LESON 59
Iu Savve Gohed Faithful Nomata Iu Kasem Persecution
Evriwan wea worshipim Jehovah expectim pipol for againstim or persecutim olketa. Hao, iumi shud fraetem datwan?
1. Why nao iumi savve bae iumi kasem persecution?
Bible sei: “Pipol bae spoelem tu eniwan wea laek for faithful long God and followim Christ Jesus.” (2 Timothy 3:12) Jesus kasem persecution bikos hem no olsem pipol lo world blo Satan. Iumi tu no olsem pipol lo world, so iumi no sapraes taem iumi kasem persecution from olketa gavman and religion.—John 15:18, 19.
2. Wat nao iumi savve duim mekem iumi redi for persecution?
Distaem nao iumi mas strongim trust blo iumi lo Jehovah. Markem taem evriday for prea lo hem and readim Bible. Traem best for no misstim olketa meeting. Olketa samting hia bae helpem iu for no fraet nomata olketa lo famili persecutim iu. Aposol Paul tu kasem persecution staka taem. Hem sei: “Jehovah nao hem helpem mi. Bae mi no fraet.”—Hebrew 13:6.
Taem iumi preach evritaem, datwan helpem iumi tu for no fraet. Preaching waka helpem iumi for trustim Jehovah and no fraetem man. (Provebs 29:25) If iu no fraet for preach distaem, datwan bae helpem iu for gohed preach nomata gavman banim waka blo iumi.—1 Thessalonica 2:2.
3. Wat nao iumi bae kasem if iumi gohed faithful nomata iumi kasem persecution?
Taem iumi kasem persecution datwan no isi, bat taem iumi no givap datwan strongim faith blo iumi. Bae iumi fren gud witim Jehovah bikos iumi luksavve hem nao helpem iumi for no givap. (Readim James 1:2-4.) Jehovah sorre tumas taem hem lukim iumi safa, bat hem hapi taem hem lukim iumi no givap. Bible sei: “Sapos iufala no givap taem pipol spoelem iufala bikos iufala duim gudfala samting, God hem hapi long datwan.” (1 Peter 2:20) If iumi gohed faithful, Jehovah bae rewardim iumi for kasem laef olowe lo niu world. Then evriwan wea stap lo there bae worshipim Jehovah and no eniwan bae againstim olketa.—Matthew 24:13.
DIG GO MOA
Bae iumi storyim hao for gohed faithful lo Jehovah nomata pipol persecutim iumi and blessing wea iumi bae kasem from Jehovah.
4. Iu savve faithful nomata famili againstim iu
Jesus savve samfala lo famili maet no hapi taem iumi disaed for worshipim Jehovah. Readim Matthew 10:34-36, then discussim tugeta disfala kwestin:
Wat nao savve happen taem wanfala lo famili disaed for worshipim Jehovah?
For lukim wanfala example, pleim VIDEO, then discussim tugeta disfala kwestin.
Wat nao bae iu duim if wanfala relative or fren discouragem iu for no worshipim Jehovah?
Readim Sams 27:10 and Mark 10:29, 30. Bihaen iutufala readim each scripture, discussim tugeta disfala kwestin:
Hao nao promis lo scripture hia savve helpem iu taem eniwan lo famili or fren againstim iu?
5. Gohed worshipim Jehovah nomata pipol persecutim iumi
Iumi mas no fraet taem olketa narawan stopem iumi for worshipim Jehovah. Pleim VIDEO, then discussim tugeta kwestin hia.
Hao nao example blo olketa lo video helpem iu for no fraet?
Readim Acts 5:27-29 and Hebrew 10:24, 25. Bihaen iutufala readim each scripture, discussim tugeta disfala kwestin:
Why nao hem important tumas for gohed worshipim Jehovah nomata gavman banim preaching waka and olketa meeting?
6. Jehovah bae helpem iu for no givap
Olketa Jehovah’s Witness evriwea lo world wea young and olo, gohed faithful for worshipim Jehovah nomata olketa kasem persecution. For lukim wat nao helpem olketa, pleim VIDEO. Then discussim tugeta disfala kwestin.
Olsem iumi lukim lo video, wat nao helpem olketa brata and sista hia for no givap?
Readim Rome 8:35, 37-39 and Philippi 4:13. Bihaen iutufala readim each scripture, discussim tugeta disfala kwestin:
Hao nao disfala scripture mekem iu sure iu savve winim eni hard taem wea iu kasem?
Readim Matthew 5:10-12, then discussim tugeta disfala kwestin:
Why nao iu savve gohed hapi nomata iu kasem persecution?
Staka million Jehovah’s Witness gohed faithful for worshipim Jehovah nomata olketa kasem persecution. Iu tu savve duim datwan!
SAMFALA SAVVE TALEM: “Mi no savve hao nao bae mi deal witim eni persecution if hem kasem mi.”
Iu tingim eni scripture wea maet helpem samwan wea garem tingting olsem?
MAIN POINT
Jehovah tinghae tumas lo iumi taem iumi no givap for worshipim hem nomata iumi kasem persecution. Hem bae helpem iumi for no givap!
Review
Why nao iumi savve bae iumi kasem persecution?
Wat nao iu savve duim distaem for redi for persecution?
Wat nao mekem iu sure iu savve worshipim Jehovah nomata iu kasem eni hard taem?
FAENDAOT MOA
Lukim wanfala young brata storyim hao Jehovah helpem hem for no givap taem hem stap lo prison bikos hem neutral.
Lukim samting wea helpem wanfala couple for gohed faithful lo Jehovah for staka year nomata pipol againstim tufala.
Read abaotem wat iu savve duim for no fraet taem iu kasem persecution.
Taem famili againstim iumi, hao nao iumi shud ting lo datwan, and wat nao iumi savve duim for stap gud witim olketa and gohed faithful lo Jehovah?
“Truth Mekem ‘Pipol No Stap Gud Tugeta’” (Wastaoa, October 2017)