Redyim Olketa Niu Wan for Winim Hardfala Taem
1 Satan savve trae hard for spoelem olketa man wea start for studyim Bible and ‘laek for worshipim God.’ (2 Tim. 3:12) Hard taem savve kam from olketa long waka ples, long skul, or olketa neiba. Hem wanfala test taem wanfala klos relative nao againstim olketa niu wan.—Matt. 10:21; Mark 3:21.
2 Hard Taem Bae Kamap: Olketa niu wan mas savve persecution bae kamap and datwan showimaot olketa nao trufala disaepol bilong Christ. (John 15:20) Samfala taem, hard taem kamap bikos pipol herem olketa laea toktok abaotem Olketa Jehovah’s Witness. Taem pipol spoelem iumi from iumi followim Jesus and obeyim God, tingim evritaem bigfala hapi wea kamaot from datwan. (Acts 5:27-29, 40, 41) Talem olketa niu wan hao Jehovah bae helpem olketa. (Ps. 27:10; Mark 10:29, 30) Wei wea olketa gohed faithful, showimaot olketa saed witim Jehovah and wei wea hem nomoa fit for rul.—Prov. 27:11.
3 Waka Bilong Trufala Savve: Helpem Bible study bilong iu for luksavve hao nomata hem kasem hard taem hem barava important for hem gohed kasem trufala savve. Satan iusim olketa hard taem for trae stopem olketa for no keepim samting wea olketa lanem long tokpiksa heart bilong olketa. (Prov. 4:23; Luke 8:13) Olketa mas gohed for lanem trufala savve long Bible mekem olketa garem strongfala faith.—Ps. 1:2, 3; Col. 2:6, 7.
4 Mas No Givap: Iumi bae kasem gud samting sapos iumi no givap taem iumi kasem eni hard taem. (Luke 21:16-19) Taem olketa niu wan winim hard taem, olketa seleva and olketa narawan kasem gudfala samting. Olketa kasem blessing wea Jehovah savve givim olketa wea faithful long hem.—Jas. 1:12.
5 Aposol Paul barava hapi tumas taem olketa brata bilong hem long Thessalonica gohed strong long spiritual wei. Hem thankiu long God for olketa, wea staka long olketa nao hem helpem olketa for kasem trufala savve. (2 Thess. 1:3-5) Iumi tu savve kasem diskaen hapi sapos iumi helpem olketa Bible study bilong iumi for redi for winim olketa hard taem and no givap.