Kamap Gud lo Ministry​—Redi for Changem Story

WHY HEM IMPORTANT: Olketa anointed and olketa nara sheepsheep invaetem evri difren kaen pipol for kam and tekem “datfala wata wea savve mekem man laef.” (Re 22:17) Datfala wata piksarem evri samting wea Jehovah provaedem for sevem olketa man wea obey from sin and dae. For helpem pipol wea garem difren culture or religion, iumi need for talemaot “disfala gud nius” lo wei wea mekem man wanwan for interest.—Re 14:6.

WANEM FOR DUIM:

• Chusim subject and scripture wea savve kasem heart blo pipol lo territory. Maet iu savve iusim wanfala idea for ministry or iusim story wea iu faendem hem waka gud. Hem gud for tingim: Wanem kaen subject and scripture nao pipol interest lo hem? Waswe, eni samting happen wea pipol warim distaem? Wanem subject nao man or woman interest lo hem?

• Toktok for startim story and story blo iu shud fitim culture blo pipol lo ples blo iu.—2Co 6:3, 4

• Savve gud lo olketa pablikeson and video lo Teaching Toolbox mekem iu savve wanem for showim lo samwan wea interest

• Daonlodim pablikeson and video lo languis blo pipol iu meetim lo territory

• Redi for changem story mekem hem fitim wanem haosholder interest lo hem. (1Co 9:19-23) Example, wanem nao bae iu talem sapos haosholder sei samwan wea hem lovem hem dae?

LUKIM VIDEO, THEN ANSAREM OLKETA KWESTIN HIA:

• Wanem subject nao pablisa storyim lo haosholder?

• Wanem nao happen lo laef blo haosholder?

• Lo taem olsem, wanem scripture nao hem gud for pablisa iusim and why?

• Wanem nao iu duim for changem lelebet idea for preach mekem hem fitim pipol lo territory?