LESON 57
Hao If Iu Duim Bigfala Sin?
Nomata iumi lovem Jehovah tumas and traem best for no duim eni samting wea bae mekem hem feel nogud, samfala taem iumi savve mekem mistek. Bat samfala mistek hem big winim olketa narawan. (1 Corinth 6:9, 10) If iu duim bigfala sin, remember Jehovah still lovem iu, hem willing for forgivim and helpem iu.
1. Wat nao iumi mas duim mekem Jehovah forgivim iumi?
Olketa wea lovem Jehovah sorre tumas taem olketa savve olketa duim bigfala sin. Bat olketa kasem comfort from toktok wea Jehovah talem lo pipol blo hem wea sei: “Nomata sin blong yufala hemi barava had tumas for aotem olsem blad long waet kaleko, bat mi save mekem yufala fo kamap barava klin nomoa olsem snou.” (Aesaea 1:18) If iumi repent, Jehovah bae forgivim iumi. Wat nao showim iumi repent? Iumi sorre for wat iumi duim and stop for duim datwan, and askem Jehovah for forgivim iumi. Then iumi waka hard for changem tingting blo iumi, olketa samting wea savve mekem iumi for duim sin, and traem best for followim standard blo Jehovah.—Readim Aesaea 55:6, 7.
2. Hao nao olketa elder savve helpem iumi taem iumi duim big sin?
If iumi duim big sin, Jehovah talem iumi for “askem olketa elder long kongregeson for helpem [iumi].” (Readim James 5:14, 15.) Olketa hia lovem Jehovah and olketa brata and sista. Olketa kasem training for helpem iumi fren bak moa witim Jehovah.—Galatia 6:1.
Wat nao olketa elder duim for helpem iumi if iumi duim big sin? Tu or thrifala elder bae iusim Bible for helpem iumi luksavve wat iumi duim hem no stret. Olketa bae givim tu advaes for helpem iumi for no duim moa datwan. If eniwan duim big sin and hem no repent, olketa elder bae aotem hem mekem hem no spoelem olketa lo kongregeson.
DIG GO MOA
Bae iumi storyim wat iu savve duim for tinghae go moa lo hao Jehovah helpem iumi if iumi duim wanfala big sin.
3. Taem iumi confess lo Jehovah bae iumi fren bak witim hem
Eni sin wea iumi duim hem mekem Jehovah feel nogud, so hem fitim for iumi confess lo hem. Readim Sams 32:1-5, then discussim tugeta disfala kwestin:
Why nao hem important for confessim olketa sin blo iumi lo Jehovah and no trae for haedem?
Bihaen iumi confessim olketa sin blo iumi lo Jehovah, hem gud tu for askem olketa elder for helpem iumi, bikos datwan bae mekem iumi for no feel guilty tumas. Pleim VIDEO, then discussim tugeta disfala kwestin.
Olsem iumi lukim lo video, wat nao olketa elder duim for helpem Canon kam bak lo Jehovah?
Iumi mas storyim evri samting lo olketa elder bikos olketa redi for helpem iumi. Readim James 5:16, then discussim tugeta disfala kwestin:
Taem iumi honest lo olketa elder, hao nao datwan mekem hem isi for olketa helpem iumi?
Confessim sin blo iu, storyim evri samting lo olketa elder, and acceptim kaonsel from Jehovah
4. Jehovah showim mercy lo olketa wea duim sin
If eniwan duim bigfala sin and hem les for followim olketa standard blo Jehovah, olketa bae aotem hem from kongregeson. And iumi bae no associate witim hem. Readim 1 Corinth 5:6, 11, then discussim tugeta disfala kwestin:
Lelebet yeast nomoa savve mekem flaoa for rise, hao nao wei for associate witim samwan wea disfellowship savve spoelem kongregeson?
For followim example blo Jehovah wea showim mercy lo olketa wea duim sin, olketa elder duim samting for helpem olketa wea bin aot from kongregeson. Staka kam bak lo kongregeson bikos discipline wea olketa kasem, nomata hem mekem olketa feel nogud, datwan helpem olketa for luksavve wat olketa duim hem no stret.—Sams 141:5
Hao nao wei wea Jehovah deal witim olketa wea duim sin showim hem duim stret samting, garem bigfala mercy, and lovem iumi?
5. Jehovah forgivim iumi taem iumi repent
Jesus iusim wanfala illustration for helpem iumi minim feeling blo Jehovah taem samwan hem repent. Readim Luke 15:1-7, then discussim tugeta disfala kwestin:
Wat nao iu lanem abaotem Jehovah from disfala story?
Readim Esikiel 33:11, then discussim tugeta kwestin hia:
Wat nao samwan mas duim for showim hem repent?
Jehovah hem olsem shepherd wea lukaftarem gud sheepsheep blo hem
SAMFALA SAVVE TALEM: “Mi fraet for storyim sin wea mi duim lo olketa elder, nogud olketa aotem mi from kongregeson.”
Wat nao bae iu talem lo samwan wea garem tingting olsem?
MAIN POINT
If iumi duim wanfala big sin bat iumi repent and stop for duim datwan, Jehovah bae forgivim iumi.
Review
Why nao hem gud for iumi confessim olketa sin blo iumi lo Jehovah?
Wat nao iumi mas duim mekem Jehovah forgivim iumi?
If iumi duim wanfala big sin, why nao iumi shud story lo olketa elder?
FAENDAOT MOA
Lukim hao wanfala man kasem mercy blo Jehovah wea Aesaea 1:18 storyim.
Wat nao olketa elder duim for helpem olketa wea duim serious sin?
“Hao for Showimaot Love and Mercy lo Olketa wea Sin” (Wastaoa, August 2024)
Read abaotem hao for showimaot love and mercy lo olketa wea duim sin and no repent.
“Help for Olketa wea Aot From Kongregeson” (Wastaoa, August 2024)
Lo disfala story, “Mi Mas Go Bak for Worshipim Jehovah Moa,” read abaotem why wanfala man wea lusim truth luksavve Jehovah nao helpem hem for kam bak.