Helpem Bible Student for Disaed Strong for Servem Jehovah

1-2. (a) Why nao samfala Bible student hol bak for disaed for servem Jehovah? (b) Wat nao iumi bae storyim lo disfala article?

BIFOR iu kamap Jehovah’s Witness, hao, iu hol bak lelebet? Maet iu hol bak bikos iu fraet nogud olketa workmate, frens, or famili againstim iu. Or maet iu tingse hem bae hard for iu gohed faithful for followim olketa standard blo God. If olsem, bae iu minim feeling blo olketa Bible student wea maet hol bak for disaed for servem Jehovah.

² Jesus luksavve kaen wei for fraet olsem savve stopem samwan for muv ahed lo spiritual wei. (Matt. 13:​20-22) Jesus no givap for helpem olketa wea hol bak for followim hem. Bat, hem showim olketa disaepol blo hem hao for helpem olketa hia for (1) luksavve wat nao stopem olketa for progress for servem Jehovah, (2) strongim love blo olketa for Jehovah, (3) adjustim wat hem important lo laef blo olketa, and (4) for winim olketa challenge wea olketa feisim. Taem iumi iusim Enjoyim Laef for Olowe! buk for helpem wanfala Bible student for disaed for servem Jehovah, hao nao iumi savve applyim wat Jesus talem lo olketa disaepol blo hem?

HELPEM BIBLE STUDENT LUKSAVVE WAT NAO STOPEM HEM FOR PROGRESS FOR SERVEM JEHOVAH

3. Wat nao maet stopem Nicodemus for kamap disaepol blo Jesus?

³ Nicodemus, hem wanfala important leader blo olketa Jew, bat wanfala samting stopem hem for kamap disaepol blo Jesus. Samting olsem six month afta Jesus startim ministry blo hem, Nicodemus luksavve God nao sendem kam Jesus. (John 3:​1, 2) Bat, Nicodemus disaed for kam haed for meetim Jesus bikos hem “fraetem olketa bigman blo olketa Jew.” (John 7:13; 12:42) Maet hem tingse hem bae lusim position and riches blo hem if hem kamap disaepol blo Jesus.a

4. Wat nao Jesus duim for helpem Nicodemus for minim wat God laekem hem for duim?

⁴ Nicodemus savve gud lo Law wea Jehovah givim lo olketa Israelite, bat hem needim help for minim wat Jehovah laekem hem for duim. Hao nao Jesus helpem hem? Nomata Nicodemus kam lo naet, Jesus willing for iusim taem blo hem for story witim Nicodemus. And Jesus talem klia lo Nicodemus wat hem need for duim for kamap wanfala disaepol. Hem talem Nicodemus for repent from olketa sin blo hem, baptaes lo wata, and showimaot faith lo Son blo God.—John 3:​5, 14-21.

5. Hao nao iumi savve helpem Bible student for luksavve lo wat nao stopem hem for progress?

⁵ Even if wanfala Bible student hem savve gud lo Bible, maet hem needim help for hem luksavve lo wat nao stopem hem for progress. Maet waka blo hem for selen or wei wea famili againstim hem nao stopem hem for kasem olketa spiritual goal. So willing for givim taem for helpem Bible student blo iu. Iu maet invaetem hem for iutufala kaikai or go wakabaot tugeta. Lo olketa taem olsem, maet iu savve helpem hem for feel free for storyim olketa challenge wea hem feisim. Encouragem Bible student for mekem olketa important change lo laef blo hem bikos hem laek for showim hem lovem Jehovah and no for mekem iu hapi.

6. Hao nao iu savve helpem student for no hol bak for disaed for servem Jehovah? (1 Corinthians 16:13)

⁶ Taem wanfala Bible student barava sure dat Jehovah bae helpem hem for followim olketa standard lo Bible, hem bae no hol bak for followim wat hem lanem. (Readim 1 Corinthians 16:13.) Wanfala study conductor hem olsem wanfala skul teacher. For example, if iu ting bak lo taem iu skul, wat kaen teacher nao iu laekem? Maet hem datfala teacher wea patient for helpem iu for confident for duim samting. Lo sem wei tu, wanfala gud Bible study conductor teachim student lo wat God laekem iumi for duim, and remindim hem dat Jehovah bae helpem hem for mekem olketa important change lo laef blo hem. Hao nao iu savve kamap gud teacher olsem?

HELPEM BIBLE STUDENT FOR STRONGIM LOVE BLO HEM FOR JEHOVAH

7. Wat nao Jesus duim for helpem olketa wea lisin lo hem for strongim love blo olketa for Jehovah?

⁷ Jesus savve dat love for God bae motivatim olketa disaepol for followim wat olketa lanem. So staka taem, Jesus storyim olketa samting wea savve helpem olketa disaepol for strongim love blo olketa for Dadi blo olketa lo heven. For example, Jesus sei Jehovah hem olsem wanfala dadi wea givim gud tings for pikinini blo hem. (Matt. 7:​9-11) Samfala wea lisin lo Jesus maet no garem wanfala loving dadi wea kaen olsem. So tingim hao olketa maet feel, taem olketa herem illustration blo Jesus abaotem wanfala loving dadi wea welkamim bak son blo hem wea bin duim staka nogud samting. Datwan helpem olketa for lukim hao Jehovah hem kaen tumas lo olketa pikinini blo hem lo earth.—Luke 15:​20-24.

8. Hao nao iu savve helpem Bible student for strongim go moa love blo hem for Jehovah?

⁸ Iu tu savve helpem Bible student for strongim love blo hem for Jehovah, lo wei for evritaem storyim olketa quality blo God taem iu teach. During each study, helpem hem for luksavve hao samting wea hem lanem hem connect witim love blo Jehovah. Taem iutufala storyim ransom, strongim hao Jehovah givim ransom for hem tu. (Rom. 5:8; 1 John 4:10) Taem Bible student ting raonem hao Jehovah lovem hem, datwan bae muvim hem for strongim go moa love blo hem for Jehovah.—Gal. 2:20.

9. Wat nao helpem Michael for changem laef blo hem?

⁹ Tingim story blo Michael, from Indonesia. Hem savve lo truth taem hem growap, bat hem no baptaes. Taem hem 18 years old, hem go lo nara kantri for waka olsem wanfala trak draeva. Bihaen hem marit, hem leavim famili lo hom and gohed waka lo nara kantri. Gogo, waef and dota blo hem, start for studyim Bible and tufala gohed gud. Afta mami blo hem dae, Michael disaed for kam bak lo hom for lukaftarem dadi blo hem and hem agree for studyim Bible. Taem olketa story raonem datfala sekson “Dig Go Moa” lo leson 27 blo Enjoyim Laef for Olowe! buk, datwan kasem heart blo Michael. Taem Michael ting raonem hao Jehovah mas feel sorre tumas taem hem lukim Son blo hem, Jesus safa, datwan barava affectim Michael and hem krae. Hem barava tinghae lo ransom and datwan muvim hem for changem laef blo hem and baptaes.

HELPEM BIBLE STUDENT ADJUSTIM WAT HEM IMPORTANT LO LAEF BLO HEM

10. Wat nao Jesus duim wea helpem olketa disaepol for adjustim wat hem important lo laef blo olketa? (Luke 5:​5-11) (Lukim tu piksa.)

¹⁰ Olketa firstfala disaepol kwiktaem luksavve Jesus nao Messiah wea Bible promisim, bat olketa needim help for mekem ministry kamap main samting lo laef blo olketa. Peter and Andrew olketa disaepol blo Jesus finis bifor hem invaetem olketa for followim hem full-taem. (Matt. 4:​18, 19) Tufala garem wanfala gud fishing bisnis, and luk olsem James and John tu waka witim tufala. (Mark 1:​16-20) Taem Peter and Andrew “lusim olketa net blo tufala,” luk olsem tufala mekem samfala plan for provaed for famili blo olketa taem olketa go followim Jesus. Wat nao muvim olketa for adjustim wat hem important lo laef blo olketa? Story lo Luke talem iumi dat Jesus duim wanfala mirakol wea strongim olketa for trustim dat Jehovah hem savve provaed for olketa.—Readim Luke 5:​5-11.

11. Hao nao iumi savve iusim experience blo iumiseleva for strongim faith blo Bible student?

¹¹ Hard for iumi duim olketa mirakol olsem Jesus, bat iumi savve storyim olketa experience abaotem hao Jehovah sapotim olketa wea putim Hem first lo laef blo olketa. For example, waswe, iu rememberim hao Jehovah helpem iu taem iu start for attendim olketa meeting? Maet lo datfala taem, iu story witim boss and explainim dat iu no savve waka ovataem if hem bae affectim taem blo iu for attendim meeting. Taem iu storyim experience blo iu witim student, explainim hao faith blo iu hem kamap moa strong taem iu lukim Jehovah sapotim disison blo iu for mekem worship blo hem kamap main samting lo laef blo iu.

12. (a) Why nao iumi shud invaetem olketa difren pablisa for joinim study? (b) Hao nao iu savve iusim gud olketa video taem iu teachim student blo iu? Storyim example.

¹² Nara samting wea savve helpem Bible student blo iu tu, hem nao for olketa herem hao olketa nara Christian adjustim samfala samting mekem Jehovah kamap first lo laef blo olketa. So invaetem olketa nara brata and sista from olketa difren baekgraon for joinim study. Askem olketa for explainim hao olketa kam insaed lo truth and wat olketa duim for mekem worship blo Jehovah kamap main samting lo laef blo olketa. And tu, spendem taem witim student for watchim olketa video lo datfala sekson “Dig Go Moa” or “Faendaot Moa” lo Enjoyim Laef for Olowe! buk. For example, taem iutufala discussim leson 37, iu savve haelaetim olketa principle from datfala video Jehovah Bae Provaedem Wanem Iumi Needim.

HELPEM BIBLE STUDENT FOR WINIM ENI CHALLENGE

13. Hao nao Jesus redyim olketa disaepol for deal witim wei wea pipol againstim olketa?

¹³ Staka taem nao Jesus talem olketa follower blo hem dat pipol bae againstim olketa, even olketa relative tu. (Matt. 5:11; 10:​22, 36) Gogo for end lo ministry blo Jesus, hem warnim olketa disaepol blo hem dat maet pipol bae killim olketa dae tu. (Matt. 24:9; John 15:20; 16:2) Hem encouragem olketa for mas careful taem olketa duim ministry. Hem advaesem olketa for no argue witim pipol wea againstim olketa, and for careful lo wat olketa talem and duim mekem olketa savve gohed for preach.

14. Hao nao iumi savve helpem Bible student for redi for wei wea pipol bae againstim hem? (2 Timothy 3:12)

¹⁴ Iumi savve helpem student for redi for wei wea pipol bae againstim hem taem iumi explainim lo hem samting wea maet hem expectim from olketa workmate, frens, and relative. (Readim 2 Timothy 3:12.) Samfala workmate maet mekfani lo Bible student abaotem olketa change wea hem mekem lo laef blo hem. Olketa narawan, even olketa klos relative, maet tok spoelem wat hem lanem from Bible. Taem iumi kwiktaem redyim olketa student blo iumi for deal witim wei wea pipol againstim olketa, bae olketa savve lo wat for duim taem datwan happen.

15. Hao nao iu savve helpem wanfala Bible student for deal witim wei wea famili againstim hem?

¹⁵ If famili member blo Bible student againstim hem, helpem hem for ting abaotem why nao olketa relative feel nogud lo hem. Olketa maet ting olketa Witness laea lo hem or tingse Olketa Jehovah’s Witness nogud pipol. Jesus tu mas deal witim wei wea olketa lo famili blo hem garem negative tingting abaotem hem. (Mark 3:21; John 7:5) Teachim Bible student blo iu for gohed patient and for tok kaen lo olketa narawan, includim olketa famili member tu.

16. Hao nao iumi savve helpem wanfala Bible student for storyim biliv blo hem lo kaenfala wei?

¹⁶ Taem olketa relative interest for savve abaotem wat Bible student lanem from Bible, hem gud for student no explainim evriting wantaem. Nogud datwan mekem olketa famili member konfius or feel nogud, and from datwan, bae olketa no interest for story abaotem Bible moa bihaen. So encouragem Bible student for storyim biliv blo hem lo wanfala wei wea bae helpem hem for story moa narataem. (Col. 4:6) Maet student savve invaetem olketa relative for go lo jw.org. Diswan bae mekem olketa for lanem samfala samting moa abaotem Olketa Jehovah’s Witness lo own taem blo olketa.

17. Hao nao iu savve trainim Bible student for ansarem olketa kwestin wea pipol maet askem abaotem Olketa Jehovah’s Witness? (Lukim tu piksa.)

¹⁷ Iu savve iusim disfala series lo jw.org, “Olketa Kwestin wea Staka Pipol Askem” for helpem Bible student for redyim olketa simpol ansa for olketa kwestin wea olketa relative or workmate maet askem. (2 Tim. 2:​24, 25) Lo end blo each leson, reviewim datfala sekson “Samfala Pipol Savve Talem” lo Enjoyim Laef for Olowe! buk. Helpem Bible student blo iu taem iutufala practicem hao for hem explainim biliv blo hem. No hol bak for givim hem samfala idea lo hao hem savve impruvim story blo hem. Taem iutufala practice olsem, datwan bae helpem hem for confident for defendim faith blo hem.

18. Hao nao iu savve encouragem wanfala Bible student for kamap wanfala anbaptaes pablisa? (Matthew 10:27)

¹⁸ Jesus encouragem olketa disaepol blo hem for preachim gud nius lo olketa pipol. (Readim Matthew 10:27.) Dastawe hem gud for Bible student no weit longtaem tumas bifor hem preach witim kongregeson, bikos bae hem lukim hao Jehovah helpem hem and bae hem depend go moa lo Jehovah. Hao nao iu savve helpem wanfala Bible student for mekem diswan kamap goal blo hem? Taem olketa announcem wanfala preaching campaign lo kongregeson, encouragem Bible student for ting abaotem wat hem savve duim for qualify for kamap wanfala anbaptaes pablisa. Explainim lo hem why staka faendem hem isi for start preach during lo olketa campaign olsem. Hem gud tu for hem markem goal for joinim skul lo olketa midol week meeting blo iumi for kasem training. Taem hem duim olsem, datwan bae helpem hem for no fraet for storyim biliv blo hem.

SHOWIM IU TRUSTIM BIBLE STUDENT BLO IU

19. Wat nao Jesus duim wea showim hem trustim olketa disaepol blo hem, and hao nao iumi savve followim example blo hem?

¹⁹ Bifor Jesus go bak lo heven, hem talem olketa disaepol blo hem dat bae olketa stap tugeta moa. Bat, olketa no minim hao Jesus storyim dat olketa tu bae go lo heven. Nomata olsem, Jesus hem focus lo wei wea olketa loyal for followim hem, no lo wei wea olketa no minim samfala samting. (John 14:​1-5, 8) Hem savve olketa needim taem for minim samfala samting, olsem disfala hope for go lo heven. (John 16:12) Iumi tu savve showim lo olketa Bible student blo iumi dat iumi sure olketa laek for duim samting for mekem Jehovah hapi.

20. Hao nao wanfala sista lo Malawi showim hem trustim Bible student blo hem?

²⁰ Iumi gohed trustim dat Bible student blo iumi laek for duim stret samting. For example, tingim Chifundo, wanfala sista lo Malawi. Hem startim wanfala Bible study lo Enjoyim Laef for Olowe! buk witim wanfala young Catholic woman wea nem blo hem Alinafe. Taem tufala finisim leson 14, Chifundo askem Alinafe abaotem tingting blo hem lo wei for iusim olketa image lo worship. Alinafe feel nogud lo datwan and sei, “Datwan hem disison blo miseleva!” Taem olsem, Chifundo tingse bae tufala stop for study nao. Bat, hem gohed patient for study witim Alinafe, hem trustim dat gogo Alinafe bae minim dat wei for iusim image lo worship hem no stret. Samfala month bihaen, Chifundo askem Alinafe datfala kwestin lo leson 34 wea sei: “Wat nao samfala gud samting wea iu kasem taem iu studyim Bible and lane abaotem tru God, Jehovah?” Chifundo storyim wat Alinafe talem, hem sei: “Alinafe storyim staka naes point, wanfala nao hem wei wea olketa Witness no duim eni samting wea Bible stopem.” No longtaem bihaen, Alinafe stop nao for iusim olketa image and hem qualify for baptaes.

21. Hao nao iumi savve helpem wanfala Bible student for disaed strong for servem Jehovah?

²¹ Nomata Jehovah nao man wea “mekem [samting] for grow,” iumi garem waka for helpem Bible student for gohed gud lo spiritual wei. (1 Cor. 3:7) Iumi no teachim hem nomoa abaotem wat God laekem hem for duim. Bat iumi helpem student for strongim love blo hem for Jehovah. Iumi encouragem hem tu for showim datfala love taem hem adjustim samfala samting mekem Jehovah kamap first lo laef blo hem. And helpem hem lo hao for depend lo Jehovah taem hem feisim olketa challenge. Taem iumi showim iumi trustim hem, datwan helpem hem for barava sure dat hem savve gohed faithful for followim olketa standard blo Jehovah and disaed strong for servem Jehovah.