Niu Spesol Assembly Day Program

Theme for spesol assembly day program long 2009 service year hem “Gohed Duim Gud Datfala Waka wea Iu Kasem . . . , Mekem Iu Duim Gud Datwan,” wea kam from Colossians 4:​17. From iumi olketa Christian, iumi strong for duim nao samting wea datfala theme talem. Goal bilong iumi hem for faithful for duim ministry bilong iumi long gudfala wei, olsem Jesus tu faithful for duim datwan. (John 17:4) Aposol Paul tu hem showimaot barava gud example long diswan. Hem disaed strong for gohed duim gud ministry bilong hem.​—Acts 20:24.

Circuit overseer bae storyim samting wea samfala pablisa duim for winim samfala hard samting long ministry bilong olketa. Then disfala tok “Mekem Grow Samting wea Iu Plantim” bae mekhae long hao iumi savve barava helpem “olketa wea laek savve long laef olowe.” (Acts 13:48) Firstaem, brata wea branch sendem kam bae storyim evri verse long 2 Corinthians 6:​1-​10, long disfala tok “Hao for Showimaot Iumi Olketa Wakman.” Long aftanun, hem bae storyim disfala theme “Barava Tinghae Long Waka wea Iu Kasem.” Iu bae kasem strong from tufala tok hia “Olketa Young Wan and Olketa Olo Hapi for Duim Preaching” and “Olketa Young Wan wea Duim Gud Waka wea Olketa Kasem.” Olketa wea dedicate wea laek for baptaes long circuit assembly or spesol assembly wea bae kamap shud talem long presiding overseer kwiktaem. Wanfala important part long olketa assembly and convention hem tok wea storyim olketa main point long Wastaoa study. Tekem kam Wastaoa magasin bilong iu long week wea iumi bae garem spesol assembly day.

Iumi trae for no letem olketa nara samting mekem iumi busy tumas gogo iumi no garem taem for duim disfala waka wea Jehovah givim long iumi. Strong wea iumi kasem from disfala assembly day program shud helpem iumi for minim samting wea iumi mas duim for mekem iumi garem gudfala tingting abaotem hao for duim gud ministry.