Niu Circuit Assembly Program

Wanem nao iumi savve duim for againstim olketa wea trae for stopem tru worship? Wanem nao iumi savve duim for againstim wei wea Satan trae hard for pullim iumi for laekem world wea no followim God? Circuit assembly program for 2009 service year bae ansarem olketa kwestin hia. Theme hem “Gohed Strong Long Gudfala Wei Mekem Iufala Winim Evri Rabis Wei.” (Rom. 12:21) Tingim samfala tok wea bae kamap.

Distrik overseer bae duim olketa tok hia “Strongim Gudfala Wei for Winim Olketa Rabis Wei,” “Keakea Long Wei for Trustim Iumiseleva!,” “Klosap Evri Rabis Wei Bae Finis!,” and “Strongim Faith Bilong Iumi for Winim Disfala World.” Circuit overseer bae duim olketa tok hia “Distaem Hem Taem for Mas Wekap!,” wea kam from Romans 13:11-​13, and “No Wikdaon Long Day Bilong Trabol,” wea kam from Proverbs 24:10. Iumi bae hapi tu for herem nara tok bilong circuit overseer, “Need Bilong Circuit.” Narafala tok for iumi savve ting raonem hem, “Waswe, Iu Savve ‘Duim Disfala Waka’​—Long Wei for Pioneer?” Firstfala tok wea garem fofala part hem “Againstim Olketa Kleva Trik Bilong Satan.” Datfala part bae helpem iumi for luksavve and ranawe from olketa kleva trik bilong Devil wea kamaot from olketa niu samting wea man wakem, hapitaem, and wei for skul. Narafala tok wea garem fofala part hem, “For Againstim Satan Long Disfala Rabis Taem Iumi Mas Kasem Strong” bae helpem iumi for followim toktok long Ephesians 6:​10-​18.

For preachim gud nius abaotem Kingdom, iumi mas gohed for winim evri rabis wei. (Rev. 12:17) Dastawe Satan laek winim Olketa Jehovah’s Witness! (Isa. 43:10, 12) Bat Devil bae nating winim iumi bikos iumi disaed strong for “gohed strong long gudfala wei mekem [iumi] winim evri rabis wei.” Mekem plan for kam long tufala day evriwan for kasem gudfala samting from disfala circuit assembly program.