Samfala Nara Chance for Praisem Jehovah
1. Wanem nao datfala niu arrangement wea bae helpem iumi for “praisem Jehovah long bigfala wei”?
1 Long March wanfala niu arrangement hem start. Olketa pablisa savve auxiliary pioneer for 30 hour long March and April, and long month wea circuit overseer visitim kongregeson. Sapos week bilong visit bilong circuit overseer hem start long end bilong wanfala month, and finis long start bilong nara month, pablisa wea apply for duim 30 hour savve chusim wanfala long tufala month hia for auxiliary pioneer. Evri auxiliary pioneer savve attendim full meeting bilong circuit overseer witim olketa regular and spesol pioneer. So sapos iu no fit for auxiliary pioneer for 50 hour, iu garem fofala chance evri year for auxiliary pioneer for 30 hour, wea datwan bae “praisem Jehovah long bigfala wei”!—Ps. 109:30; 119:171.
2. Olketa wea auxiliary pioneer taem circuit overseer visit bae kasem wanem gud samting?
2 Taem Circuit Overseer Visit: Distaem staka moa pablisa savve auxiliary pioneer taem circuit overseer visit, and olketa savve kasem encouragement from wei for waka witim hem long ministry and olketa savve encouragem hem tu. (Rome 1:11, 12) Maet samfala auxiliary pioneer ask for day off from waka mekem olketa savve waka witim circuit overseer. Olketa auxiliary pioneer wea waka for selen from Monday go kasem Friday savve askem hem for waka witim olketa long Saturday or Sunday. Nara samting tu, hem bigfala blessing for olketa wea auxiliary pioneer attendim pioneer meeting witim olketa regular and spesol pioneer!
3. Why nao taem bilong Memorial hem gudfala taem for auxiliary pioneer?
3 Long March and April: Bifor, long taem bilong Memorial, olketa auxiliary pioneer savve duim 30 hour for wanfala month nomoa. Distaem olketa auxiliary pioneer savve “praisem God” long wei for duim 30 hour for tufala month! (Heb. 13:15) Month bilong March and April hem nambawan taem for duim moa samting long ministry long wei for auxiliary pioneer. Evri year long March and April, iumi hapi for invaetem pipol for kam long Memorial. Nara samting tu, from staka pablisa auxiliary pioneer long taem bilong Memorial, iumi savve waka witim samfala difren pablisa. Bihaen long Memorial, iumi visitim moa olketa wea attend and invaetem olketa for kam long spesol pablik tok. Waswe, bae iu hapi for mekius long olketa chance hia for auxiliary pioneer?—Luke 6:45.