Onésime and Géraldine
Olketa wea Go Bak lo Hom Kantri blo Olketa Kasem Staka Blessing
STAKA brata and sista wea muv go lo nara kantri for waka for selen, olketa go bak lo hom kantri blo olketa. Love wea olketa garem for Jehovah and for pipol nao muvim olketa for muv go lo ples wea needim staka pablisa moa. (Matt. 22:37-39) Olketa wanem sakrifaes nao olketa mas mekem, and wanem blessing nao olketa kasem? For savve moa abaotem datwan, bae iumi story abaotem samting wea happen lo Cameroon, wanfala kantri lo western Africa.
“INSAED LO STRET PLES FOR ‘FISHING’”
Lo 1998, wanfala brata wea nem blo hem Onésime hem lusim hom blo hem lo Cameroon. For fotinfala year hem stap lo nara kantri. Wantaem, lo meeting hem herem wanfala tokpiksa abaotem preaching waka. Datfala speaker hem sei, “Sapos tufala fren fishing lo tufala difren ples, and wanfala hem kasem staka fish winim narawan, waswe, datwan wea no kasem staka fish bae hem no muv go lo ples wea staka fish lo hem?”
Datfala tokpiksa mekem Onésime for ting for go bak and helpem olketa pablisa lo Cameroon bikos staka nao laek for studyim Bible lo there. Bat hem wari abaotem samfala samting. Waswe, bae hem fit for stap lo there bihaen staka year wea hem stap lo nara kantri? For hem savve sapos hem fit for duim datwan, Onésime go stap lo Cameroon for sixfala month firstaem. Then lo 2012, hem muv go bak and stap lo there.
Onésime hem sei olsem: “Mi mas lane for getius lo hot weather and laef lo there. Lo Kingdom Hall, mi mas getius for sidaon lo olketa stul nomoa.” Hem smile and sei: “Bat sapos mi barava concentrate lo program, datwan helpem mi for forgetim nao olketa naesfala chair lo olketa nara Kingdom Hall lo ples wea mi stap bifor.”
Lo 2013, Onésime maritim Géraldine, wea hem kam bak from France bihaen hem stap lo there for naenfala year. Wanem blessing nao disfala couple kasem from wei wea olketa putim theocratic waka olsem first samting lo laef blo olketa? Onésime sei: “Mitufala attendim Skul for Olketa Kingdom Evangelizer and mitufala waka lo Bethel. Lo olketa year wea go pas, 20 fala Bible student lo kongregeson blo mifala, olketa baptaes. Mi feel olsem mi lo stret ples for ‘fishing.’” (Mark 1:17, 18) Géraldine sei: “Mi kasem staka blessing moa winim wanem mi savve tingim.”
KASEM HAPI FROM WEI FOR FAENDEM OLKETA NIU DISAEPOL
Judith and Sam-Castel
Judith hem muv go lo United States bat hem barava laek for duim moa samting lo ministry blo hem. Hem sei, “Evritaem mi go for visitim famili lo Cameroon, taem mi redi for go bak, mi krae bikos mi mas lusim samfala wea mi startim Bible study witim olketa.” Bat, Judith hol bak for muv go lo Cameroon. Hem garem waka wea hem kasem big pei, wea datwan mekem hem fit for peim medical expense blo dadi blo hem wea stap lo Cameroon. Nomata olsem, Judith trustim Jehovah and hem muv go bak. Hem sei samfala taem hem savve missim gudfala laef wea hem garem taem hem stap lo nara kantri. Hem prea lo Jehovah for helpem hem and hem kasem encouragement from wanfala circuit overseer and waef blo hem.
Taem hem ting go bak, Judith hem sei, “Insaed thrifala year, mi kasem hapi from wei wea mi helpem fofala for baptaes.” Judith hem start for serve olsem wanfala spesol pioneer. Distaem, hem and hasband blo hem, Sam-Castel, duim circuit waka. Bat, wanem nao happen lo dadi blo hem? Judith and famili blo hem fit for faendem hospital lo nara kantri wea willing for pei for operation blo dadi blo hem. Gud samting nao, datfala operation hem gohed gudfala.
EXPERIENCEM SAPOT BLO JEHOVAH
Caroline and Victor
Wanfala brata wea nem blo hem Victor hem muv go lo Canada. Bihaen hem readim wanfala article lo Wastaoa abaotem hae education, hem tingting abaotem skul blo hem. Hem stop for tekem olketa university course and hem duim olketa short course wea bae helpem hem for kasem waka kwiktaem. Hem sei: “Then mi duim nao waka wea mi bin laekem for longtaem finis wea hem nao for pioneer.” Bihaen Victor maritim Caroline, tufala visitim Cameroon. Lo there, tufala go lo branch office and tufala kasem encouragement for ting raonem wei for serve lo Cameroon. Victor sei: “Mitufala no garem eni reason for no acceptim datwan, and from mitufala garem simpol laef, mitufala acceptim datfala invitation.” Nomata Caroline garem samfala problem saed lo health, tufala disaed for muv go lo there.
Victor and Caroline start for serve olsem regular pioneer bikos bigfala need hem stap for helpem olketa wea laek for lanem Bible. Tufala iusim nomoa selen wea tufala sevem. Tufala go bak lo Canada for samfala month for waka for lelebet selen mekem tufala savve go bak lo Cameroon and gohed pioneer. Wanem blessing nao tufala kasem? Tufala attendim Skul for Olketa Kingdom Evangelizer and tufala serve olsem spesol pioneer, and distaem tufala waka lo construction. Victor hem sei, “For lusim gudfala laef wea mifala garem bifor hem helpem mifala for experiencem sapot blo Jehovah.”
HAPI WEA MAN KASEM TAEM HEM HELPEM PIPOL FOR KAMAP DISAEPOL
Stéphanie and Alain
Lo 2002, Alain, wanfala university student lo Germany, hem readim datfala tract Youths—What Will You Do With Your Life? Wanem hem readim hem muvim hem for mekem olketa niu goal. Lo 2006, hem attendim Ministerial Training Skul and hem kasem assignment for go lo Cameroon, wea hem hom kantri blo hem.
Lo Cameroon, Alain duim part-taem waka. Bihaen, hem faendem waka wea hem kasem gud pei, bat hem wari nogud hem bae no garem staka taem for ministry. So taem olketa invaetem hem for serve olsem spesol pioneer, hem no hol bak for acceptim. Boss blo hem sei bae hem apim pei blo hem, bat Alain no laek for changem moa tingting blo hem. Gogo, Alain maritim Stéphanie, wea bin stap lo France for staka year. Wanem hard taem nao Stéphanie deal witim taem hem muv go lo Cameroon?
Stéphanie sei: “Mi lelebet garem problem lo health blo mi and mi allergy tu lo samfala samting, bat from wei wea mi kasem olketa treatment olowe mi kamap gud lelebet.” Datfala couple kasem staka blessing from wei wea tufala no givap. Alain sei: “Taem mifala go preach lo wanfala vilij wea stap farawe wea nem blo hem Katé, mifala faendem samfala wea laek studyim Bible. Bihaen mifala conductim Bible study witim olketa lo phone. Tufala lo olketa Bible study hia baptaes and wanfala grup hem start.” Stéphanie sei: “No eni hapi hem winim wei for helpem olketa pipol for olketa dedicatem olketa seleva lo Jehovah. Taem mifala serve lo hia, mifala experiencem staka taem kaen wei for hapi olsem.” Distaem, Alain and Stéphanie duim circuit waka.
“MIFALA DUIM NAO WANEM MIFALA SHUD DUIM”
Léonce and Gisèle
Gisèle attendim wanfala medical skul lo Italy, hem baptaes taem hem stap lo there. Hem barava laekem simpol laef blo wanfala pioneer couple wea study witim hem, and datwan mekem hem laek for duim moa samting lo ministry. So Gisèle start for regular pioneer taem hem gohed finisim skul blo hem.
Gisèle laekem tumas for go bak lo Cameroon mekem hem savve duim moa samting lo service blo Jehovah bat hem warim samfala samting. Hem sei, “Mi mas givim ap nao residency permit blo mi lo Italy and lusim nao olketa fren and famili wea stap lo Italy.” Nomata olsem, lo May 2016, Gisèle go bak lo Cameroon. Gogo, bihaen hem maritim Léonce, and branch office lo Cameroon recommendim datfala couple for muv go lo Ayos, wanfala taon wea needim staka pablisa for preach.
Hao nao laef lo Ayos? Gisèle hem sei: “Staka taem mifala no garem electricity for tu thri week, and mifala no savve chargem mobile phone blo mifala. And tu, mobile phone hem no savve waka staka taem. Mi mas lane for kuki lo fire, and mifala mas tekem wheelbarrow and torch laet for go karem wata lo naet taem wea no staka pipol lo datfala spring wata.” Hao nao datfala couple deal witim datwan? Gisèle hem sei: “Samting wea helpem mifala nao spirit blo Jehovah, wei wea mitufala hasband blo mi sapotim each other, and olketa famili and fren encouragem mifala and samfala taem olketa savve sendem selen tu for sapotim mifala.”
Waswe, Gisèle hem hapi dat hem go bak lo hom kantri blo hem? “Yes! Barava nao.” Hem sei. “Lo firstaem mifala kasem samfala hard samting, and mifala feel discourage, bat taem mifala winim datwan, mitufala hasband blo mi feel olsem mifala duim nao wanem mifala need for duim. Mifala trustim Jehovah and mifala kamap moa klos lo hem.” Léonce and Gisèle attendim Skul for Olketa Kingdom Evangelizer, and distaem tufala serve olsem temporary spesol pioneer.
Olsem olketa fisherman wea no fraet for kasem fish, olketa wea go bak lo hom kantri blo olketa willing for mekem olketa sakrifaes mekem olketa savve helpem pipol wea laek for herem gud nius. Iumi sure Jehovah bae rememberim hard waka blo olketa pablisa hia for love wea olketa showimaot for nem blo hem. (Nehemaea 5:19; Heb. 6:10) Sapos iu stap lo nara kantri and hom kantri blo iu hem need staka pablisa for preach, waswe, iu fit for go bak? Sapos iu duim olsem, Jehovah bae blessim iu.—Provebs 10:22.