Wanfala Bible Study Kamap Plande

Marta, wanfala Jehovah’s Witness wea stap lo Guatemala, hem lanem Kekchi languis mekem hem savve storyim message lo Bible lo pipol wea story lo datfala languis. Wanday hem lukim wanfala man lusim hospital. Lo lukluk blo Marta, man hia luk olsem hem kam from wanfala Kekchi vilij lo maunten area wea Olketa Jehovah’s Witness no savve preach lo hem staka taem. Marta savve lo tu-thri word lo Kekchi languis so hem go story lo man hia.

Marta askem hem sapos hem laek for studyim Bible. Hem sei hem hapi for studyim Bible bat hem no garem selen for peim datwan. Marta explainim lo hem Olketa Jehovah’s Witness studyim Bible witim pipol for free nomoa. Marta sei tu hem savve study witim hem lo phone and full famili blo hem savve joinim study. Man hia agree for study. From man hia savve gud lo Spanish languis and readim tu, Marta givim hem wanfala New World Translation of the Holy Scriptures lo Spanish. Hem givim hem tu wanfala Bible study buk Wanem Nao Really Samting wea Bible Teachim? lo Kekchi languis. Lo week bihaen, datfala man witim waef blo hem and tufala pikinini blo hem start for studyim Bible witim Marta lo phone. Olketa studyim Bible tufala taem insaed lo week. Marta sei: “From mi no savve gud lo Kekchi languis, mifala study lo Spanish languis and man hia transleit go for waef blo hem wanem mifala studyim. Olketa pikinini blo tufala savve lo Spanish.”

Disfala man hem pastor lo church. Hem start for teachim olketa wea lotu lo church blo hem wanem hem lanem lo Bible study blo hem. Olketa wea lotu laekem wanem olketa herem and askem hem wea nao hem lanem olketa niu teaching hia. Taem hem talem olketa abaotem Bible study blo hem, olketa tu start joinim study blo hem. Gogo samting olsem 15 pipol kam each week for joinim study witim Marta lo phone. Then bihaen samfala taem go pas, olketa putim wanfala microphone klosap lo phone mekem evriwan savve herem klia study.

Taem Marta talem olketa elder lo kongregeson blo hem abaotem disfala Bible study, wanfala elder hia go visitim olketa student lo vilij blo olketa. Hem invaetem olketa for attendim pablik tok wea circuit overseera bae givim lo nara vilij. For kasem vilij hia olketa mas draevem car for wan hour and then baeleg tufala hour. Olketa student agree for kam and 17-fala nao attend.

Samfala week bihaen, datfala circuit overseer and samfala nara Witness spendem fofala day witim olketa student. Lo olketa morning, olketa watchim olketa Bible video lo Kekchi languis lo jw.org, and studyim brochure Hu Nao Duim Wanem Jehovah Laekem Distaem? Lo olketa aftanun, olketa watchim samfala program lo JW Broadcasting. Circuit overseer arrangem tu for each student garem samwan for teachim Bible lo olketa wanwan.

Lo fofala day hia, olketa Witness go preach tu lo olketa nara Kekchi vilij klosap and invaetem pipol for attendim wanfala spesol meeting. Lo datfala meeting, olketa brata askem 47 wea attend sapos each wan laek garem Bible study blo olketa seleva. Elevenfala famili agree for study.

Samfala month bihaen, olketa elder arrangem meeting for kamap evri weekend lo first vilij wea olketa bin visitim. Distaem, samting olsem 40-fala pipol attendim olketa meeting each week. And taem olketa brata duim Memorial blo dae blo Jesus lo there, olketa hapi tumas for lukim 91 attend.

Marta ting bak lo hao disfala experience hem start and wanem hem happen bihaen. Hem sei: “Mi hapi tumas lo Jehovah. Samfala taem mi tingse mi no savve duim staka samting. Bat God savve iusim iumi for helpem olketa narawan. Hem savve lo heart blo pipol wea stap lo olketa vilij hia, and hem leadim olketa kam lo pipol blo hem. Jehovah lovem olketa.”