Hu Nao Bae Sevem Earth?

Staka pipol wari abaotem damage wea pipol duim lo earth and evriting wea laef insaed. Samfala environmental expert sei wat pipol duim distaem hem worse winim bifor bikos hem kosim staka damage lo olketa difren kaen living tings and staka living tings gogo for extinct tu.

Hao, olketa man bae spoelem earth? Or hao, bae enitaem olketa garem living wea no damagem nature?

Hao, wat olketa man duim bae succeed?

Staka expert confident dat olketa man fit for protectim earth and garem living wea no damagem nature. Samfala wea duim research sei for olketa man succeed, olketa mas mekem change lo samfala area and mekem olketa change hia lo semtaem. Samfala change hia bae includim:

• Impruvim hao pipol kea for land, forest, wetland, and ocean.

• Iusim olketa difren agriculture method and energy source.

• Changem hao for producem and distributim kaikai mekem main diet blo pipol hem eniting wea kam from olketa plant and smol amount blo meat and fish, and for olketa kaikaim smol amount lo kaikai nomoa and no weistim kaikai.

• Acceptim dat for garem gud laef hem no minim man mas garem staka material samting.

Wat nao tingting blo iu? Hao, iu ting olketa gavman, bisnis, and man fit for waka tugeta for duim olketa big samting olsem? Or iu tingse diswan hem hard bikos pipol greedy, selfish, and no kea abaotem future?—2 Timothy 3:1-5.

Reason for garem hope

Bible promisim dat future blo planet blo iumi hem sef. Hem explainim why olketa man no fit for sevem earth nomata wat olketa duim, and hem storyim wanfala real change wea mas kamap. Hem storyim klia tu hao disfala change bae happen.

Why olketa man no fit for duim samting seleva for sevem planet. Jehovaha God creatim earth, and hem givim responsibility lo olketa man for lukaftarem earth. (Genesis 1:28; 2:15) Olketa savve succeed for duim responsibility blo olketa only sapos olketa luk lo Creator blo olketa for guidance and obeyim instruction blo hem. (Proverbs 20:24) Bat, olketa rejectim Jehovah and followim tingting blo olketa seleva. (Ecclesiastes 7:29) Olketa man nomoa no garem ability for lukaftarem earth, and nomata sapos olketa impruvim tu-thri samting, bae olketa no succeed lo evri samting.—Proverbs 21:30; Jeremiah 10:23.

Change wea mas happen. God bae stopem olketa man for spoelem earth. (Revelation 11:18) Hem bae no impruvim olketa gavman and helpem olketa man wea spoelem planet; bat hem bae finisim olketa. (Revelation 21:1) Dastawe, Jehovah sei: “Lukim! Mi mekem evri samting hem niu.”—Revelation 21:5.

Hao datfala change bae happen. Jehovah bae replacem olketa gavman blo man witim wanfala gavman lo heven wea Bible kolem lo Kingdom blo God. Datfala gavman wea Jesus Christ nao leader lo hem, bae rul ovarem full earth.—Daniel 2:44; Matthew 6:10.

Kingdom blo God bae educatem pipol for savve hao for followim olketa raeteous standard blo God. Taem olketa man luksavve lo Creator blo olketa and followim guidance blo hem, olketa bae fit for garem living wea no damagem nature. (Isaiah 11:9) Bible storyim hao gavman blo God bae helpem olketa citizen blo hem for enjoyim gudfala laef, wea no spoelem planet. Gavman hia bae duim olketa samting hia:

• Provaedem kaikai for evriwan.—Psalm 72:16.

• Mekem olketa natural resource for gud bak.—Isaiah 35:1, 2, 6, 7.

• Mekem olketa man lukaftarem olketa animal, and olketa animal no spoelem olketa man.—Isaiah 11:6-8; Hosea 2:18.

• Stopem olketa samting wea spoelem environment.—Mark 4:37-41.

Iu fit for trustim dat Kingdom blo God bae klosap mekem olketa change hia for happen. For moa information, readim article “Wanem Taem Nao Kingdom blo God Bae Rul Ovarem Earth?”