Gohed for Wan Mind lo Kongregeson

Taem iumi stap witim olketa brata and sista, iumi garem sem feeling olsem King David wea sei: “Hemi barava gud tumas taem olketa pipol blong God i wanmaen an stap tugeta gudfala.” (Sams 133:1) For kongregeson garem wan mind, each wan lo iumi mas waka tugeta.

1. Wat nao spesol abaotem pipol blo God?

If iu lo nara kantri and go lo wanfala meeting, maet iu no savve lo datfala languis. Nomata olsem, olketa brata and sista lo there still welkamim iu. Why nao olsem? Bikos evriwea lo world, iumi iusim sem pablikeson for studyim Bible. And iumi waka hard for showim love lo each other. Nomata wea nao iumi stap, iumi evriwan ‘prea lo Jehovah nomoa. An obeim hem tugeta.’​—Sefenaea 3:9.

2. Wat nao iu savve duim for kongregeson wan mind?

Bible sei: “Iufala mas barava lovem iufala evriwan from heart.” (1 Peter 1:22) Hao nao iu savve followim disfala kaonsel? Hem nao for no tingim wik point blo olketa narawan, bat luk for olketa gudfala wei blo olketa. No spendem taem nomoa witim olketa wea interest blo iufala semsem, bat trae for savve gud lo olketa brata and sista wea garem difren baekgraon. Iumi savve waka hard tu for aotem eni feeling for ting daonem narawan.​—Readim 1 Peter 2:17.a

3. Wat nao bae iu duim if eni brata or sista mekem iu feel nogud?

Evri brata and sista laek for wan mind, nomata olsem iumi no perfect. Samfala taem maet iumi duim samting wea mekem narawan feel nogud. Dastawe Bible sei for iumi ‘mas evritaem forgivim narawan olsem Jehovah wea willing for forgivim iumi.’ (Readim Colossae 3:13.) Staka taem iumi mekem Jehovah feel nogud, bat hem forgivim iumi. So hem expectim iumi tu for forgivim olketa brata and sista. If iu luksavve iu mekem samwan feel nogud, iu nao duim samting firstaem for stretem datwan.​—Readim Matthew 5:23, 24.b

DIG GO MOA

4. Aotem wei for ting daonem narawan

Iumi laek for lovem evri brata and sista blo iumi. Bat maet hem no isi for iumi lovem samwan wea garem difren baekgraon. Wat nao savve helpem iumi? Readim Acts 10:34, 35, then discussim tugeta olketa kwestin hia:

• Jehovah hapi lo evri difren kaen pipol wea worshipim hem. Wat nao iu savve duim for followim example blo Jehovah lo hao for ting lo pipol wea garem difren baekgraon?

• Wat nao pipol lo ples blo iu duim wea showim olketa ting daonem narawan? Why nao iu shud no garem kaen tingting olsem?

Readim 2 Corinth 6:11-13, then discussim tugeta disfala kwestin:

• Wat nao iu savve duim for showim iu lovem olketa brata and sista wea garem difren baekgraon?

5. Willing for forgive and stretem problem

Jehovah willing for forgivim iumi nomata hem no needim iumi for forgivim hem. Readim Sams 86:5, then discussim tugeta olketa kwestin hia:

• Wat nao iumi lanem from disfala verse abaotem hao Jehovah forgive?

• Why nao iu tinghae lo datwan?

• Wat nao savve mekem hem no isi for stap gud witim olketa narawan?

Hao nao iumi savve followim example blo Jehovah for stap gud witim olketa brata and sista? Readim Provebs 19:11, then discussim tugeta kwestin hia:

• Taem samwan mekem iu feel nogud, wat nao iu savve duim for stretem datwan?

Samfala taem iumi mekem olketa narawan feel nogud. If olsem, wat nao iumi shud duim? Pleim VIDEO, then discussim tugeta disfala kwestin.

VIDEO: Wei for Stretem Problem Mekem Blessing Kamap (6:01)

• Olsem iumi lukim lo video, wat nao datfala sista duim for stretem problem?

6. Tingim olketa gudfala wei blo olketa brata and sista

Taem iumi savve gud lo olketa brata and sista, iumi bae luksavve lo olketa gudfala wei and wik point blo olketa. Wat nao savve helpem iumi for tingim nomoa olketa gudfala wei blo olketa? Pleim VIDEO, then discussim tugeta disfala kwestin.

VIDEO: Showimaot Olketa Gudfala Wei! (5:10)

• Wat nao savve helpem iu for tingim olketa gudfala wei blo olketa brata and sista?

Jehovah tingim nomoa olketa gudfala wei blo iumi. Readim Mektu Kronikols 16:9a, then discussim tugeta kwestin hia:

• Wat nao tingting blo iu taem iu savve Jehovah tingim olketa gudfala wei blo iu?

MAIN POINT

Iu savve helpem kongregeson for wan mind taem iu willing for forgive and showim love for evri brata and sista.

Review

• Wat nao iu savve duim for no ting daonem narawan?

• Wat nao bae iu duim if iu feel nogud lo eni brata or sista?

• Iu laek for followim example blo Jehovah for forgivim olketa narawan? Why nao olsem?

FAENDAOT MOA

Lane from wanfala illustration blo Jesus wea savve helpem iumi for no judgem narawan.

Aotem Bigfala Timba (6:56)

Hao, iumi mas sei sorre nomata iumi no duim eni rong samting?

“Wei for Sei Sorre Wanfala Key for Kasem Peace” (Wastaoa, November 1, 2002)

Lukim hao samfala lane for no fevarem eniwan.

No Judgem Man Followim Samting Iumi Lukim Nomoa (5:06)

Read abaotem hao for stretem problem witim samwan bifor datwan spoelem peace blo kongregeson.

“Stretem Problem Witim Narawan” (Wastaoa, May 2016)