LESON 58
Gohed Faithful lo Jehovah
Olketa tru Christian mas no letem eni samting and eniwan for stopem olketa for worshipim Jehovah. Mifala sure iu tu garem tingting olsem. Jehovah tinghae lo iu from iu faithful lo hem. (Readim Fas Kronikols 28:9.) Wat nao olketa samting wea mekem hem no isi for iu faithful lo Jehovah, and hao nao iu savve deal witim datwan?
1. Wat nao samfala savve duim for mekem iumi no faithful lo Jehovah?
Samfala pipol bae trae for stopem iumi for worshipim Jehovah. Hu nao olketa hia? Samfala wea stop for worshipim Jehovah nao talem olketa laea story abaotem organization for spoelem faith blo iumi. Olketa apostate nao savve duim diswan. And tu, samfala bigman lo religion spredim laea story wea mekem samfala for bilivim datwan and stop for worshipim Jehovah. Hem no wise for explainim eni samting lo olketa apostate, for readim buk, go lo website, or watchim video blo olketa. Jesus story abaotem olketa wea trae for discouragem iumi for no faithful for worshipim Jehovah. Hem sei: “No warim olketa. Nomata olketa blind, bat olketa trae for leadim olketa narawan. Sapos man wea blind leadim nara man wea blind, tufala evriwan bae foldaon insaed hol.”—Matthew 15:14.
2. Hao nao samting wea iumi disaedem maet showim if iumi faithful lo Jehovah?
From iumi lovem Jehovah iumi bae no duim eni samting wea join witim false religion. Nomata for waka, joinim eni organization or duim eni nara samting wea sapotim false religion. Jehovah warnim iumi for “mas go aot from [Bigfala Babylon].”—Revelation 18:2, 4.
DIG GO MOA
Bae iumi storyim wat iu savve duim for no letem eniwan mekem iu for no faithful lo Jehovah and hao for go aot from Bigfala Babylon.
3. Careful lo olketa laea teacher
Wat nao iumi shud duim if iumi herem olketa story wea no tru abaotem organization blo Jehovah? Readim Provebs 14:15, then discussim tugeta disfala kwestin:
Why nao iumi shud no bilivim evri samting wea iumi herem?
Readim 2 John 9-11, then discussim tugeta olketa kwestin hia:
Hao nao iumi shud treatim olketa apostate?
Nomata iumi no go story witim olketa apostate, wat nao samfala samting wea maet iumi duim wea showim iumi still story witim olketa?
Hao nao feeling blo Jehovah if iumi lisin lo olketa laea story wea pipol talem abaotem hem, and organization blo hem?
4. Gohed faithful lo God taem eniwan duim sin
If iumi savve eniwan lo kongregeson duim big sin, wat nao iumi mas duim? Tingim principle from Law wea God givim lo olketa Israelite bifor. Readim Leviticus 5:1, NW.
Scripture hia helpem iumi for luksavve, if iumi savve wanfala brata or sista duim big sin, iumi shud storyim lo olketa elder. Bat bifor iumi duim datwan, hem gud for talem datfala brata or sista for hemseleva nao go story witim olketa elder. If hem no duim datwan, iumi showim iumi faithful lo Jehovah taem iumi nao go talem olketa elder. Hao nao datwan showim iumi lovem . . .
Jehovah God?
man wea duim sin?
olketa lo kongregeson?
If wanfala brata or sista duim samting wea no stret, helpem hem!
5. No duim moa eni samting wea join witim Bigfala Babylon
Readim Luke 4:8 and Revelation 18:4, 5, then ansarem kwestin hia:
Hao, mi still member blo false religion?
Hao, mi still joinim organization wea sapotim nara religion?
Hao, waka wea mi duim sapotim false religion?
Hao, eni samting wea mi duim showim mi sapotim yet false religion?
If ansa blo mi for eniwan lo olketa kwestin hia hem yes, wat nao mi mas changem?
Lo evri kwestin hia, hem gud for mekem disison wea bae helpem iu garem gud konsens and showim iu faithful lo Jehovah.
Wat nao bae iu duim if olketa askem iu for givim selen for sapotim eni religion?
SAMFALA SAVVE TALEM: “Mi need for savve wat olketa apostate talem abaotem Olketa Jehovah’s Witness mekem mi defendim truth.”
Hao, hem wise for duim datwan? Why nao olsem?
MAIN POINT
For gohed faithful lo Jehovah, iumi mas stop for associate witim olketa wea trae for laea lo iumi.
Review
Why nao iumi shud no lisin lo story blo olketa apostate?
If iumi herem wanfala brata hem duim serious sin, wat nao iumi shud duim?
Wat nao iumi savve duim for obeyim warning for go aot from false religion?
FAENDAOT MOA
Read abaotem wat iu savve duim taem pipol spredim laea story abaotem Olketa Jehovah’s Witness.
Wat nao bae helpem iu for luksavve lo olketa organization and olketa samting wea pipol duim wea showim olketa sapotim Bigfala Babylon?
“Gohed Busy lo Last Part blo ‘Olketa Last Day’” (Wastaoa, October 2019, paragraf 16-18)
Wat nao samfala apostate duim for spoelem faith blo iumi?
Lo datfala story, “Mi Lukaotem God Taem Mi Pikinini Yet,” read abaotem Shinto priest wea lusim false religion.
“Bible Changem Laef Bilong Pipol” (The Watchtower, July 1, 2011)