garem selen for baem kaen samting olsem tobacco and niuspepa. Sapos olketa interest long wanem iu storyim, olketa bae luksavve hao hem gud for givim donation for Christian waka bilong iumi. Taem iumi storyim wanem nao sapotim waka bilong iumi, diswan showimaot hao iumi tinghae long olketa buk bilong iumi. Hem showimaot tu hao iumi luksavve olketa buk no free.
4 Taem iumi storyim gud disfala wei for givim donation staka haosholder hapi nomoa for givim samting for disfala important waka. Samfala taem maet iu tingse hem no fitim for iu storyim wei for givim donation, bat plande taem hem gud for talem diswan long firstaem iumi story witim haosholder wea laekem buk wea iumi offerim.