Helpem Pipol Raonem World for Read and Raet

Agostinho, wea stap lo Brazil sei: “Mi growap lo farm lo bush. Mifala barava poor. Mi mas finis skul mekem mi savve waka for helpem famili.” Agostinho lane for read and raet taem hem 33 years old. Hem sei: “Team mi lane for read and raet, datwan helpem mi for garem gudfala tingting abaotem miseleva and for no feel shame.”

Agostinho hem wanfala lo winim 250,000 pipol wea Olketa Jehovah’s Witness teachim for read and raet lo 70 year wea go pas. Why nao Olketa Jehovah’s Witness conductim olketa read and raet class? Wanem gudfala samting nao pipol kasem from kaen education olsem?

Hem No Isi for Lanem Samting Sapos Iu No Savve Read and Raet

Lo 1935, Olketa Jehovah’s Witness duim ministry blo olketa lo 115 kantri. For preach lo pipol wea story lo olketa difren languis, olketa missionary pleim olketa recording blo olketa Bible tok lo languis blo olketa, and samfala taem olketa offerim literature lo languis blo pipol hia. Nomata staka pipol interest tumas lo Bible, plande lo olketa no savve read and raet and datwan mekem hem no isi for olketa lanem samting.

From pipol no savve readim Bible seleva, olketa stragol for followim olketa Bible principle. (Josua 1:8; Sams 1:2, 3) And hem no isi for olketa for duim olketa responsibility wea iumi olketa Christian garem. Olsem example, sapos parents no savve read, hem no isi for olketa teachim Bible lo olketa pikinini blo olketa. (Diutronomi 6:6, 7) And olketa niu Witness wea no savve read bae faendem hem no isi for iusim Bible for teachim olketa narawan.

Campaign for Teachim Pipol for Read and Raet

Lo olketa year bihaen 1940 and 1950, Nathan Knorr and Milton Henschel, tufala wea lukaftarem waka blo Olketa Jehovah’s Witness lo datfala taem, tufala travel lo olketa difren kantri for help organizem preaching waka. Lo olketa kantri wea plande pipol no savve read and raet, tufala encouragem olketa branch office lo there for startim olketa read and raet class lo olketa kongregeson.

Olketa branch office sendem olketa instruction lo hao for conductim olketa class hia. Lo samfala kantri, gavman garem finis olketa program and buk wea olketa Witness savve iusim for teachim pipol for read and raet. Olsem example, branch office lo Brazil kasem olketa buk and nara samting from gavman wea olketa sendem go lo olketa kongregeson. Lo olketa nara kantri, olketa Witness mekem wanfala program and iusim datwan for teachim pipol for read and raet.

Eniwan savve attendim olketa read and raet class, nomata olketa man or woman, young or olo. Goal blo class hem for teachim pipol for readim languis blo olketa, nomata datwan minim kongregeson mas garem olketa class hia lo staka difren languis.

Program wea Helpem Pipol

Wanem gud samting nao pipol kasem from disfala read and raet class? Wanfala Witness from Mexico sei: “Distaem mi savve minim gud Bible, and wanem mi lanem savve kasem heart blo mi. From mi savve hao for read, mi no hol bak for story lo olketa neiba blo mi, and mi storyim message lo Bible lo staka moa pipol.”

Disfala read and raet class helpem pipol for no just minim Bible bat hem helpem olketa lo olketa nara samting tu. Isaac from Burundi sei: “Taem mi lane for read and raet, datwan helpem mi for lane for duim construction waka. Distaem mi lukaftarem olketa bigfala construction project.”

Jesusa, wanfala woman from Peru, hem 49 years old taem hem start for attendim olketa read and raet class. Hem sei: “From mi lukaftarem olketa waka lo haos, mi need for savve lo nem blo olketa samting wea mi peim lo market and kost blo hem tu. Bifor mi no savve duim datwan. Bat mi hapi tumas bikos datfala read and raet class helpem mi for no fraet for go baem olketa samting wea famili blo mi needim.”

Lo olketa year wea go pas, olketa bigman lo gavman lo staka kantri praisem Olketa Jehovah’s Witness for waka wea olketa duim for teachim pipol for read and raet. Nomata distaem tu, Olketa Jehovah’s Witness gohed conductim olketa read and raet class, and iusim olketa niu program and buk for helpem pipol. Olketa wakem and printim klosap 224 million brochure lo 720 languis for helpem pipol for read or for helpem olketa wea no skul gud.a