Kamap Gud Long Ministry​—Askem Kwestin Mekem Iu Savve Go Bak for Duim Return Visit

WHY HEM IMPORTANT:

Iumi laek for watarem seed bilong truth wea iumi plantim. (1Co 3:6) Taem iumi meetim samwan long field wea interest long gud nius, hem gud for iumi askem wanfala kwestin wea bae iumi go bak for ansarem. Datwan bae mekem hem luk forward for datfala visit and bae hem isi for iumi prepare for datfala return visit. Taem iumi go bak, iumi savve sei: “Mi kam for ansarem datfala kwestin wea iumi storyim lastaem.”

WANEM FOR DUIM:

• Taem iumi redyim story bilong iumi for preaching, hem gud for iumi redyim wanfala kwestin wea iumi bae ansarem long return visit. Maet hem wanfala kwestin wea ansa bilong hem stap insaed pablikeson wea iumi offerim. Or iu savve askem wanfala kwestin wea ansa stap insaed long Gud Nius brochure or Bible Teachim buk for showim hem hao iumi savve duim study taem iumi go bak long hem.

• Taem iumi luksavve samwan hem interest long story bilong iumi, iumi savve talem hem iumi laek for kam bak moa and then askem kwestin wea iumi redyim finis. Sapos hem fitim, askem mobile namba bilong hem.

• Sapos iumi markem taem for go bak long haosholder, iumi shud duim datwan.—Mt 5:37.