Lukaotem Olketa wea Laek for Lisin
1. Long wanem wei nao iumi showimaot iumi tinghae long privilege wea iumi garem for preach?
1 Taem Jesus duim ministry bilong hem, hem barava waka hard for givim comfort taem hem preachim gud nius long olketa hambol pipol. (Isa. 61:1, 2) Olsem man wea stand for Christ and wea talemaot gud nius abaotem hem, iumi garem nambawan privilege for followim hem taem iumi no givap for lukaotem olketa wea laek lisin wea stap long territory bilong iumi.—Matt. 10:11; 2 Cor. 5:20.
2. Long wanem wei nao Paul showimaot hem willing for traem olketa difren wei for preach, and wanem gud samting nao kamaot from datwan?
2 Willing for Change: Hem wei bilong aposol Paul for go firstaem long sinagog for preach long olketa Jew and olketa wea no Jew or pipol from nara kantri wea followim olketa Jew. (Acts 14:1) Taem Paul and Silas stap long Philippi tufala lukaotem pipol long ples wea ‘olketa tingse hem ples for prea.’ Olketa start for preach long samfala grup bilong olketa woman and wanfala long olketa wea nem bilong Lydia, hem kwiktaem acceptim truth.—Acts 16:12-15.
3. Wanem nao samfala nara ples for preach wea maet iumi enjoyim?
3 Samfala nara ples for preach hem stap tu. Maet iu savve preach long bas stop, ples for rest, hospital, long street, bisnis ples, and olketa stoa long territory bilong iumi. Iumi savve iusim leta or telephone for preach tu long pipol wea stap long olketa ples wea hem hard for iumi go insaed. Wei for lukluk gud and willing for change for fitim olketa difren samting wea happen long territory, bae helpem iu for “garem staka samting for duim long waka bilong Lord.”—1 Cor. 15:58.
4. Wanem nao olketa nara samting wea iumi savve duim sapos kongregeson bilong iumi no garem inaf territory?
4 Plande pablisa garem chance for duim moa long preaching waka bilong olketa, taem olketa muv long nara kongregeson, maet long province bilong olketa seleva or long nara province. Olketa narawan tu lanem difren languis mekem olketa savve preach long pipol wea kam from nara kantri.
5. Hao nao iumi shud ting long taem wea iumi stap distaem, and wanem nao iumi shud disaed strong for duim?
5 Iumi evriwan mas tingim hao “garden nao disfala world.” (Matt. 9:37; 13:38) From iumi luksavve hao end bilong disfala world hem barava klosap, iumi wanwan mas tingting strong long laef bilong iumi, long savve wea iumi garem, chance wea iumi garem, and wei for duim moa samting long ministry. Jehovah promisim hao sapos iumi putim Kingdom firstaem, hem bae blessim preaching waka bilong iumi.—Matt. 6:33.