LAEF BLO CHRISTIAN
Strongim Faith blo Iu lo Word blo God
Word blo God savve changem laef blo iumi. (Heb 4:12) Bat for kasem gud samting from advaes, direction, and kaonsel wea stap insaed Bible, iumi mas barava sure “hem toktok bilong God.” (1Th 2:13) Wat nao iumi savve duim for strongim faith blo iumi lo Bible?
Readim samfala verse lo Bible evriday. Taem iu readim Bible, luk for olketa samting wea pruvim Bible hem kam from Jehovah. For example, readim advaes wea stap lo buk blo Proverbs and lukim hao datfala advaes hem fitim taem blo iumi tu.—Pr 13:20; 14:30.
Startim wanfala study project. Savve gud lo olketa pruv wea showimaot Bible hem kam from God. Iusim Research Index for Olketa Jehovah’s Witness, and luk anda lo subject “Bible” and lukim heding “Kam From God.” Nara samting wea iu savve duim for barava sure message wea stap lo Bible hem no change, hem nao for studyim information wea stap lo Appendix A3 blo New World Translation.
WATCHIM VIDEO HAO NAO FAITH MEKEM IUMI SURE . . . TOKTOK BLO GOD HEM TRU, AND THEN ANSAREM OLKETA KWESTIN HIA:
Hao nao samting wea olketa faendem lo wanfala wall blo temple lo Karnak, lo Egypt, hem pruvim Word blo God hem tru?
Hao nao iumi savve message wea stap lo Bible hem no change?
Hao nao wei wea Bible stap kam kasem distaem hem pruvim dat hem Word blo God?—Readim Isaiah 40:8