Famili Hed—Garem Gudfala Spiritual Schedule

¹ Nomata Daniel stap for plande year witim pipol long Babylon wea worshipim idol and duim olketa rabis samting, pipol savve hem man wea worshipim Jehovah “evritaem.” (Dan. 6:16, 20) Wanem nao hem duim for gohed fren gud witim God? Bible showimaot hem followim wanfala schedule for duim olketa samting wea join witim tru worship. Hem wei bilong hem for prea thrifala taem evriday long rum bilong hem. (Dan. 6:10) Masbi hem markem tu wanfala schedule for olketa nara spiritual samting, olsem wei for readim Law. Dastawe, taem Daniel kasem wanfala test wea putim laef bilong hem long danger, hem gohed strong for worshipim Jehovah, and hem sev long mirakol wei.—Dan. 6:4-22.

² Semsem tu distaem, iumi mas traem best for “gohed for wekap.” (Eph. 6:18) World wea iumi stap insaed hem ‘stap long paoa bilong Satan.’ (1 John 5:19) Wei wea pipol againstim iumi or olketa test savve seknomoa kamap and testim faith bilong iumi. Long datfala big trabol, Gog bilong Magog bae barava attakim olketa wakaman bilong God, and hem bae luk olsem no eni wei nao for olketa. Long datfala taem, bae olketa mas barava trustim Jehovah.—Ezek. 38:14-16.

³ Drama long distrik convention long 1998 hem garem title “Olketa Famili—Mekem Bible Reading Evriday Wei Bilong Laef!” Long introduction long drama hem sei: “Important samting for duim nao hem for famili mas readim, studyim, and storyim Bible evritaem.” Hem gohed for sei tu: “Taem olketa famili followim kaen program olsem evritaem and long wei wea mekem Bible hem interesting, diswan savve barava helpem famili. Hem mekem iumi kasem moa savve. Hem strongim faith bilong iumi. Hem storyim tu olketa gudfala example, wea hem nao, olketa man and woman from taem bifor wea barava faithful. Olketa hia barava encouragem iumi for sapotim truth.” Taem iumi storyim olketa difren samting insaed wanfala gud spiritual schedule long olketa paragraf hia, olketa famili hed shud lukaotem samfala wei for helpem spiritual program bilong famili bilong olketa.

⁴ Lukluk Long Word Bilong God Evriday: Koment long Lukluk Long Olketa Scripture Evriday—2001 for scripture text for September 11, hem sei: “Taem Kingdom bilong God hem rul and will bilong hem kamap long earth olsem long heven, no eni raf man or animal tu bae ‘spoelem eniwan or eni samting.’ (Isa. 11:9; Matt. 6:9, 10)” Disfala toktok barava mekem iumi hapi! From iu wanfala famili hed, waswe, hem wei bilong iu evriday for story raonem text and koment witim famili bilong iu? Diswan savve barava helpem famili. Sapos no fitim for storyim text long morning, maet iufala savve duim long narataem insaed long day. Wanfala dadi sei: “Taem mifala kaikai long evening nao hem gudfala taem for mifala storyim text for datfala day.”

⁵ Sapos iu garem finis gudfala schedule for famili bilong iu storyim text evriday, iu fit for kasem praise. Iu savve kasem gudfala samting moa sapos iu readim samfala verse or chapter from Bible long datfala taem tu. Samfala savve readim full chapter from Bible wea text for datfala day hem kam from. Olketa narawan savve isisi readim wanfala buk insaed Bible, maet long wei for readim tu-thri chapter evri day. Wei for readim Bible evriday bae helpem famili bilong iu for fraet long Jehovah and no duim eni samting wea bae mekem Jehovah no hapi. Datwan bae helpem olketa tu for barava laek duim will bilong Jehovah.—Deut. 17:18-20.

⁶ Program bilong famili bilong iu for readim Bible and lukluk long text evriday bae helpem iufala long bigfala wei moa sapos iu savve iusim tu-thri minute for storyim hao for followim datfala information. Long Ministry Skul buk, page 60, hem talem disfala idea: “Maet iu chusim tu-thri verse from Bible reading wea olketa markem for datfala week, storyim mining bilong olketa, and then askem olketa kwestin olsem: ‘Hao nao diswan provaedem instruction for iumi? Hao nao maet iumi iusim olketa verse hia long ministry? Wanem nao olketa showim abaotem Jehovah and wei bilong hem for duim samting, and hao nao diswan buildimap wei wea iumi tinghae long hem?’” Kaen spiritual story olsem bae helpem evriwan long famili bilong iu for “gohed for luksavve wanem nao will bilong Jehovah.”—Eph. 5:17.

⁷ Famili Study: Taem olketa famili hed conductim famili study evri week, diswan hem gudfala wei for showim long pikinini hao hem important for duim olketa spiritual samting firstaem. Wanfala young man sei: “Samfala taem Dadi hem barava taed from waka and hem laek sleep tumas, nomata olsem, study hem gohed nomoa, and diswan helpem mifala for luksavve famili study hem important tumas.” Olketa pikinini tu savve sapotim disfala arrangement. Wanfala famili wea garem naenfala pikinini, wekap evritaem long faev klok long morning for duim famili study bikos hem nomoa taem wea fitim olketa.

⁸ For kasem gudfala samting from famili study, famili hed mas ‘lukluk gud evritaem long hao hem teach.’ (1 Tim. 4:16) Ministry Skul buk, page 32, hem sei: “Iumi savve sei hao famili study wea barava help, hem start witim wei for iu lukluk gud long famili bilong iu. Long wanem wei nao olketa famili member bilong iu muv ahed long spiritual wei? . . . Taem iu waka long field ministry witim olketa pikinini bilong iu, waswe, olketa hapi for showimaot long nara pikinini hao olketa Jehovah’s Witness? Waswe, olketa enjoyim program wea iu markem for duim famili Bible reading and study? Waswe, olketa barava followim wei bilong Jehovah long laef bilong olketa? Wei for lukluk gud bae showimaot long iu, olsem famili hed, wanem nao iu mas duim for putim and buildimap olketa spiritual fasin insaed each famili member.”

⁹ Olketa Kongregeson Meeting: Wei for prepare firstaem and for go long olketa kongregeson meeting mas wanfala important samting long schedule bilong iufala evri week. (Heb. 10:24, 25) Samfala taem, maet evriwan insaed famili savve prepare tugeta olsem for samfala meeting. Winim wei for weit for last minute, waswe, iu savve arrange for duim diswan samfala day bifor taem for meeting? Wei for followim gudfala schedule olsem bae helpem iu for prepare gud and kasem gudfala samting from olketa meeting.—Prov. 21:5.

¹⁰ Taem iu garem gudfala spiritual schedule, bae iu savve worshipim God evritaem and datwan bae barava gud tumas tu. Waswe sapos eni samting long laef bilong iu mekem hem hard for iu prepare for evri meeting? Ministry Skul buk, page 31, hem givim disfala idea: “Stap klia long trap for kwiktaem preparem datfala information, or samting wea moa worse, no studyim eni part bilong hem bikos iu kanduit preparem full meeting. Bat, disaedem haomas nao iu savve studyim, and studyim gud datwan. Duim olsem each week. Gogo, trae for garem moa taem for prepare for olketa nara meeting.”

¹¹ Taem olketa famili kam early long meeting, diswan helpem olketa for redyim mind bilong olketa for praisem Jehovah and kasem gud samting from instruction wea hem provaedem. Waswe, diswan hem wei bilong famili bilong iu? For kam early long meeting, evriwan insaed famili mas waka tugeta. Sapos famili bilong iu no savve organize gud for go long meeting wea kamap long naet, waswe, iu savve changem schedule bilong iu? Waswe, iu savve redyim samfala samting firstaem long morning or aftanun? Sapos eniwan insaed famili garem staka samting for duim, waswe, olketa narawan savve helpem hem? Waswe, bae hem moa isi sapos evriwan redi for go early long meeting? For organize gud, hem savve mekem famili and evriwan insaed kongregeson hapi and waka gud tugeta.—1 Cor. 14:33, 40.

¹² Field Service: Gudfala spiritual schedule bae helpem iumi markem taem for duim ministry bilong iumi. Wanfala young man wea nem bilong hem Jayson, sei olsem: “Famili bilong mi go long field service evri Saturday morning. Diswan hem gudfala samting for mi bikos taem mi go aot evritaem long ministry, mi lukim hao diswan barava helpem pipol, wea datwan nao mekem mi for enjoyim tumas datfala waka.” Plande wea big kam insaed Witness famili tu lukim hao wei for markem taem for ministry evri week hem helpem olketa for savve gud long hao for duim datfala waka.

¹³ Gudfala schedule savve helpem famili bilong iu tu for barava enjoyim field service and kasem gudfala samting from datwan. Hao nao olsem? Long July 1, 1999, Wastaoa, page 21, hem talem disfala idea: “Waswe, samfala taem long famili study iu helpem olketa famili member for prepare for field service for datfala week? Wei for duim olsem savve barava help. (2 Tim. 2:15) Hem savve mekem ministry bilong olketa gud tumas and olketa savve kasem gudfala samting. Samfala taem, maet iu markem full famili study for prepare olsem. Plande taem, maet iu savve storyim samfala samting abaotem field ministry bihaen famili study hem finis or long eni narafala taem long datfala week.” Waswe, famili bilong iu traem disfala idea finis?

¹⁴ Gohed for Kamap Gud Go Moa: Waswe, iu lukim eni idea long disfala article wea famili bilong iu followim finis? Praisem olketa, and gohed strong for followim olketa idea hia. Sapos iu lukim samfala idea wea famili mas gohed waka hard long hem, chusim wan or tufala idea for waka long hem firstaem. Bihaen iu win for followim olketa idea hia long spiritual schedule bilong iu, waka long wan or tufala idea moa. Tingim gud saed and balance. (Phil. 4:4, 5) Hem no isi for mekem gudfala spiritual schedule for famili bilong iu. Bat bae iu kasem gud samting bikos Jehovah promisim iumi olsem: ‘Mi bae mekem man wea strong for followim wanfala wei for lukim wei wea God bae sevem iu.’—Ps. 50:23.