Iumi Aotem Olketa Strongfala Biliv
1 For staka handred year finis, Satan iusim olketa giaman teaching and wei for laea for spoelem tingting and heart bilong staka pipol. Hem mekhae long olketa teaching olsem Trinity, soul wea no savve dae, and hellfire. Hem mekem pipol daotem hao God nao wakem evri samting and givim kam Bible tu. Wei for heitim man from difren ples and for mekhae long kantri, mekem hem hard for pipol acceptim olketa tru teaching. (2 Cor. 4:4) Hao nao iumi savve aotem olketa strongfala biliv olsem?—2 Cor. 10:4, 5.
2 Tingim Feeling: Plande taem pipol garem strongfala feeling abaotem olketa teaching wea olketa lanem longfala taem finis. Samfala bilivim olketa rong teaching olsem from taem olketa smol kam. For helpem pipol olsem, hao iumi story mas showaot iumi respectim tingting bilong olketa.—1 Pet. 3:15.
3 Iumi savve showimaot respect long pipol olsem sapos iumi herehere gud taem olketa storyim biliv bilong olketa and why nao olketa biliv olsem. (Jas. 1:19) Maet olketa bilivim disfala teaching hao soul no savve dae, bikos samwan long famili or fren bilong olketa hem dae. Or maet olketa laek celebratem olketa holiday bikos hem taem wea olketa savve hapi tugeta witim famili bilong olketa. Taem iumi herehere gud long wanem olketa talem, diswan bae helpem iumi for luksavve long feeling bilong olketa and helpem olketa long gudfala wei.—Prov. 16:23.
4 Followim Jesus: Taem Jesus ansarem olketa kwestin bilong wanfala man wea savve gud long Law, hem showimaot gudfala wei for iumi followim. From datfala man tinghae tumas long olketa biliv bilong hem, Jesus no talem wanfala ansa wea hem no laek for herem. Bat Jesus storyim olketa scripture, askem hem for talem tingting bilong hem, and iusim olketa tokpiksa for helpem hem garem gudfala tingting.—Luke 10:25-37.
5 Trufala toktok bilong God savve helpem pipol for aotem olketa strongfala biliv bilong religion. (Heb. 4:12) Taem iumi story gudfala, iumi savve helpem pipol for aotem olketa laea teaching and acceptim olketa tru teaching wea bae mekem olketa kamap free.—John 8:32.