Hambol for Luksavve Dat Iumi No Savve lo Evri Samting

1. Wat nao olketa ability wea Jehovah givim lo iumi, and why nao olsem?

JEHOVAH creatim iumi witim ability for tingting, for kasem knowledge, for minim samting, and for followim wat iumi lanem. Why nao hem creatim iumi lo wei olsem? Bikos hem laekem iumi for “faendem knowledge abaotem God” and garem wei for ting raonem samting taem iumi worshipim hem.—Prov. 2:​1-5; Rom. 12:1.

2. (a) Wat nao iumi need for luksavve lo hem? (Job 37:​23, 24) (Lukim tu piksa.) (b) Wat nao gud samting iumi kasem taem iumi hambol for luksavve iumi no savve lo evri samting?

² Nomata iumi garem ability for lanem staka samting, savve blo iumi garem limit. (Readim Job 37:​23, 24.) Tingim example blo Job. Taem Jehovah askem hem staka kwestin, hem just luksavve hao hem no savve lo staka samting. Story blo Job witim Jehovah helpem Job for hambol and stretem tingting blo hem. (Job 42:​3-6) Iumi tu kasem gud samting taem iumi hambol for luksavve hao iumi no savve lo evri samting. Wei for hambol olsem bae mekem iumi for trustim dat Jehovah bae provaedem information wea iumi really needim for helpem iumi for mekem olketa wise disison.—Prov. 2:6.

3. Wat nao bae iumi storyim lo disfala article?

³ Lo disfala article, bae iumi storyim samfala samting wea iumi no savve lo hem and olketa challenge wea maet kamap bikos lo datwan. And bae iumi storyim tu, why hem gud dat iumi no savve lo samfala samting. Taem iumi storyim olketa point hia, datwan bae strongim iumi for trustim wei wea Jehovah, man wea “garem perfect knowledge,” hem evritaem talem iumi wat iumi really need for savve lo hem.—Job 37:16.

IUMI NO SAVVE WAT TAEM NAO END BAE KAM

4. Olsem Matthew 24:36 talem, wat nao iumi no savve lo hem?

⁴ Readim Matthew 24:36. Iumi no savve wat taem nao end blo disfala system bae kam. Taem Jesus lo earth, hem tu no savve lo datfala “day and hour.”a Jesus storyim lo olketa aposol tu dat Jehovah, Man wea Kontrolem Taem, hem nao markem taem wea olketa samting bae happen bikos hem nao “garem raet [or paoa] for disaedem datwan.” (Acts 1:​6, 7) So Jehovah hem markem finis taem wea disfala system bae end, bat hem hard for iumi savve lo barava taem wea datwan bae happen.

5. From iumi no savve wat taem nao end bae kam, hao nao maet datwan affectim iumi?

⁵ Datfala toktok wea Jesus talem, showim dat iumi no savve hao long nao iumi bae weit bifor end hem kam. From datwan, iumi maet start for discourage or no patient, especially if iumi bin weit longtaem finis for day blo Jehovah. Or maet iumi discourage bikos olketa famili member or olketa narawan mekfani lo iumi. (2 Pet. 3:​3, 4) Maet iumi start for ting olsem, ‘If iumi savve lo barava taem wea end bae kam, bae hem moa isi for iumi patient and deal witim wei wea olketa narawan mekfani lo iumi.’

6. Why nao hem gud dat iumi no savve taem wea end bae kam?

⁶ Taem Jehovah no talem iumi barava taem wea end bae kam, hem givim iumi chance for showim dat iumi worshipim hem bikos iumi lovem and trustim hem. Iumi laek for worshipim Jehovah for olowe, and no ting lo worship blo iumi olsem hem garem deadline. Winim wei for focus nomoa lo taem wea “day blo Jehovah” bae kam, iumi laek for focus lo olketa gud samting wea iumi bae kasem lo datfala taem. Taem olsem, iumi bae gohed faithful lo God and duim best blo iumi for mekem hem hapi.—2 Pet. 3:​11, 12.

7. Wat nao iumi savve finis?

⁷ Hem important for Iumi focus lo wat iumi savve finis. Iumi savve dat olketa last day hem start lo 1914. Jehovah provaedem olketa Bible profesi wea pruvim datfala year. And tu, hem givim staka detail wea storyim olketa samting wea bae happen afta datfala year. From datwan, iumi barava sure dat “bigfala day blo Jehovah hem klosap nao.” (Zeph. 1:14) Iumi savve tu lo waka wea Jehovah laekem iumi for duim, wea hem nao for iumi duim best for talemaot “disfala gud nius abaotem Kingdom” lo staka pipol. (Matt. 24:14) Iumi talemaot disfala gud nius lo samting olsem 240 kantri and lo winim 1,000 languis. Iumi no need for savve lo “day and hour” for mekem iumi strong for share insaed disfala important waka.

IUMI NO SAVVE HAO JEHOVAH BAE DUIM SAMTING

8. Wat nao disfala toktok “waka blo tru God” hem minim? (Ecclesiastes 11:5)

⁸ Staka taem iumi no savve lo “waka blo tru God.” (Readim Ecclesiastes 11:5.) Disfala toktok “waka blo tru God” hem minim evriting wea Jehovah duim for mekem will blo hem kamap, wea includim wat Jehovah kosim for happen or letem for happen. Hard for iumi savve why Jehovah maet letem samting for happen or wat hem bae duim for helpem iumi. (Ps. 37:5) Bible comparem wei wea iumi no savve lo “waka blo tru God” witim wei wea iumi no really savve hao wanfala baby grow insaed bele blo mami, samting wea even olketa scientist tu no barava minim yet.

9. From iumi no savve hao Jehovah bae duim samting, wat kaen tingting nao maet iumi start for garem?

⁹ From iumi no savve hao Jehovah bae duim samting for helpem iumi, maet iumi hol bak for disaedem samfala samting. Iumi maet hol bak for mekem olketa sakrifaes for duim moa samting lo ministry, olsem for mekem laef simpol or for muv lo ples wea needim pablisa. Or maet iumi wonder tu if Jehovah hem appruvim iumi, from iumi no kasem olketa theocratic goal blo iumi, or if iumi no lukim eni gud result from hard waka blo iumi lo ministry, or iumi feisim samfala challenge lo wanfala theocratic project.

10. Wat nao olketa important quality wea iumi savve garem taem iumi no savve hao Jehovah bae duim samting?

¹⁰ Really, wei for no savve lo hao Jehovah bae duim samting, hem helpem iumi for garem olketa important quality olsem wei for hambol and modest. Iumi luksavve dat tingting blo Jehovah and olketa wei blo hem barava hae winim iumi. (Isa. 55:​8, 9) And tu, iumi lane for barava trustim Jehovah and depend lo hem for helpem iumi succeed lo evri samting. And taem iumi kasem gud result lo ministry or lo wanfala theocratic project, iumi givim praise lo Jehovah bikos hem nao mekem datwan for happen. (Ps. 127:1; 1 Cor. 3:7) Nomata situation hem no happen olsem hao iumi expectim, iumi need for remember dat Jehovah hem savve lo evri samting. (Isa. 26:12) So, iumi duim wat iumi fit for duim, and gohed for trustim dat Jehovah bae evritaem duim samting for helpem iumi. Iumi barava sure Jehovah bae givim iumi direction wea iumi needim, nomata maet Jehovah no duim eni mirakol olsem hao hem duim bifor.—Acts 16:​6-10.

11. Wat nao samfala samting wea iumi savve lo hem, wea savve helpem iumi?

¹¹ Tingim, iumi savve dat Jehovah hem evritaem showimaot love, justice, and hem wise. And iumi savve dat hem tinghae lo wat iumi duim for hem and olketa brata and sista blo iumi. And iumi savve tu dat Jehovah evritaem rewardim olketa wea loyal lo hem.—Heb. 11:6.

IUMI NO SAVVE WAT BAE HAPPEN TUMORO

12. Olsem James 4:​13, 14 storyim, wat nao iumi no savve lo hem?

¹² Readim James 4:​13, 14. Wanfala samting wea iumi evriwan no savve lo hem, hem nao wat bae happen lo laef blo iumi tumoro. Lo disfala system, “taem and samting wea man no expectim hem kasem evriwan.” (Eccl. 9:11) From datwan, iumi no savve if olketa samting wea iumi planim bae succeed or if iumi bae laef go kasem taem wea iumi completim olketa plan blo iumi.

13. Hao nao wei for no sure lo wat bae happen tumoro hem savve affectim iumi?

¹³ Hem no isi for deal witim olketa samting wea happen lo laef, taem iumi no sure lo wat nao bae happen tumoro. Why nao olsem? Bikos iumi maet wari abaotem wat nao bae happen, and datwan savve spoelem hapi blo iumi. Olketa sorre samting wea seknomoa happen and olketa situation wea iumi no expectim, savve mekem iumi for sorre tumas or feel nogud. And taem iumi no kasem wat iumi expectim, iumi savve feel wikdaon and discourage.—Prov. 13:12.

14. Wat nao hapi blo iumi depend lo hem? (Lukim tu piksa.)

¹⁴ Taem iumi kasem olketa hard taem and no givap, iumi pruvim hao nomata wat nao happen, iumi servem Dadi blo iumi lo heven bikos iumi lovem hem, no bikos iumi laek kasem gud samting for iumiseleva. Olketa story lo Bible showimaot dat iumi shud no expectim Jehovah for protectim iumi from evri hard taem and hem no disaedem finis wat bae happen lo laef blo iumi. Jehovah savve dat hapi blo iumi hem no depend lo wei for savve lo wat bae happen lo iumi lo future. Bat, hapi blo iumi hem depend lo wei for lukaotem direction blo Jehovah and for obeyim hem. (Jer. 10:23) Taem iumi luk lo hem for helpem iumi mekem disison, hem olsem iumi sei: “Sapos hem will blo Jehovah, bae iumi laef and iumi duim diswan or datwan.”—Jas. 4:15.

15. Wat nao iumi savve lo hem abaotem future?

¹⁵ Iumi no savve wat nao bae happen each day, bat iumi savve, Jehovah promis for givim iumi laef olowe, maet lo heven or lo earth. Iumi savve, hard tumas for God hem laea and no eni samting savve stopem hem for fulfillim promis blo hem. (Titus 1:2) Jehovah nomoa savve talemaot wat bae kamap, and talem “from longtaem kam finis olketa samting wea no happen yet.” Datwan hem happen bifor, and bae hem happen moa lo future. (Isa. 46:10) Iumi barava sure no eni samting savve stopem love blo Jehovah for iumi. (Rom. 8:​35-39) Hem bae givim iumi wisdom, comfortim iumi, and strongim iumi mekem iumi no givap nomata wat nao happen lo future. Iumi savve sure Jehovah bae helpem and blessim iumi.—Jer. 17:​7, 8.

HARD FOR IUMI BARAVA MINIM WEI WEA JEHOVAH SAVVE GUD LO IUMI

16. Olsem Psalm 139:​1-6 storyim, wat nao Jehovah savve lo hem abaotem iumi, and hao nao iumi ting lo datwan?

¹⁶ Readim Psalm 139:​1-6. Creator blo iumi hem savve gud lo iumi from hem nao wakem iumi, and hem savve lo olketa samting wea affectim laef blo iumi lo physical wei, saed lo feeling, and tingting blo iumi. Hem evritaem interest lo iumi. Hem savve lo wat iumi talem and wat nao insaed heart blo iumi, wat iumi duim and why iumi duim datwan. Olsem King David storyim, Jehovah stap evriwea raonem iumi for lukaftarem iumi and no enitaem hem farawe from iumi. Tingim, hem barava spesol samting for Sovereign Lord blo universe, datfala olmaeti Creator blo heven and earth for barava interest lo each wan lo iumi! David hem sei: “Savve olsem wea iu garem abaotem mi, hem winim nao eniting wea mi savve ting abaotem. Hem tumas nao for mi understandim.”—Ps. 139:​6, ftn.

17. Why nao iumi maet faendem hem hard for acceptim dat Jehovah hem barava savve gud lo iumi?

¹⁷ Samfala samting wea maet mekem hem hard for iumi lukim dat Jehovah hem loving Dadi wea interest lo iumi, hem famili baekgraon, culture, or olketa biliv blo iumi bifor. Or iumi maet tingse olketa mistek blo iumi bifor hem nogud tumas so Jehovah bae no laek for savve lo iumi and stap farawe from iumi. David tu hem feel olsem samfala taem. (Ps. 38:​18, 21) Or maet samwan wea trae hard for changem laef blo hem for followim raeteous standard blo God hem wonder, ‘If God barava understandim mi, why nao hem expectim mi for changem kaen laef wea mi getius lo hem?’

18. Wat nao gud samting iumi kasem taem iumi acceptim dat Jehovah savve gud lo iumi winim hao iumi savve lo iumiseleva? (Lukim tu piksa.)

¹⁸ Iumi savve lane for luksavve and acceptim dat Jehovah savve gud lo iumi winim hao iumi savve lo iumiseleva, and hem lukim olketa gud wei blo iumi wea iumi no lukim. Hem lukim tu olketa mistek blo iumi and understandim hao iumi feel and why iumi duim samting. Nomata olsem, hem lovem iumi. (Rom. 7:15) Taem iumi luksavve dat Jehovah lukim hao iumi fit for duim gud samting, datwan savve mekem iumi for barava trustim hem and faithful for servem hem and gohed hapi.

19. Wat nao iumi savve lo hem abaotem Jehovah?

¹⁹ Iumi savve Jehovah hem love. Iumi no daotem datwan. (1 John 4:8) Iumi savve dat olketa raeteous standard blo hem showimaot hem lovem iumi and hem evritaem savve wat nao best samting for iumi. Iumi savve dat Jehovah laekem iumi for kasem laef olowe. For mekem iumi kasem datwan, hem provaedem ransom. Datfala ransom hem present wea pruvim lo iumi dat iumi savve win nomata iumi no perfect. (Rom. 7:​24, 25) And iumi savve dat “God hem big winim heart blo iumi and hem savve lo evri samting.” (1 John 3:​19, 20) Jehovah lukim evri samting abaotem iumi, and hem trustim iumi dat bae iumi savve duim will blo hem.

20. Wat nao bae helpem iumi for no wari tumas?

²⁰ Jehovah no holem bak eni information wea iumi really need for savve lo hem. Taem iumi hambol for luksavve lo datwan, bae iumi no wari tumas abaotem olketa samting wea iumi no savve kontrolem and iumi savve focus lo wat hem really important. Taem iumi duim olsem, iumi showimaot iumi trustim Jehovah, man “wea garem perfect knowledge.” (Job 36:4) Distaem, hao iumi minim samfala samting hem garem limit, bat, iumi luk forward for gohed lanem olketa niu samting from Nambawan God blo iumi, and for lane abaotem hem for olowe.—Eccl. 3:11.