Olketa Traveling Ovaseer—Work Withim Iumi Long Truth
Long Kristian kongregeson long first century, samfala traveling ovaseer visitim olketa kongregeson for buildim ap olketa. Olketa givim olketa seleva, no lukaotem samting for seleva, mekem olketa savvy helpem olketa long kongregeson for go ahed for wakabaot long way wea fitim God.—Acts 11:23, 24; 14:21, 22; 15:32; 20:2, 31-35; Philippians 2:20-22, 29; 1 Thessalonians 2:5-12.
Distaem olketa kongregeson bilong Olketa Witness Bilong Jehovah kasem gudfala samting tu from olketa traveling ovaseer. Olketa man hia spendem planti year for garem savvy long preaching work bilong Olketa Witness Bilong Jehovah and olsem ovaseer. Olketa stap free from work for selen and responsibility bilong famili mekem olketa savvy givim olketa seleva long full-taem ministry. For olketa wea marit, planti taem waef bilong olketa share long ministry full taem withim hasband bilong olketa.
Work bilong circuit ovaseer hem for luk aftarem wanfala circuit wea garem samting olsem 18 go kasem 25 kongregeson. Hem visitim each kongregeson insaed long circuit long samting olsem tufala taem insaed year and bihaen long tufala or threefala year, hem muv go long different circuit. Long disfala way olketa kongregeson savvy kasem gudfala samting from olketa different experience and savvy bilong olketa different circuit ovaseer.
Circuit ovaseer checkim spiritual living and work bilong kongregeson. Hem givim samfala tok long kongregeson and garem meeting withim olketa elder and ministerial servant for storyim hao olketa savvy kamap moabeta for servim kongregeson.
Insaed long week hem and waef bilong hem, sapos hem marit, work withim olketa Witness bilong wanfala kongregeson, and helpem olketa for kamap moabeta long haos-tu-haos ministry. Hem and waef bilong hem visitim tu niufala pipol wea interest for encouragim olketa long faith. Iu savvy ask for olketa visitim iu.
Distrik ovaseer garem semkaen mark long spiritual way and experience. Hem savvy visitim olketa different circuit, and serve long saed bilong circuit assembly. Hem and waef bilong hem savvy work tu long field ministry withim olketa Witness bilong wanfala long olketa kongregeson long circuit wea hem visitim. Hem luk aftarem work for readyim program for circuit assembly and givim samfala tok long assembly, insaed diswan hem pablik tok.
Taem olketa traveling ovaseer finis visitim wanfala kongregeson or wanfala circuit, olketa go ahed for visitim nara wan moa, followim sem way, go kasem taem olketa visitim evri kongregeson or circuit insaed long samting olsem sixfala month; then olketa start back moa.
Long planti kantri traveling ovaseer iusim trak or pablik transport. Long samfala kantri maet olketa iusim bicycle or wakabaot nomoa. Society peim kost bilong transport for traveling ovaseer and provide-im lelebet selen tu for hem and waef bilong hem for samting wea tufala needim. Klosap evritaem olketa member bilong each kongregeson nao givim kaikai and ples for stap long traveling ovaseer and waef bilong hem.
Disfala service needim spirit for sakrifaesim seleva. Traveling ovaseer and waef bilong hem decide strong for givim service long kongregeson long way wea no putim bigfala hevi long kongregeson.—1 Thessalonians 2:9.
• Wanem nao purpose bilong olketa traveling ovaseer long Kristian kongregeson long first century?
• Hao nao olketa traveling ovaseer distaem kamap fit and stap ready for duim disfala ministry?
• Storyim work bilong circuit and distrik ovaseer and living bilong olketa.
[Piksa long page 20]
Distrik ovaseer givim tok long circuit assembly
[Piksa long page 21]
Olketa circuit ovaseer givim instruction long way for preach from haos tu haos, story withim olketa elder bilong kongregeson, visitim niufala Bible study wea interest, givim tok long kongregeson