Hao Nao Bae Olketa Herem?
1. Why nao maet hem no isi for duim preaching waka, and why nao iumi gohed nomoa?
1 From day bilong Jehovah hem hariap for kam, iumi mas kwiktaem helpem staka for kasem stretfala savve abaotem God and plan bilong hem for olketa man. (John 17:3; 2 Pet. 3:9, 10) Samfala taem hem no isi for duim olsem, bikos staka pipol tok spoelem iumi or no laek herem disfala gud nius wea iumi talemaot. (2 Pet. 3:3, 4) Nomata olsem, iumi savve samfala stap yet wea laek for herem gud nius. Hao nao bae olketa herem sapos no eniwan preach long olketa?—Rom. 10:14, 15.
2. Wanem nao aposol Paul duim wea strongim iumi?
2 Kasem Hard Taem: For iumi helpem olketa wea laek for herem gud nius abaotem Kingdom, iumi mas no wikdaon. Philippi hem firstfala taon long Europe for herem gud nius wea aposol Paul preachim. Olketa whipim Paul and Silas long stik and putim tufala long prison bihaen samfala talem laea toktok for spoelem tufala. (Acts 16:16-24) Nomata Paul kasem datfala hard taem, hem no fraet for gohed and preach. Hem ‘nating fraet for talemaot gud nius abaotem God’ taem hem kasem Thessalonica, mek-tu taon long missionary gogo bilong hem. (1 Thess. 2:2) Wei bilong Paul barava showimaot why iumi mas ‘no givap.’—Gal. 6:9.
3. Wanem nao mekem samfala wea no laek herem gud nius bifor for change distaem?
3 Staka wea for longfala taem no laek for herem gud nius change distaem and laek for herem. Olketa samting olsem, hard taem for kasem selen, sik, samwan long famili hem dae, or nius abaotem olketa nogud samting wea happen distaem savve mekem samfala for change olsem. (1 Cor. 7:31) Samfala pikinini wea taem olketa smol mami and dadi no laek for herem gud nius, distaem olketa pikinini hia kamap big and olketa laek for herem. Wei wea iumi gohed for preach givim chance long pipol olsem for ‘savve long Jehovah’ bifor hem tu leit.—Rom. 10:13.
4. Wanem nao strongim iumi for “gohed” long preaching waka?
4 “Gohed”: Love wea iumi garem for God and nara pipol bae strongim iumi for “gohed” long waka for preach and mekem disaepol olsem olketa aposol long first century duim. (Acts 5:42) Staka pipol distaem ‘sorre and feel nogud long evri rabis samting’ wea happen distaem. (Ezek. 9:4) Taem pipol olsem herem gud nius, datwan mekem olketa feel gud and garem hope! Nomata sapos staka les for herem iumi, Bible talem iumi hao Jehovah hem hapi witim waka wea iumi duim.—Heb. 13:15, 16.