“Kaikai . . . Long Barava Taem”
1. Long wanem wei nao last spesol assembly day helpem iu and olketa narawan?
1 Bihaen iumi attendim spesol assembly day, staka taem iumi savve sei, “Datfala program barava fitim iumi nao!” Wanfala circuit overseer storyim bihaen olketa brata and sista herem program long last spesol assembly, samfala long circuit bilong hem talem hao olketa laekem tumas for duim moa samting long ministry. Wanfala traveling overseer sei, “Datfala program helpem mifala for tingim taem wea iumi stap long hem and for lukluk gud long laef bilong mifala and disaedem stretfala samting for duim.” Narawan sei, “Staka pablisa talem hao datfala program remindim olketa for mek sure ministry nao important waka for duim.” Long wanem wei nao spesol assembly day helpem iu?
2. Wanem nao bae iumi herem long program for next spesol assembly day?
2 Nextfala spesol assembly day bae barava fitim wanem iumi needim. Theme hem kam from Psalm 118:8, 9 wea sei, “Trustim Jehovah Olsem Sef Ples for Haed.” Diswan nao theme bilong samfala tok wea iumi bae herem: “Jehovah Hem Strongfala Haos Bilong Iumi Long Taem Bilong Trabol,” “Helpem Olketa Narawan for Stap Sef Andanit Wing Bilong Jehovah,” “Followim Wei Bilong Jehovah for Provaedem Sef Ples for Haed,” “Young Pipol, Trustim Jehovah!” and “Jehovah Provaedem Spiritual Paradaes for Iumi Stap Sef.”
3. Long wanem wei nao iumi savve kasem gudfala samting from iumi attendim program?
3 For Kasem Gudfala Samting: Taem olketa announcem date bilong program, mekem plan for iu attend and invaetem tu olketa Bible study for kam. For “garem frut and no givap” iumi mas rememberim wanem iumi herem. (Luke 8:15) So herehere gud long program, and raetem olketa main point wea iu laek for followim long laef and long ministry bilong iu. Bihaen assembly, markem taem witim famili for story raonem datfala program and wanem iufala savve duim for followim samting wea iufala herem.
4. Why nao iumi shud luk forward long nextfala spesol assembly day bilong iumi?
4 Olsem kaikai wea teist gud and wea savve strongim body, wakaman wea faithful and wise redyim gud nextfala spesol assembly day for iumi. Jehovah bae blessim wei wea iu traem best for attendim and kasem gudfala samting from “kaikai . . . long barava taem” for strongim faith bilong olketa Christian.—Matt. 24:45.