Olketa Givim Best blo Olketa

Taem World War II hem finis lo 1945, plande taon lo Germany distroe finis, olketa pikinini no go skul, pipol no savve iusim olketa hospital bikos hem nogud, and staka bomb wea no bosta yet stap evriwea lo kantri. And tu, no inaf kaikai stap, so hem expensive tumas for peim kaikai. Olsem example, lo blak market, man mas waka for sixfala week for peim 500 gram butter nomoa!

Winim tu thousand Jehovah’s Witness wea bin stap lo prison for staka year bikos lo biliv blo olketa, olketa tu kasem hard taem. Lo 1945, olketa free for go aot from prison, bat only samting wea olketa garem hem kaleko wea olketa werem. Olketa nara Witness lusim property and olketa samting wea olketa onam. Samfala barava hangre fogud gogo olketa faint taem olketa attendim olketa Christian meeting.

Olketa Witness lo Nara Kantri Kwiktaem Helpem Olketa

Olketa Jehovah’s Witness lo olketa nara kantri lo world kwiktaem sendem kaikai and kaleko. Olketa brata lo world hedquarter lo United States askem branch office lo Bern, lo Switzerland, for helpem olketa brata lo Germany. Nathan Knorr, wanfala brata wea hedquarter sendem for visitim Europe, hem help for organizem and kwiktaem sendem relief supply.

Olketa Witness lo Switzerland givim kam staka kaikai, kaleko, and selen. Olketa sendem datwan firstaem lo Bern, then lo there olketa arrangem and pasolem and then sendem lo Germany. Olketa Witness lo olketa nara kantri olsem Sweden, Canada, and United States, olketa tu sendem go relief supply. Datwan helpem olketa Witness lo Germany and plande nara kantri lo Europe and Asia wea war spoelem.

Olketa Givim Staka Samting

Bihaen tu-thri month nomoa, branch office lo Switzerland sendem coffee, milk, sugar, grain, drae frut, olketa vegetable, tin meat, and tin fish. Olketa sendem selen tu.

And tu, olketa Witness lo Switzerland sendem faev ton lo kaleko, witim olketa jacket, kaleko for olketa woman, and olketa suit for olketa man. The Watchtower blo January 15, 1946 sei: “Olketa brata and sista givim best samting wea olketa garem. Olketa mekem bigfala sakrifaes for helpem olketa brata and sista lo Germany.”

Olketa Witness lo Switzerland donatem tu klosap 1,000 shoe, and bifor olketa sendem olketa chekim for mek sure evriwan hem gud. Olketa brata and sista lo Wiesbaden, lo Germany, wea openem olketa box barava sapraes lo olketa difren kaen kaleko and shoe and gud quality blo olketa. Wanfala Witness raet kam olsem: “Mi savve no eni stoa lo Germany garem staka gud quality kaleko and shoe olsem olketa hia.”

Olketa brata sendem relief supply go kasem August 1948. Total blo evri samting wea olketa Witness lo Switzerland sendem for olketa brata lo Germany hem 444 box blo relief supply wea weight blo olketa hem 25 ton. Olsem iumi storyim finis, hem no olketa Witness lo Switzerland nomoa wea givim relief supply. Bat olketa nao smol grup winim olketa narawan bikos lo datfala taem Switzerland garem 1,600 Witness nomoa!

“Lovem Iufala Evriwan”

Jesus Christ sei: “Sapos iufala lovem iufala evriwan, pipol bae savve iufala olketa disaepol bilong mi.” (John 13:34, 35) Love mekem pipol blo Jehovah for no just givim wanem olketa no needim bat for givim best samting wea olketa garem. (2 Corinth 8:1-4) Wanfala leta from Zurich sei “staka brata wea no garem kaikai for olketa seleva bat laek for help givim kam selen for helpem olketa.”

Pipol blo Jehovah lo Germany kwiktaem kamap gud bihaen lo war and persecution. Wanfala reason hem bikos olketa brata organizem gud bigfala relief supply for olketa. Olketa mekem sakrifaes for showimaot trufala love for olketa brata and sista lo Germany.