Olketa Reference for Laef and Ministry Meeting Buk
© 2024 Watch Tower Bible and Tract Society of Pennsylvania
JANUARY 6-12
GUD SAMTING FROM BIBLE PSALMS 127-134
Parents—Gohed for Lukaftarem Gud Spesol Present blo Iu
Iumi Hapi From Iumi Insaed lo Famili blo Jehovah
9 Jehovah wakem pipol for garem pikinini, and parents shud teachim pikinini for lovem and worshipim Jehovah. Sapos iu dadi or mami, waswe, iu tinghae lo disfala present from Jehovah for garem pikinini? Jehovah givim olketa angel staka gud samting, bat olketa no savve garem pikinini. So olketa dadi and mami shud tinghae lo privilege for garem pikinini. And tu, parents shud “stretem and trainim [pikinini] followim samting wea Jehovah talem.” (Eph. 6:4; Diutronomi 6:5-7; Sams 127:3) For helpem parents for duim datwan, organization blo Jehovah provaedem olketa Bible pablikeson, video, olketa song, and olketa nara samting lo website. Datwan showimaot Jehovah and Jesus barava lovem olketa pikinini. (Luke 18:15-17) Jehovah hapi taem parents followim direction blo hem and lukaftarem gud olketa pikinini. Taem parents duim datwan, pikinini tu bae garem chance for insaed famili blo Jehovah for olowe!
Parents—Trainim Pikinini blo Iu for Lovem Jehovah
20 Savve gud lo pikinini blo iu. Sams 127 comparem olketa pikinini witim olketa arrow. (Readim Sams 127:4.) Olsem olketa arrow wea olketa wakem from olketa difren kaen material and garem olketa didifren size, evri pikinini no semsem. So parents need for luksavve hao nao for trainim each pikinini. Wanfala couple lo Israel distaem, wea teachim gud tufala pikinini blo tufala for servem Jehovah, storyim samting wea helpem tufala, “Mitufala conductim Bible study witim each pikinini.” Each hed lo famili nao bae disaed sapos diskaen wei for study hem fitim situation blo olketa or nomoa.
Faendem Gudfala Point
it-1-E 543
Olketa Plant lo Bible
Man wea raetem Bible buk blo Psalm storyim samfala part blo olive tree taem hem talem disfala promis for olketa wea fraet lo Jehovah: “Olketa son blo iu bae olsem olketa niu sut blo olive tree raonem tebol blo iu.” (Ps 128:1-3) Staka taem olketa savve iusim wanfala part or, smol branch, wea olketa katemaot from wanfala olive tree for mekem wanfala niu tree hem grow. And tu, olketa mature olive tree savve garem olketa niu sut wea grow kamaot from rut blo olketa, wea datwan savve mekem olketa tree hia for gohed grow. Olsem olketa niu sut hia, olketa son bae stap witim dadi blo olketa, and duim part blo olketa for mekem famili hapi.
JANUARY 13-19
GUD SAMTING FROM BIBLE PSALMS 135-137
“Lord blo Iumi Hem Barava Hae Winim Evri Nara God”
it-2-E 661 ¶4-5
Paoa, Paoaful Samting wea Hem Duim
Hao God Kontrolem Nature Hem Barava Spesol. For pruvim dat Jehovah nao hem tru God, hem mek sense nomoa for hem duim samting for kontrolem evri samting saed lo nature, and for duim datwan lo wei wea bae join witim nem blo hem. (Ps 135:5, 6) From sun, moon, olketa planet, and olketa star followim taem blo olketa, from condition lo atmosphere blo earth (wea producem wind, rain, and olketa nara samting) followim taem blo olketa, and from olketa grashopa savve hipap tugeta and olketa bird savve migrate, olketa samting hia and olketa nara samting saed lo nature no fit for mekhae lo nem blo God lo taem wea persecution and false worship kamap.
Nomata olsem, Jehovah God savve kosim olketa samting lo creation and nature for pruvim hem tru God, taem hem bae iusim olketa for duim samting wea olketa no duim olowe, and staka taem datwan savve happen lo taem wea hem markem. Nomata olketa samting olsem drae season, big rain, or olketa nara weather condition hem normal samting wea savve happen, taem olketa happen for fulfillim profesi blo Jehovah, datwan mekem olketa spesol. (Comparem 1Ki 17:1; 18:1, 2, 41-45.) Staka taem, hao olketa samting hia happen hem paoaful tu, maet bikos hem big or strong tumas (Ex 9:24) or bikos hem happen lo wei wea hem no happen evritaem, no happen bifor, or happen lo wei or taem wea hem shud no happen.—Ex 34:10; 1Sa 12:16-18.
Wanem Nao Iumi Kasem From Strongfala Love blo Jehovah?
16 From iumi savve Jehovah hem sef ples blo iumi datwan strongim iumi. Bat maet iumi faendem hard for deal witim laef samfala taem. Hao nao bae Jehovah helpem iumi lo taem olsem? (Readim Psalm 136:23) Jehovah bae ‘holem iumi lo hand blo hem’ olsem Moses storyim, for helpem iumi getap taem iumi foldaon. (Sams 28:9; 94:18) Gud samting iumi kasem: Iumi savve Jehovah laek for protectim iumi and diswan helpem iumi lo tufala wei. First wan, nomata wea iumi stap Jehovah hem olsem sef ples blo iumi. Mek-tu, iumi sure Jehovah lovem iumi tumas.
Faendem Gudfala Point
it-1-E 1248
Jah
Staka taem, disfala toktok Jah hem join witim olketa difren wei for givim praise and singsing, prea and askem samting, and pipol iusim taem olketa hapi from olketa win lo faet and taem God sevem olketa, or taem pipol mekhae lo God bikos lo strongfala hand and paoa blo hem. Staka example hem stap lo hao pipol iusim toktok hia. Datfala toktok, “Praisem Jah!” (Hallelujah) hem toktok for praisem God, firstaem wea hem kamap lo buk blo Psalms hem lo Psalm 104:35. Lo olketa nara psalm toktok hia savve stap lo start nomoa (Ps 111, 112), samfala taem hem stap lo midol blo wanfala psalm (135:3), samfala taem hem stap lo end nomoa (Ps 104, 105, 115-117), bat staka taem hem stap lo start and lo end tu (Ps 106, 113, 135, 146-150). Lo buk blo Revelation, olketa wea stap lo heven iusim datfala toktok staka taem for praisem Jehovah.—Re 19:1-6.
Lo olketa nara ples wea toktok “Jah” hem kamap hem showim wei for mekhae lo Jehovah thru lo song and wei for barava askem hem. Moses iusim toktok hia lo song blo hem taem God sevem olketa. (Ex 15:2) Lo datfala song lo buk blo Isaiah hem iusim tufala nem hia, “Jah Jehovah” tugeta. (Isa 12:2; 26:4) Bihaen Jehovah healim Hezekiah, wea klosap for dae, hem praisem Jehovah taem hem iusim toktok Jah staka taem. (Isa 38:9, 11) Bible storyim olketa wea dae no savve praisem Jah, bat olketa wea laef disaed for iusim laef blo olketa for praisem hem. (Ps 115:17, 18; 118:17-19) And samfala nara psalms iusim toktok hia lo prea, for showim olketa tinghae lo wei wea Jehovah sevem, protectim, and stretem olketa.—Ps 94:12; 118:5, 14.
JANUARY 20-26
GUD SAMTING FROM BIBLE PSALMS 138-139
No Letem Wei for Fraet Mekem Iu Hol Bak
Praisem Jehovah Insaed Kongregeson
10 Waswe, heart bilong iu savve pampam evritaem iu ting for apim hand bilong iu for koment? Sapos olsem, ino iuseleva nomoa feel olsem. Tru samting nao, staka long iumi feel fraet lelebet taem iumi koment. For iu deal witim datfala feeling for fraet, iu need for luksavve wanem nao mekem iu for fraet. Waswe, iu fraet nogud iu forgetim wanem iu laek talem or nogud iu talem rong samting? Waswe, iu wari nogud koment bilong iu hem no mas gud olsem koment bilong narawan? For tok stret, kaen wei for fraet olsem maet hem wanfala gud saen. Hem showimaot iu hambol and ting long olketa narawan olsem olketa winim iu. Jehovah lovem wei for hambol. (Sams 138:6; Phil. 2:3) Bat Jehovah laekem tu for iu praisem hem and encouragem olketa brata and sista long olketa meeting. (1 Thess. 5:11) Hem lovem iu and hem bae helpem iu for no fraet.
Encouragem Each Other lo Olketa Kongregeson Meeting
7 Samfala idea wea savve helpem iu, hem stap lo olketa Wastaoa article wea kamap finis. For example, iumi need for prepare gud. (Prov. 21:5) Taem iu studyim gud datfala information, bae hem moa isi for iu givim olketa koment. And tu, givim olketa short koment. (Prov. 15:23; 17:27) Taem ansa blo iu short bae iu no fraet tumas. Wanfala short koment wea maet wan or tu sentence, hem bae isi for olketa brata and sista minim winim wanfala long koment wea staka idea nao insaed. Short koment wea iu talem lo own toktok blo iu showimaot iu prepare gud and minim datfala information.
Faendem Gudfala Point
it-1-E 862 ¶4
Forgive
Wei for forgivim samwan for wat hem duim, hem samting wea olketa Christian mas duim, nomata olketa mas forgive staka taem. (Lu 17:3, 4; Eph 4:32; Col 3:13) God bae no forgivim olketa wea no laek for forgivim olketa narawan. (Mt 6:14, 15) Bat, nomata sapos samwan duim serious sin and olketa mas aotem ‘man hia wea duim rabis samting’ from Christian kongregeson, lo taem wea fitim hem savve kasem forgiveness sapos hem barava repent. Lo taem olsem evriwan lo kongregeson savve showimaot olketa lovem hem. (1Co 5:13; 2Co 2:6-11) Nomata olsem, olketa Christian shud no forgivim olketa wea min for duim nogud samting, wea gohed duim sin and no laek for repent. Olketa hia kamap enemy blo God.—Heb 10:26-31; Ps 139:21, 22.
JANUARY 27–FEBRUARY 2
GUD SAMTING FROM BIBLE PSALMS 140-143
Duim Samting Followim Wat Iu Prea Abaotem
‘Lisin lo Toktok blo Olketa wea Wise’
13 Luksavve kaonsel hem wanfala wei wea Jehovah showimaot hem lovem iumi. Jehovah laekem iumi for garem gudfala laef. (Provebs 4:20-22) Hem showimaot hem lovem iumi taem iumi kasem kaonsel from nara Christian, or iumi readim samting lo Bible or olketa pablikeson blo iumi wea helpem iumi. Hebrew 12:9, 10 sei: “God stretem iumi for helpem iumi.”
14 Tingim hao kaonsel savve helpem iumi. Taem iumi kasem kaonsel, maet iumi tingse man wea kaonselem iumi no tingim feeling blo iumi. Hem tru, man wea givim kaonsel shud traem best for kaen taem hem duim datwan. (Galatia 6:1) Bat nomata iumi tingse man wea kaonselem iumi hem tok stret tumas lo iumi, hem gud for tingim hao datfala kaonsel savve helpem iumi. Bae hem gud for tingim: ‘Nomata mi no laekem hao datfala man story lo mi, maet samting hem talem lo mi hem tru. Nomata mi savve hem garem olketa wik point, waswe, kaonsel blo hem savve helpem mi?’ Bae hem wise for lisin and followim kaonsel wea iumi kasem.—Provebs 15:31.
Keepim ‘Heart Klin’ Taem Nogud Samting Gohed
Hevi from olketa wea againstim iumi, problem saed long selen, and olketa barava nogud sik mekem samfala wea servem God for feel nogud. Samfala taem, datwan spoelem heart bilong olketa. King David tu kasem datwan and hem sei: “Spirit insaed long mi hem wikdaon, and heart bilong mi no feelim eni samting.” (Ps. 143:4) Wanem nao helpem hem for winim kaen feeling olsem? David tingim bak olketa samting wea Jehovah duim for olketa wea worshipim Hem and hao hemseleva tu kasem help from God. Hem ting raonem wanem Jehovah duim for nambawan nem bilong Hem. David gohed for ting raonem olketa waka bilong God. (Ps. 143:5) Olsem David, taem iumi kasem test, iumi savve gohed for ting raonem evri samting wea Jehovah duim finis and wanem hem gohed for duim for iumi.
Waswe, Mi Savve Faendem Samwan wea Worshipim Jehovah?
Maet samfala taem iu garem sem feeling olsem David, wea sei: “Plis Jehovah, iu ansarem mi kwiktaem. Mi no garem eni strong nao. Plis iu helpem mi.” (Ps. 143:5-7, 10) Long olketa taem olsem, hem gud for iu patient and weit for lukim wanem nao Dadi bilong iu long heven bae duim for iu. Taem iu weit, hem gud for iu gohed readim Bible and ting raonem wanem iu readim. Datwan bae helpem iu for savve long olketa komand bilong hem, and bae iu lanem wanem hem duim for helpem pipol bilong hem long bifor. Taem iu gohed for obeyim hem, bae iu luksavve datwan nao barava wise samting for duim.
Faendem Gudfala Point
it-2-E 1151
Poison
Lo tokpiksa wei. Wei for laea, for talem olketa nogud toktok wea spoelem narawan, wea spoelem gudfala nem blo samwan, hem olsem poison blo wanfala poison snek. (Ps 58:3, 4) Taem Bible storyim pipol wea savve laea for spoelem narawan, hem sei, “Poison blo viper snek bihaen lo lips blo olketa” bat really poison blo wanfala viper snek hem stap bihaen lo tufala front teeth blo hem nomoa. (Ps 140:3; Ro 3:13) Tongue blo man, wea savve talem nogud samting for spoelem narawan, wea story nogud bihaen baksaed blo narawan, and olketa false teaching, or wea talem olketa nogud toktok, hem olsem “hem fulap long poison wea savve killim man dae.”—Jas 3:8.
FEBRUARY 3-9
GUD SAMTING FROM BIBLE PSALMS 144-146
“Pipol wea God blo Olketa Jehovah Olketa Nao Hapi!”
Kwestin From Reader
2. Toktok wea olketa iusim long datfala revised Bible hem barava fitim tu olketa nara verse bilong datfala psalm. Wei wea olketa iusim “then” long start bilong verse 12, hem minim olketa blessing wea verse 12 go kasem 14 hem storyim, hem for olketa wea raeteous. Olketa raeteous hia hem nao olketa wea askem God for sevem olketa from olketa nogud pipol wea verse 11 story abaotem. Disfala change hem fitim tu verse 15 wea tufala taem hem storyim pipol wea “hapi.” Distaem disfala verse hem story abaotem sem pipol, wea hem nao olketa pipol bilong Jehovah. Tingim tu hao raeting bilong Hebrew languis no garem punctuation, olsem olketa quotation mark. So taem olketa transleitim olketa verse hia olketa verse mas mek sense, olketa tingim stael long Hebrew raeting, olketa nara verse wea stap raonem, and luksavve sapos hem fitim olketa nara scripture long Bible wea storyim sem samting.
3. Wei wea olketa changem toktok hia fitim olketa nara scripture long Bible wea storyim olketa promis bilong God for givim blessing long pipol bilong hem wea faithful. From olketa changem hao olketa transleitim datfala word asher, datfala psalm wea David raetem showimaot strongfala hope wea hem garem abaotem hao bihaen God sevem olketa Israelite from olketa enemy bae Hem mekem pipol bilong hem stap gud and hapi. (Levitikas 26:9, 10; Diutronomi 7:13; Sams 128:1-6) Olsem example, Diutronomi 28:4 hem sei: “Bae yufala garem plande pikinini. An bae olketa gaden blong yufala i garem staka kaikai. An bae olketa animol blong yufala i garem plande pikinini tu.” Tru nao, taem Solomon, son bilong David, hem rul olketa Israelite barava stap gud and garem peace. And tu, samfala samting wea kamap long taem wea Solomon rul hem piksarem taem wea Messiah bae rul.—Fas Kings 4:20, 21; Sams 72:1-20.
Gohed Strongim Hope blo Iumi
16 Hope for laef olowe hem wanfala spesol present from God. Iumi luk forward for wanfala nambawan future, and iumi sure bae God mekem datwan for happen. Hope blo iumi hem olsem anka wea helpem iumi for stedy mekem iumi savve deal witim olketa hard taem, persecution, and nomata iumi feisim dae. Hope blo iumi hem olsem helmet wea protectim tingting blo iumi mekem iumi savve rejectim olketa nogud samting and duim olketa gud samting. Hope blo iumi helpem iumi for fren gud witim God and mekem iumi luksavve lo bigfala love wea hem garem for iumi tu. Iumi kasem gud samting taem iumi gohed for strongim hope blo iumi.
17 Lo leta blo Paul for olketa Christian lo Rome, hem encouragem olketa for ‘hapi long hope wea olketa garem.’ (Rome 12:12) Masbi Paul hapi bikos hem sure sapos hem gohed faithful, hem bae kasem laef olowe lo heven. Iumi tu savve hapi lo hope blo iumi bikos iumi barava sure hao Jehovah evritaem duim wanem hem promisim. Olsem wanfala psalm sei, ‘man wea [“hope,” NWT] long Jehovah bae hapi, bikos Jehovah gohed olowe fo kipim olketa promis blong hem.’—Sams 146:5, 6.
Wanem Kaen Love Nao Mekem Man Hapi?
19 World bilong Satan mekem evri man barava safa for samting olsem 6,000 year, bat klosap bae hem finis. Distaem, earth fulap witim pipol wea tingim olketa seleva nomoa, lovem selen, and interest nomoa for enjoyim seleva. Olketa laek for kasem samting for olketa seleva and main samting long laef bilong olketa hem for aftarem samting wea olketa seleva laekem. Kaen pipol olsem no savve really hapi. Bat Bible sei: “[Jehovah] hemi God blong Jekob. . . . An man wea hemi tingting strong long hem, bae hem hapi.”—Sams 146:5, 6.
20 Love bilong olketa wea worshipim Jehovah gohed for grow and evri year staka pipol lane abaotem hem and lovem hem tu. Diswan pruvim Kingdom bilong God rul finis and klosap nao bae hem givim olketa blessing wea winim wanem iumi tingim. Taem iumi duim wanem Jehovah laekem, iumi mekem hem hapi and datwan mekem iumi kasem trufala hapi for olowe. Long next study, iumi bae storyim samfala nogud wei wea kamaot from love wea selfish. Bae iumi lukim hao olketa wei hia difren tumas from olketa gudfala wei bilong pipol bilong Jehovah.
Faendem Gudfala Point
it-1-E 111 ¶9
Olketa Animal
Bible storyim hao for tingim and treatim olketa animal. Jehovah showimaot hem man wea evritaem provaedem and givim wat olketa animal needim for gohed stap laef. (Pr 12:10; Ps 145:15, 16) Law blo Moses laekem pipol for lukaftarem gud olketa animal wea man savve keepim. Sapos kaen animal hia hem lus, olketa mas tekem go bak lo man wea onam; taem load wea wanfala animal karem hem hevi tumas, olketa mas aotem. (Ex 23:4, 5) Olketa animal hia mas duim waka wea fitim olketa. (De 22:10; 25:4) Olketa animal hia shud kasem tu gud samting from wei for rest lo Sabbath, semsem olsem olketa man. (Ex 20:10; 23:12; De 5:14) Olketa animal wea dangerous olketa need for kontrolem or killim dae. (Ge 9:5; Ex 21:28, 29) For cross breed lo tufala difren kaen animal hem samting wea barava no stret.—Le 19:19.
FEBRUARY 10-16
GUD SAMTING FROM BIBLE PSALMS 147-150
Iumi Garem Staka Reason for Praisem Jah
Why Nao Hem Fitim for Iumi Praisem Jehovah?
5 Jehovah hem comfortim datfala nation bilong Israel, and hem comfortim tu each wan long olketa Israelite. Jehovah duim sem samting for iumi distaem. Datfala man wea raetem psalm sei God “healim olketa wea sorre tumas, and hem bandagem garekil bilong olketa.” (Ps. 147:3) Taem iumi sik or iumi feel sorre, iumi sure Jehovah hem lukaftarem iumi. Jehovah hem barava laek for comfortim and healim iumi taem iumi feel sorre. (Ps. 34:18; Isa. 57:15) Hem givim iumi wisdom and strongim iumi mekem iumi savve deal witim eni problem wea maet kasem iumi.—Jas. 1:5.
6 Datfala man wea raetem psalm luk go ap long skae and hem sei Jehovah “hem kaontem evri star, and hem savve long nem bilong evriwan.” (Ps. 147:4) Datfala man savve lukim staka star, bat hem no savve haomas star nao stap. Distaem, olketa scientist savve staka billion star nao stap long galaxy bilong iumi. And samting olsem trillion galaxy nao stap long full universe! Iumi olketa man no savve kaontem evri star, bat Creator bilong iumi savve duim datwan. From hem savve gud long olketa star, hem givim nem for each wan long olketa. (1 Cor. 15:41) God wea hem savve long ples wea each star hem stap, hem savve gud long iu tu. Hem savve long ples wea iu stap, feeling bilong iu, and wanem iu needim!
Why Nao Hem Fitim for Iumi Praisem Jehovah?
7 Jehovah hem savve long hard samting wea kasem iu and hem garem paoa for helpem iu deal witim datwan. (Readim Psalm 147:5.) Maet iu feel olsem samting wea kasem iu hem tumas nao, and hem hard nao for iu deal witim. God savve long olketa samting wea iu no fit for duim bikos “hem savve iumi dust nomoa.” (Ps. 103:14) From iumi no perfect, iumi savve mekem sem mistek staka taem, and iumi savve feel wikdaon. Samfala taem iumi savve sorre bihaen iumi talem wanfala samting, garem feeling for laek duim nogud samting, or for jealous long olketa narawan! Jehovah no garem eni wik point, nomata olsem, hem barava savve gud long iumi.—Isa. 40:28.
Why Nao Hem Fitim for Iumi Praisem Jehovah?
18 Man wea raetem psalm hem luksavve nomata staka nation stap long earth, nation bilong Israel nao Jehovah chusim for kamap pipol bilong hem. Olketa nomoa Jehovah givim “law” long olketa, and “toktok” bilong hem long olketa. (Readim Psalm 147:19, 20.) Distaem, iumi tinghae long privilege for garem nem bilong God. Iumi hapi for savve long hem, iumi garem Bible for leadim iumi, and iumi savve fren gud witim hem. Olsem man wea raetem Psalm 147, iu tu garem staka reason for “Praisem Jah!” and for encouragem olketa narawan for duim sem samting.
Faendem Gudfala Point
it-1-E 316
Olketa Bird
Man wea raetem psalm talem “olketa bird wea garem wing” for praisem Jehovah (Ps 148:1, 10), and olketa bird duim diswan thru lo structure and design lo body blo olketa. Wanfala bird savve garem 1,000 go kasem winim 20,000 feather. Each feather garem wanfala shaft wea staka handred barb join kam lo hem and diswan formimap wanfala design, each barb garem staka handred smol barbule and each barbule garem staka handred barbicel and hook. Wanfala six-inch feather from wing blo kurukuru hem garem samting olsem staka thousand barbule and million barbicel. Hao Jehovah wakem and designim wing and body blo olketa bird for olketa flae hem winim hao olketa man designim olketa aeroplane distaem. Bon blo olketa bird hem garem spes lo midol wea datwan mekem hem for laet for flae, so weight blo skeleton blo wanfala frigate bird wea wing blo hem 2 meter (7 ft) hem samting olsem 110 gram nomoa. Bon lo wing blo samfala big bird wea savve flae hae tumas, hem garem samting olsem truss for sapotim, olsem strut lo wing blo aeroplane.
FEBRUARY 17-23
GUD SAMTING FROM BIBLE PROVERBS 1
Olketa Young Wan—Hu Nao Bae Iu Lisin lo Hem?
No Letem Eni Samting Stopem Iu for Kasem Datfala Prize
16 Maet iu wanfala teenager and iu tingse parents bilong iu nating minim iu or olketa strict tumas. Maet diswan mekem iu feel nogud and iu tingse iu no laek worshipim Jehovah nao. Bat sapos iu lusim Jehovah, bae iu faendemaot no eniwan long world lovem iu olsem parents bilong iu and olketa long kongregeson.
17 Tingim, sapos parents no disciplinem iu, hao nao bae iu savve sapos olketa really lovem iu? (Heb. 12:8) Bat, from olketa no perfect maet wei wea olketa disciplinem iu nao mekem iu feel nogud. No ting long wei wea olketa duim datwan, bat trae for tingim why olketa duim datwan. No kros and kwiktaem duim samting. Bible sei: “Man wea no kwiktaem for toktok hem garem gudfala tingting, and man wea garem wei for luksavve hem no kwiktaem for kros.” (Prov. 17:27) Markem goal for kamap wanfala mature Christian wea willing for acceptim kaonsel and lane from datwan, and no wari abaotem hao olketa kaonselem iu. (Prov. 1:8) Hem wanfala blessing for garem parents wea lovem Jehovah. Olketa laek helpem iu for kasem datfala prize for laef olowe.
Protectim Wei wea Iumi Christian
11 Trae hard for mekem God hapi, no man. For minim hu nao iumi, hem normal nomoa for iumi laek member long wanfala grup. Evriwan long iumi need for garem olketa fren, and iumi feel hapi and sef taem pipol acceptim iumi. Taem iumi young, and bihaen datfala taem tu, wei for kasem hevi from olketa wea sem age hem strong fogud, and hem savve mekem iumi barava trae hard for followim olketa or mekem olketa hapi. Bat olketa fren and olketa wea sem age olsem iumi no evritaem warim iumi. Samfala taem olketa laekem nomoa samwan for join witim olketa for go duim samting wea no stret. (Proverbs 1:11-19) Taem wanfala Christian followim olketa wea putim hevi long hem, planti taem hem bae trae for haedem hao hem wanfala Christian. (Psalm 26:4) Paul sei olsem: “No followim fasin bilong world wea stap raonem iu.” (Romans 12:2, The Jerusalem Bible) Jehovah hem givim iumi strong wea iumi needim for mekem iumi fit for faet againstim eni hevi wea iumi kasem.—Hebrews 13:6.
12 Taem olketa hevi olsem start for spoelem wei wea iumi Christian, hem gud for iumi tingim hao loyal fasin bilong iumi for God hem barava important winim tingting bilong staka pipol. Toktok long Exodus 23:2 hem wanfala gudfala principle for diswan: “Iu mas no go witim olketa wea plan for duim nogud samting.” Taem staka long olketa Israelite daotem hao Jehovah bae fulfillim olketa promis bilong hem, Caleb stand strong and no laek for followim tingting bilong olketa nomata staka nao ting olsem. Hem barava feel sure hao olketa promis bilong God hem samting wea man fit for trustim, and hem kasem bigfala blessing from wei wea hem duim datwan. (Numbers 13:30; Joshua 14:6-11) For protectim wei wea iu fren witim God, waswe, iu willing tu for no letem tingting bilong staka pipol affectim iu?
Faendem Gudfala Point
it-1-E 846
Karangge
Winim wei for sei wanfala man hem no garem gudfala tingting, lo Bible olketa iusim toktok “karangge” for samwan wea duim samting wea showimaot hem no laek followim raeteous standard blo God. Samfala Hebrew toktok wea showim datwan hem kesilʹ (‘stupid one’; Pr 1:22), ʼewilʹ (“foolish one”; Pr 12:15), na·valʹ (‘senseless one’; Pr 17:7), and lets (“ridiculer”; Pr 13:1). Datfala Greek toktok aʹphron hem minim “man wea nating garem gudfala tingting” (Lu 12:20), a·noʹe·tos hem man wea “nating tingting gud” (Ga 3:1), and toktok mo·rosʹ hem for samwan wea ‘karangge’ or no “garem gudfala tingting” (Mt 23:17; 25:2).
FEBRUARY 24–MARCH 2
GUD SAMTING FROM BIBLE PROVERBS 2
Why Iu Laek Traem Best for Duim Personal Study?
“Gohed Followim Olketa Tru Teaching”
16 Maet iumi no laek for duim reading or for duim study seleva. Bat Jehovah laekem iumi for “traehad fo lukaotem” olketa tru teaching lo Bible mekem iumi minim gud olketa teaching hia. (Readim Provebs 2:4-6.) Taem iumi readim and studyim Bible, datwan bae helpem iumi. Corey sei taem hem duim Bible reading, hem readim wanfala verse, then hem chekim olketa footnote and cross-reference wea join witim datfala verse, and duim eni extra research lo hem. Then hem readim next verse and duim sem samting. Hem sei: “Disfala wei for study helpem mi for lanem staka samting!” Nomata iumi followim disfala idea for study or nara idea, iumi showimaot iumi tinghae lo truth from iumi spendem taem and waka hard for duim study.—Sams 1:1-3.
Tru Wisdom Hem Singaot Big
3 Wisdom hem savve minim hao for iusim savve wea iumi garem for mekem olketa gud disison. Bat hem no datwan nomoa. Bible sei: “Wei for fraet lo Jehovah hem start blo wisdom, and savve blo Most Holy Wan hem nao wei for minim samting.” (Prov. 9:10, NWT) So bifor iumi mekem eni important disison, iumi mas mek sure hem followim tingting blo Jehovah, wea hem nao “savve blo Most Holy Wan.” Iumi savve kasem wisdom blo God taem iumi studyim Bible and olketa Bible pablikeson. Taem iumi duim datwan, bae iumi garem tru wisdom.—Provebs 2:5-7.
4 Jehovah nomoa savve givim iumi tru wisdom. (Rome 16:27) Why nao iumi sei olsem? First samting, hem Creator, so hem savve gud lo evri samting wea hem creatim. (Sams 104:24) Mek-tu, evri samting wea Jehovah duim hem showimaot wisdom blo hem. (Rome 11:33) Mek-thri, pipol evritaem kasem gud samting taem olketa followim advaes blo Jehovah. (Provebs 2:10-12) If iumi laek for kasem tru wisdom, iumi mas acceptim thrifala samting hia and mek sure iumi tingim olketa samting hia bifor iumi duim eni samting and taem iumi mekem eni disison.
Olketa Young Wan, Strongim Faith Bilong Iufala
2 Sapos iu wanfala young wan wea iu worshipim Jehovah or iu studyim Bible, waswe, iu kasem hevi for bilivim evolution and for no bilivim God nao wakem evri samting? Sapos olsem, iu savve duim samting for strongim faith bilong iu. Bible encouragem iumi for tingting gud abaotem wanem iumi herem or readim. Hem sei: “Gudfala tingting and wei for luksavve bae protectim iu.” Long wanem wei? Hem bae helpem iu for no bilivim olketa laea teaching, and for strongim faith bilong iu long Jehovah.—Readim Proverbs 2:10-12.
3 Iumi mas savve gud long Jehovah mekem iumi garem strongfala faith. (1 Tim. 2:4) So taem iu readim Bible and olketa Bible pablikeson hem barava important for ting raonem wanem iu readim. Trae for minim gud wanem iu readim. (Matt. 13:23) Sapos iu study seleva long wei olsem, bae iu faendem staka pruv wea showimaot Jehovah nao wakem iumi and hem nao givim kam Bible. (Heb. 11:1) Distaem bae iumi storyim hao for duim diswan.
Faendem Gudfala Point
it-1-E 1211 ¶4
Faithful
Datkaen wei for faithful, hem no depend lo strong blo man seleva, bat hem depend lo strong faith and trust lo Jehovah and lo paoa blo Hem for sevem man. (Ps 25:21) God promisim dat hem bae kamap “shield” and man for “protectim” iumi, and for leadim olketa wea wakabaot lo faithful wei. (Pr 2:6-8; 10:29; Ps 41:12) Wei wea olketa evritaem duim samting wea Jehovah hapi lo hem mekem olketa garem laef wea stedy, mekem olketa savve followim stretfala road for kasem goal blo olketa. (Ps 26:1-3; Pr 11:5; 28:18) Nomata Job luksavve man wea no garem blame savve safa bikos lo rul blo olketa wea wicked and savve dae witim olketa wea wicked, Jehovah mekem man wea raeteous for sure dat Hem lukim wat happen lo man hia and Hem promisim dat inheritance blo hem bae stap for olowe, hem bae stap lo peace lo future, and hem bae inheritim gud samting. (Job 9:20-22; Ps 37:18, 19, 37; 84:11; Pr 28:10) Olsem Job, for man kasem respect hem no depend lo staka riches wea hem garem, bat hem depend lo wei wea hem faithful. (Pr 19:1; 28:6) Olketa pikinini wea garem kaen parents olsem bae barava hapi (Pr 20:7), kasem gud nem bikos lo example blo dadi blo olketa, and kasem gud samting tu from wei wea dadi blo olketa garem gud nem and pipol respect hem.