Waswe, Iu Redi for Go Skul?
1. Wanem chance nao bae iu garem taem iu start for skul?
1 Nomata hem firstaem bilong iu for go skul or nara year moa for iu go skul, iufala olketa young Christian bae feisim samfala hard taem. Nomata olsem, iufala garem chance for talemaot “olketa tru samting.” (John 18:37) Waswe, iu redi for talemaot gud nius?
2. Wanem nao iu savve duim mekem iu redi for skul?
2 For helpem iu win long evri samting long laef bilong iu, iu kasem finis training wea kam from Jehovah, mami and dadi bilong iu, and datfala wakaman wea faithful and wise. (Prov. 1:8; 6:20; 23:23-25; Eph. 6:1-4; 2 Tim. 3:16, 17) Distaem iu shud savve finis olketa hard samting wea iu bae kasem long skul bilong iu. From iu savve gud abaotem skul bilong iu and training wea iu kasem from Bible, datwan bae helpem iu for redi for talemaot gud nius. (Prov. 22:3) Iusim olketa gudfala idea from Bible and olketa gudfala toktok wea stap long tufala Young People Ask buk, and olketa story from Awake! wea iumi kasem evritaem.
3. Long olketa wanem wei nao iu savve preach long olketa narawan?
3 Iu savve preach long plande difren wei long disfala spesol territory bilong iu. Taem olketa lukim hao iu werem gudfala kaleko and lukluk bilong iu, toktok bilong iu, wei wea iu respectim olketa teacher and olketa nara pikinini, gudfala mark wea iu kasem, and olketa lukim hao iu garem strongfala faondeson long laef, maet diswan mekem samfala ask olsem, “Why nao iu difren from olketa nara pikinini?” (Mal. 3:18; John 15:19) Maet diswan hem chance for iu preach and helpem olketa for minim olketa biliv bilong iu. (1 Tim. 2:9, 10) Taem iu long skul, iu bae feisim samfala hard samting olsem wei for salutim flag, singsing for mekhae long kantri, and samfala holiday. Wanem nao bae iu talem sapos olketa askem iu, why iu no join long olketa samting hia, waswe, bae iu sei nomoa, “Religion bilong mi stopem mi, mi wanfala Jehovah’s Witness,” or diswan hem chance for iu preach abaotem Jehovah, Dadi wea lovem iu? Taem iu followim wei wea Jehovah lanem iu for redi gud firstaem, datwan bae helpem iu for story gud long olketa student, olketa teacher, and olketa narawan.—1 Pet. 3:15.
4. Hao nao iu savve iu bae gohed gud taem iu go long skul?
4 Nomata iu shame lelebet for go skul, no fraet, bikos olketa narawan laekem iu for gohed gud taem iu go skul. And mifala hapi for lukim hao iu garem chance for preach long olketa narawan long disfala spesol territory bilong iu. Dastawe iu mas no fraet and redi gud for go skul!