Wat Iumi Lanem From Profesi wea Jacob Talem Bifor Hem Dae—Part 2

1. Wat nao bae iumi storyim lo disfala article?

EVRI son blo Jacob hipap raonem hem, and barava lisin gud taem hem gohed blessim each wan lo olketa. Olsem iumi storyim lo last article, maet evriwan sapraes and interest for herem wat Jacob talem for Reuben, Simeon, Levi, and Judah. So olketa maet wonder, ‘Wat moa Jacob bae talem for nara eitfala son blo hem? Distaem bae iumi storyim wat iumi savve lanem from olketa toktok blo hem for Zebulun, Issachar, Dan, Gad, Asher, Naphtali, Joseph, and Benjamin.a

ZEBULUN

2. Storyim blessing blo Zebulun and hao datwan hem fulfill. (Genesis 49:13) (Lukim tu box.)

² Readim Genesis 49:13. Jacob storyim hao tribe blo Zebulun bae stap klosap lo saedsea, lo north blo Promis Land. Winim 200 years bihaen, tribe blo Zebulun inheritim land blo olketa. Datfala land hem stap between Sea blo Galilee and Mediterranean Sea. Moses hem profesi olsem: “O Zebulun, taem iu go aot, iu hapi.” (Deut. 33:18) Diswan maet minim dat tribe blo Zebulun bae isi for duim bisnis bikos olketa stap lo ples wea hem isi for kasem saedsea. Nomata wat nao maet diswan minim, tribe blo Zebulun garem reason for hapi.

3. Wat nao savve helpem iumi for satisfae lo wat iumi garem?

³ Wat nao iumi savve lanem? Nomata wea nao iumi stap or wat nao situation blo iumi, iumi garem olketa reason for hapi. For gohed hapi, iumi mas satisfae witim wat iumi garem. (Ps. 16:6; 24:5) Samfala taem hem isi for iumi focus lo wat iumi no garem, winim for focus lo olketa gud samting wea iumi garem finis. So trae for garem positive tingting abaotem situation blo iu.—Gal. 6:4.

ISSACHAR

4. Storyim blessing blo Issachar and hao datwan hem fulfill. (Genesis 49:​14, 15) (Lukim tu box.)

⁴ Readim Genesis 49:​14, 15. Jacob praisem Issachar bikos hem man for waka hard, taem hem comparem hem witim wanfala strong donkey wea savve karem hevi load. Jacob talem tu hao Issachar bae garem land wea hem naes tumas. Toktok blo Jacob hem fulfill taem tribe blo Issachar inheritim land wea stap saed lo Jordan River wea garem gud graon. (Josh. 19:22) For sure olketa waka hard for cultivatim land blo olketa, bat olketa waka hard tu for helpem olketa narawan. (1 Ki. 4:​7, 17) For example, tribe blo Issachar willing for helpem olketa nara tribe blo Israel for faet, olsem lo datfala taem wea Judge Barak and profet Deborah ask for help.—Judg. 5:15

5. Why nao iumi shud traem best for waka hard?

⁵ Wat nao iumi savve lanem? Jehovah tinghae lo hard waka blo iumi lo service blo hem, olsem hao hem tinghae lo hard waka blo olketa lo tribe blo Issachar. (Eccl. 2:24) For example, tingim olketa brata wea waka hard for lukaftarem kongregeson. (1 Tim. 3:1) Olketa brata hia no join insaed wanfala real faet, bat olketa waka hard for protectim pipol blo God from olketa spiritual danger. (1 Cor. 5:​1, 5; Jude 17-23) Olketa waka hard tu for preparem and givim olketa encouraging tok wea bae strongim kongregeson.—1 Tim. 5:17.

DAN

6. Wat nao assignment wea tribe blo Dan kasem? (Genesis 49:​17, 18) (Lukim tu box.)

⁶ Readim Genesis 49:​17, 18. Jacob sei Dan hem olsem wanfala snek wea no fraet for feisim olketa enemy nomata olketa big winim hem, olsem wanfala horse and man wea raedem. Dastawe, olketa enemy blo Israel fit for fraetem Dan. Taem olketa gogo for Promis Land, tribe blo Dan nao kam bihaen lo full nation blo Israel for protectim olketa. (Num. 10:25) Nomata full nation blo Israel no lukim evriting wea tribe blo Dan duim, datwan hem wanfala important assignment.

7. Hao nao iumi shud ting lo eni assignment wea iumi duim for Jehovah?

⁷ Wat nao iumi savve lanem? Hao, enitaem iu duim wanfala assignment wea maet olketa narawan no lukim wat iu duim? Maet iu help for duim klining and maintenance lo Kingdom Hall, volunteer lo assembly or convention, or duim eni nara assignment. Sapos olsem, datwan hem barava gud! No forgetim dat Jehovah hem lukim and tinghae lo evri samting iu duim for hem. Jehovah barava appreciatim wat iu duim, especially taem iu duim datwan bikos iu barava lovem hem, and no bikos iu laek for kasem praise from olketa narawan.—Matt. 6:​1-4.

GAD

8. Why nao hem isi nomoa for olketa enemy attakim tribe blo Gad lo Promis Land? (Genesis 49:19) (Lukim tu box.)

⁸ Readim Genesis 49:19. Jacob talem profesi dat olketa grup for steal bae attakim Gad. Winim 200 years bihaen, tribe blo Gad inheritim land lo east saed lo Jordan River, and olketa enemy nao stap lo border blo datfala land. From datwan, hem isi tumas for enemy attakim olketa. Nomata olsem, tribe blo Gad laek for stap lo there bikos hem garem big area for olketa animal blo olketa. (Num. 32:​1, 5) Luk olsem, pipol lo tribe blo Gad olketa brave. Bat winim datwan, olketa trustim dat Jehovah bae helpem olketa for protectim datfala land wea God givim olketa, from eni grup for steal. Olketa even sendem tu army blo olketa for go stap kam for staka year for helpem olketa nara tribe for tekovarem olketa ples blo Promis Land lo west saed blo Jordan River. (Num. 32:​16-19) And olketa trustim dat Jehovah bae protectim olketa waef and pikinini blo olketa taem olketa go faet. From olketa no fraet and willing for sakrifaesim samfala samting, Jehovah blessim olketa.—Josh. 22:​1-4.

9. Hao nao wei for trustim Jehovah hem affectim olketa disison blo iumi?

⁹ Wat nao iumi savve lanem? For gohed servem Jehovah nomata iumi feisim olketa challenge, iumi mas gohed for trustim hem. (Ps. 37:3) Staka distaem showimaot olketa trustim Jehovah taem olketa willing for mekem olketa sakrifaes for sapotim olketa theocratic construction project, serve lo olketa ples wea garem need, or for duim olketa nara assignment. Olketa duim datwan bikos olketa barava trustim dat Jehovah bae evritaem kea for olketa.—Ps. 23:1.

ASHER

10. Wat nao tribe blo Asher fail for duim? (Genesis 49:20) (Lukim tu box.)

¹⁰ Readim Genesis 49:20. Jacob profesi dat tribe blo Asher bae kamap rich, and hem nao samting wea happen. Land wea tribe blo Asher inheritim garem gud graon winim eni nara land lo Israel. (Deut. 33:24) And tu, border blo datfala land hem Mediterranean Sea and hem includim datfala rich taon blo Sidon wea hem main port blo olketa for duim bisnis lo Phoenicia. Bat, tribe blo Asher fail for duim samting for aotem olketa Canaanite from datfala land. (Judg. 1:​31, 32) So nogud influence blo olketa Canaanite hia and wei wea tribe blo Asher kamap rich maet mekem olketa for no strong for sapotim klin worship. Taem Judge Barak askem olketa nara tribe blo Israel for volunteer for faetem Canaanite army, tribe blo Asher no willing for help. From datwan, datfala tribe miss aot for lukim hao Jehovah helpem olketa nara tribe for win “lo saed blo olketa wata lo Megiddo.” (Judg. 5:​19-21) Masbi, tribe blo Asher feel shame taem olketa herem Barak and Deborah singim wanfala song wea garem olketa toktok hia insaed: “Asher sidaon nating nomoa lo saedsea.”—Judg. 5:17.

11. Why nao iumi need for keepim balance tingting abaotem olketa material samting?

¹¹ Wat nao iumi savve lanem? Iumi laek for givim best blo iumi for Jehovah. For duim datwan, iumi mas rejectim hao disfala world ting lo olketa material samting. (Prov. 18:11) Iumi mas waka hard for keepim balance tingting abaotem selen. (Eccl. 7:12; Heb. 13:5) Iumi no letem wei for aftarem olketa material samting wea no important for mekem iumi hol bak for duim moa samting for Jehovah. Bat, iumi givim best blo iumi for Jehovah distaem lo wei for iusim taem and strong blo iumi for hem, bikos iumi savve Jehovah bae provaedem barava gud laef for iumi lo future.—Ps. 4:8.

NAPHTALI

12. Hao nao maet profesi wea Jacob talem for Naphtali kamap tru? (Genesis 49:21) (Lukim tu box.)

¹² Readim Genesis 49:21. Jacob talem profesi hao “toktok blo [Naphtali] here naes tumas.” Diswan maet piksarem hao Jesus hem story during lo ministry blo hem. Jesus hem savve tumas for teach, and hem chusim Capernaum, wea hem lo land blo Naphtali for kamap “taon wea hem stap lo hem.” (Matt. 4:13; 9:1; John 7:46) Isaiah profesi olsem abaotem Jesus, pipol blo Zebulun and Naphtali bae lukim “wanfala braet laet.” (Isa. 9:​1, 2) Jesus nao “datfala tru laet wea givim laet for evri difren kaen pipol,” hem duim diswan thru lo teaching blo hem.—John 1:9.

13. Hao nao iumi savve mek sure wat iumi talem hem here naes lo Jehovah?

¹³ Wat nao iumi savve lanem? Wat iumi talem and hao iumi talem datwan hem important lo Jehovah. Hao nao iumi savve talem ‘toktok wea here naes tumas’ lo Jehovah? Wanfala wei hem for iumi tok tru evritaem. (Ps. 15:​1, 2) And tu, iumi savve encouragem olketa narawan lo wei for talem gud samting lo olketa and no kwiktaem for criticize or komplen. (Eph. 4:29) And tu, iumi laek for garem goal for kamap moa skillful lo hao for startim story wea savve lead go lo wei for witness lo samwan.

JOSEPH

14. Explainim hao profesi abaotem Joseph hem fulfill. (Genesis 49:​22, 26) (Lukim tu box.)

¹⁴ Readim Genesis 49:​22, 26. Masbi Jacob hem praod lo son blo hem Joseph, bikos Jehovah “chusim hem from olketa brata blo hem.” Jacob sei Joseph hem “olsem branch blo wanfala tree wea garem staka frut.” Jacob nao datfala tree and Joseph nao branch blo datfala tree. Joseph hem firstborn son blo beloved waef blo Jacob, Rachel. Jacob talem profesi hao Joseph nao bae kasem dabol blessing wea hem raet blo firstborn, bikos Reuben wea hem firstborn son blo Leah hem lusim datfala raet. (Gen. 48:​5, 6; 1 Chron. 5:​1, 2) Datfala profesi fulfill taem tufala son blo Joseph, Ephraim and Manasseh, kamap tufala tribe wea inheritim tufala separate land.—Gen. 49:25; Josh. 14:4.

15. Wat nao Joseph duim taem olketa brata blo hem treatim hem nogud?

¹⁵ Jacob storyim tu hao “olketa man wea iusim bow and arrow heitim [Joseph], gohed againstim hem, and sutim hem.” (Gen. 49:23) “Olketa man” hia hem minim olketa brata blo Joseph wea jealous lo hem, treatim hem nogud, and mekem hem safa. Nomata olsem, Joseph no letem datwan for mekem hem gohed feel nogud lo olketa brata blo hem or lo Jehovah. Olsem Jacob talem: “Bow blo [Joseph] stanbae and tufala hand blo hem strong and kwiktaem for sut.” (Gen. 49:24) Lo olketa hard taem wea Joseph feisim, hem depend lo Jehovah, and hem no just forgivim olketa brata blo hem bat hem kaen tu lo olketa. (Gen. 47:​11, 12) Olketa hard taem wea Joseph kasem, trainim hem for kamap wanfala beta person. (Ps. 105:​17-19) From datwan, Jehovah fit for iusim hem lo spesol wei.

16. Hao nao iumi savve followim example blo Joseph taem iumi deal witim hard taem?

¹⁶ Wat nao iumi savve lanem? Iumi no letem olketa hard taem wea iumi kasem for mekem iumi no klos lo Jehovah and olketa brata and sista. Remember, Jehovah savve letem faith blo iumi kasem test wea datwan hem for trainim iumi. (Heb. 12:​7, ftn.) Disfala training savve helpem iumi for garem and impruvim olketa Christian quality, olsem mercy and wei for forgive. (Heb. 12:11) Taem iumi no givap, Jehovah bae rewardim iumi olsem hao hem duim lo Joseph.

BENJAMIN

17. Hao nao profesi abaotem Benjamin hem fulfill? (Genesis 49:27) (Lukim tu box.)

¹⁷ Readim Genesis 49:27. Jacob talem profesi dat olketa lo tribe blo Benjamin bae savve tumas for faet olsem wolf. (Judg. 20:​15, 16; 1 Chron. 12:2) Disfala toktok “lo morning” hem minim wei wea first king blo Israel hem kam from tribe blo Benjamin, wea hem nao King Saul. Hem wanfala man wea no fraet for faet againstim olketa Philistine. (1 Sam. 9:​15-17, 21) Datfala toktok “lo evening” hem minim hao Queen Esther and Prime Minister Mordecai, wea tufala evriwan from tribe blo Benjamin, sevem olketa Israelite taem gavman blo Persia laek killim olketa dae.—Esther 2:​5-7; 8:3; 10:3.

18. Hao nao iumi savve followim example blo tribe blo Benjamin for gohed loyal for sapotim arrangement blo Jehovah?

¹⁸ Wat nao iumi savve lanem? For sure, olketa lo tribe blo Benjamin hapi for lukim wanfala from tribe blo olketa hem kamap king wea fulfillim datfala profesi. Bat taem Jehovah givim go wei for rul lo David wea hem from tribe blo Judah, olketa lo tribe blo Benjamin sapotim nao datfala arrangement. (2 Sam. 3:​17-19) Staka year bihaen, taem olketa nara tribe againstim tribe blo Judah, tribe blo Benjamin gohed loyal for sapotim Judah and king wea Jehovah markem. (1 Ki. 11:​31, 32; 12:​19, 21) Iumi tu laek for gohed loyal for sapotim olketa wea Jehovah markem for leadim pipol blo hem distaem.—1 Thess. 5:12.

19. Wat nao iumi savve lanem from profesi wea Jacob talem bifor hem dae?

¹⁹ Iumi lanem staka samting from datfala profesi wea Jacob talem bifor hem dae. Taem iumi storyim hao disfala profesi hem fulfill, hem strongim faith blo iumi hao evritaem olketa profesi blo Jehovah hem kamap tru. And taem iumi storyim olketa blessing wea olketa son blo Jacob kasem, datwan helpem iumi for luksavve wat iumi savve duim for mekem Jehovah hapi lo iumi.