Wat Iumi Lanem From Profesi wea Jacob Talem Bifor Hem Dae—Part 1

1-2. Wat nao Jacob duim bifor hem dae, and why nao olsem? (Lukim tu piksa .)

SAMTING olsem 17 years bihaen Jacob, datfala faithful servant blo Jehovah, hem lusim Canaan witim full famili blo hem and go stap lo Egypt, hem arrangem wanfala famili meeting. (Gen. 47:28) During datfala 17 years, hem barava hapi bikos hem lukim moa beloved son blo hem Joseph and hem lukim hao full famili blo hem stap tugeta moa. Bat, Jacob feel olsem hem klosap for dae. So dastawe, hem arrangem datfala important famili meeting.—Gen. 49:28.

² Hem wei blo pipol lo datfala taem, for famili hed wea klosap dae for mas kolem kam evri famili member for herem olketa last instruction from hem. (Isa. 38:1) Maet lo datfala taem tu hem talem hu nao bae kamap next famili hed bihaen hem dae.

3. Olsem Genesis 49:​1, 2 storyim, why nao olketa toktok wea Jacob talem hem important?

³ Readim Genesis 49:​1, 2. Bat disfala famili meeting hem spesol bikos Jacob hem wanfala profet. During disfala meeting, Jehovah muvim servant blo hem Jacob, for storyim samfala important samting wea bae affectim olketa lo famili laen blo hem lo future. So olketa last toktok wea Jacob talem for olketa son blo hem bifor hem dae, hem olketa profesi.

4. Wat nao samfala samting wea iumi shud tingim taem iumi story raonem profesi wea Jacob talem bifor hem dae? (Lukim tu box “Famili blo Jacob.”)

⁴ Lo disfala article, bae iumi storyim wat Jacob talem for fofala son blo hem: Reuben, Simeon, Levi, and Judah. Lo next article, bae iumi storyim wat Jacob talem for nara eitfala son blo hem. Bae iumi lanem hao Jacob no just story for olketa son blo hem nomoa, bat for olketa tribe blo olketa tu, wea bihaen olketa kamap nation blo Israel. Bae iumi lukim hao history blo datfala nation showimaot hao profesi blo Jacob hem kamap tru. And taem iumi story raonem wat Jacob talem, bae iumi lanem olketa important leson wea savve helpem iumi for mekem Dadi blo iumi lo heven, Jehovah hapi.

REUBEN

5. Wat nao olketa privilege wea Reuben maet expect for kasem from dadi blo hem?

⁵ First, Jacob story for Reuben, hem sei: “Iu nao firstborn blo mi.” (Gen. 49:3) From Reuben hem firstborn, luk olsem hem expectim for kasem dabol share lo evriting wea dadi blo hem ownim. Maet hem expectim tu dat hem nao bae kamap hed lo famili bihaen dadi blo hem dae, and for datfala privilege pas go lo olketa pikinini blo hem.

6. Why nao Reuben lusim privilege for garem raet olsem firstborn? (Genesis 49:​3, 4)

⁶ Bat, Reuben lusim datfala privilege for garem raet olsem firstborn. (1 Chron. 5:1) Why nao olsem? Bikos bihaen Rachel hem dae, Reuben hem durong witim Bilhah wea hem concubine blo Jacob. Bilhah hem servant gele blo beloved waef blo Jacob, Rachel. (Gen. 35:​19, 22) Reuben hem son blo nara waef blo Jacob, Leah. Maet Reuben kavetem Bilhah and no kontrolem feeling blo hem. Or maet Reuben durong witim Bilhah for mekem Jacob les lo Bilhah and lovem Leah, mami blo hem. Nomata wat nao reason blo hem, samting Reuben duim mekem Jehovah and dadi blo hem for barava no hapi.—Readim Genesis 49:​3, 4.

7. Wat nao happen lo Reuben and famili laen blo hem? (Lukim tu box “Profesi wea Jacob Talem Bifor Hem Dae.”)

⁷ Jacob talem Reuben: “Iu bae no winim olketa brata blo iu.” Olketa toktok hia kamap tru. No eni record lo Bible showim dat eniwan lo tribe blo Reuben hem kamap wanfala king, priest, or profet. Nomata olsem, Jacob no rejectim son blo hem, and famili laen blo Reuben kamap wanfala tribe lo Israel. (Josh. 12:6) Lo samfala nara situation, Reuben showimaot hem garem olketa gud wei, and luk olsem no eni nara taem moa Reuben hem durong.—Gen. 37:​20-22; 42:37.

8. Wat nao olketa leson wea iumi lanem from example blo Reuben?

⁸ Wat nao iumi savve lanem? Iumi need for waka hard for garem wei for kontrolem seleva and for rejectim wei for durong. If enitaem iumi kasem temptation for duim wanfala sin, iumi shud stop and ting abaotem hao nao datwan bae affectim Jehovah, famili blo iumi, and olketa narawan. Iumi shud remember dat “eni samting wea man plantim, datwan tu bae hem harvestim.” (Gal. 6:7) Bat iumi lanem nara samting tu, wat happen lo Reuben hem remindim iumi hao Jehovah savve showimaot mercy. Nomata iumi maet safa from nogud samting wea kamaot from mistek blo iumi, Jehovah bae blessim wei wea iumi waka hard for duim stret samting.

SIMEON AND LEVI

9. Why nao Jacob tok strong lo Simeon and Levi? (Genesis 49:​5-7)

⁹ Readim Genesis 49:​5-7. Next, Jacob story for Simeon and Levi, and hem tok strong lo tufala from hem no hapi lo tufala. Wanfala Canaanite man, wea nem blo Shechem hem reipim Dinah, dota blo Jacob. Evri son blo Jacob barava feel nogud lo wat hem happen lo sista blo olketa, and iumi minim why olketa feel olsem. Bat Simeon and Levi no kontrolem kros blo tufala. So tufala laea and sei if olketa man blo Shechem agree for circumcise then olketa bae mek peace witim olketa. And olketa man hia agree. Bat taem olketa man hia still feel pain from olketa circumcise, Simeon and Levi “tekem sword blo tufala and . . . go lo datfala taon and killim dae evri male.”—Gen. 34:​25-29.

10. Hao nao profesi blo Jacob abaotem Simeon and Levi hem fulfill? (Lukim tu box “Profesi wea Jacob Talem Bifor Hem Dae.”)

¹⁰ Jacob barava feel nogud bikos tufala son blo hem raf and killim dae staka pipol. Hem talem profesi abaotem hao olketa lo tribe blo tufala bae no garem wanfala land for tribe blo olketa. Bat olketa bae stap nomoa lo olketa difren ples evriwea lo Israel. Winim 200 years bihaen, datfala profesi kamap tru taem nation blo Israel go insaed lo Promis Land. Inheritance wea tribe blo Simeon kasem hem samfala taon and land nomoa insaed lo territory lo tribe blo Judah. (Josh. 19:1) Tribe blo Levi hem inheritim 48 taon lo olketa difren ples evriwea lo Israel.—Josh. 21:41.

11. Wat nao olketa gud samting wea tribe blo Simeon and Levi duim?

¹¹ Olketa lo tribe blo Simeon and Levi no duim olketa sem mistek olsem tufala. Olketa lo tribe blo Levi barava loyal for sapotim pure worship. Taem Moses go ap lo Maunt Sinai for kasem Law from Jehovah, staka Israelite join insaed wei for worshipim idol blo wanfala young buluka, bat olketa Levite sapotim Moses for distroem evriwan wea worshipim datfala idol. (Ex. 32:​26-29) Jehovah chusim tribe blo Levi for kasem wanfala spesol privilege, wea hem nao for samfala lo olketa serve olsem olketa priest. (Ex. 40:​12-15; Num. 3:​11, 12) Bihaen, taem olketa Israelite tekovarem Promis Land, olketa lo tribe blo Simeon joinim olketa blo Judah for go faet, wea datwan sapotim purpose blo Jehovah.—Judg. 1:​3, 17.

12. Wat nao iumi savve lanem from example blo Simeon and Levi?

¹² Wat nao iumi savve lanem? No letem kros affectim olketa disison blo iu and wat iu duim. If samwan treatim iu nogud or treatim nogud lo samwan wea iu lovem, hem normal for feel nogud. (Ps. 4:4) Nomata olsem, Jehovah bae no hapi lo wat iumi talem or duim lo samwan wea mekem iumi feel nogud, bikos iumi kros. (Jas. 1:20) Iumi savve avoidim olketa nogud samting wea kamaot from wei for no kontrolem kros, taem iumi followim olketa Bible principle for deal witim injustice insaed or aotsaed lo kongregeson. (Rom. 12:​17, 19; 1 Pet. 3:9) Even if parents blo iu duim samting wea Jehovah no hapi lo hem, iu no need for followim bad example blo olketa. No tingse iu nogud and iu no fit nao for kasem blessing blo Jehovah. Jehovah bae helpem iu for duim stret samting and bae hem rewardim iu for datwan.

JUDAH

13. Why nao maet Judah hem wari lelebet taem Jacob redi for story witim hem?

¹³ Judah nao hem next son wea dadi blo hem story witim. Wat Jacob talem for olketa older brata blo Judah, maet mekem Judah wari lelebet bikos hem tu duim samfala serious mistek. Luk olsem Judah tu share insaed lo wei for tekem olketa tings blo pipol lo Shechem. (Gen. 34:27) Hem join witim olketa brata blo hem for salem Joseph for kamap slave and for laea lo dadi blo olketa abaotem datwan. (Gen. 37:​31-33) And tu, hem duim sex witim dota-in-law blo hem Tamar, bikos hem tingse hem wanfala prostitute.—Gen. 38:​15-18.

14. Wat nao samfala gud samting wea Judah duim? (Genesis 49:​8, 9)

¹⁴ Bat instead, holy spirit muvim Jacob for praisem Judah and blessim hem. (Readim Genesis 49:​8, 9.) Judah hem duim samting wea showimaot hem tingim tumas feeling blo dadi blo hem wea olo. And tu, hem showim dat hem kea for youngest brata blo hem, Benjamin.—Gen. 44:​18, 30-34.

15. Hao nao profesi abaotem Judah hem fulfill?

¹⁵ Jacob talem profesi hao Judah bae kamap leader for olketa brata blo hem. Bat, hem tek lelebet longtaem bifor datfala profesi hem fulfill. Firstaem wea Bible storyim Judah hem lead, hem taem olketa Israelite lusim Egypt, wea hem samting olsem 200 years bihaen Jacob talem datfala profesi. Lo datfala taem, tribe blo Judah leadim nation blo Israel go thru lo wilderness for go insaed Promis Land. (Num. 10:14) Staka year bihaen, tribe blo Judah hem lead tu taem olketa tekovarem Promis Land. (Judg. 1:​1, 2) And David, wea hem blo tribe blo Judah, hem kamap first king lo longfala laen blo olketa king wea kam from datfala tribe. Bat profesi abaotem Judah hem fulfill lo nara wei tu.

16. Hao nao profesi wea stap lo Genesis 49:10 hem fulfill? (Lukim tu box “Profesi wea Jacob Talem Bifor Hem Dae.”)

¹⁶ Jacob storyim hao Ruler wea bae rul ovarem olketa man for olowe, bae hem kam from laen blo Judah. (Readim Genesis 49:10 and footnote.) Datfala Ruler hem Jesus Christ, wea Jacob kolem lo Shiloh. Wanfala angel sei olsem abaotem Jesus: “Jehovah God bae givim hem throne blo dadi blo hem David.” (Luke 1:​32, 33) And tu, Bible kolem Jesus “datfala Lion from tribe blo Judah.”—Rev. 5:5.

17. Hao nao iumi savve followim example blo Jehovah lo hao iumi ting lo olketa narawan?

¹⁷ Wat nao iumi savve lanem? Jehovah blessim Judah nomata hem mekem samfala serious mistek bifor. Bat, maet olketa brata blo Judah wonder, ‘Wat nao Jehovah lukim lo Judah?’ Iumi no savve if olketa ting olsem, bat Jehovah lukim gud samting lo Judah, dastawe hem blessim hem. Hao nao iumi savve followim example blo Jehovah? Taem wanfala brata or sista kasem wanfala spesol privilege, maet iumi focus nomoa lo olketa wik point blo datfala person. Bat hem gud for iumi tingim hao Jehovah hem hapi lo olketa gud quality blo hem. Jehovah focus lo gud samting wea olketa worshiper blo hem duim. Iumi tu laek for duim sem samting.

18. Why nao iumi need for patient?

¹⁸ Nara samting wea iumi savve lanem from wat hem happen lo Judah, hem nao for patient. Jehovah evritaem fulfillim olketa promis blo hem, bat hem no evritaem fulfillim lo wei or taem wea iumi expectim. Lo firstaem, no eniwan lo tribe blo Judah kamap leader lo pipol blo God. Nomata olsem, olketa loyal for sapotim olketa wea Jehovah appointim for kamap leader, olsem Moses from tribe blo Levi, Joshua from tribe blo Ephraim, or King Saul from tribe blo Benjamin. Iumi tu laek for sapotim eniwan wea Jehovah chusim for lead distaem.—Heb. 6:12.

19. Wat nao iumi lanem abaotem Jehovah from disfala profesi wea Jacob talem bifor hem dae?

¹⁹ Wat nao iumi lanem kam lo disfala article abaotem profesi wea Jacob talem bifor hem dae? Iumi lanem, “hao man lukim samting hem difren from hao God lukim samting.” (1 Sam. 16:7) Jehovah hem barava patient and hem savve forgive. Hem no acceptim wei for duim samting wea no stret. Nomata olsem, hem no expectim olketa wea worshipim hem for duim samting lo perfect wei. Hem even savve blessim samwan wea bin duim serious mistek, if olketa showimaot olketa barava repent and duim stret samting. Lo next article, iumi bae storyim wat Jacob talem lo nara eitfala son blo hem.