Hao, Religion Hem Big Bisnis Nomoa?
Hao, iu noticim dat staka religion olketa focus nomoa lo wei for mek selen winim for provaedem spiritual help wea pipol needim? Olketa advertisem service wea olketa provaedem and salem enikaen samting. Staka leader blo olketa kasem big salary and garem rich living. Tingim samfala example:
Wanfala report storyim dat insaed 13 years wanfala Catholic bishop iusim selen blo church for peim klosap 150 trip lo private jet and samting olsem tu handred taem hem haerem limousine car. And tu, hem spendem winim fo million dollar for renovatim haos blo church wea hem stap insaed.
Wanfala preacher lo wanfala kantri lo Africa savve holem olketa religious service wea staka thousand pipol nao attendim. Bigfala mall blo church blo hem salem enikaen difren samting, olsem oil wea olketa sei hem savve healim man, and olketa towel and T-shirt wea garem piksa blo hem. Staka pipol wea kam attendim service blo hem olketa poor, bat hem barava rich.
Lo China, tufala lo fofala sacred Buddhist maunten hem olketa company wea olketa registerim. And famous Shaolin Temple staka big bisnis nao iusim lo project blo olketa—and abbot blo temple hia pipol savve kolem hem lo “CEO monk.”
Staka big bisnis lo America start for haerem olketa religious consultant. Wanfala report sei olketa hia iusim olketa tradition blo church for inventim olketa religious ritual and provaedem olketa nara spiritual help for olketa client blo olketa.
Wat nao tingting blo iu abaotem olketa religion wea involve insaed olketa bisnis olsem? Hao, enitaem iu tingim wat nao tingting blo God abaotem pipol wea iusim religious activity for mek selen for olketa seleva?
Wat nao tingting blo God abaotem wei for joinim religion witim bisnis?
God nating appruvim wei for joinim religion witim bisnis. Bible storyim dat lo bifor, God no hapi lo olketa priest wea sei olketa teachim pipol abaotem hem “for kasem pei nomoa.” (Micah 3:11) God judgem olketa wea mek bisnis lo ples blo hem for worship and mekem ples hia “olsem cave blo olketa man for steal.”—Jeremiah 7:11.
Olsem God Jesus barava heitim wei wea pipol iusim religion for mek selen nomoa. Lo taem blo Jesus, olketa religious leader kasem selen from olketa greedy bisnisman wea olketa allowim for kam duim bisnis insaed lo temple lo Jerusalem. Olketa ravem nao pipol wea kam lo there for worship. Jesus hem brave for raosem olketa bisnisman hia wea no honest from area blo temple, and hem sei: “Haos bilong Dadi bilong mi hem no haos for iufala market insaed!”—John 2:14-16.
Jesus showim dat hem garem tingting blo God tu lo hao hem duim ministry blo hem. (John 8:28, 29) No enitaem hem askem selen lo pipol taem hem teachim olketa abaotem God. Hem no askem pipol for peim hem taem hem duim olketa mirakol, olsem taem hem feedim pipol wea hangere, kiurim olketa wea sik, and resurrectim olketa wea dae. Jesus never iusim ministry blo hem for kamap rich—hem no even onam wanfala haos.—Luke 9:58.
Hao nao olketa first Christian keepim worship separate from bisnis?
Jesus talem olketa follower blo hem for no mek selen from olketa religious activity wea olketa duim. Hem sei: “Samting wea iufala kasem hem free nomoa, so iufala mas no askem selen for samting wea iufala duim.” (Matthew 10:8) Olketa follower blo Jesus bifor, wea bihaen olketa kolem olketa lo Christian, followim instruction blo Jesus. Tingim samfala example:
Aposol Peter, wea followim Jesus during lo ministry blo hem, hem kasem offer from wanfala man wea nem blo hem Simon wea laek peim hem for givim hem position and paoa. Peter stretawe rejectim offer blo Simon and tok stret olsem lo hem: “Iu witim selen bilong iu bae finis, bikos iu tingse iu savve peim disfala present wea God givim free nomoa.”—Acts 8:18-20.
Aposol Paul hem wanfala famous minister wea savve travel lo olketa nara ples. Nomata hem waka hard for helpem olketa Christian kongregeson for staka year, no enitaem hem ask selen for waka wea hem duim. Hem and olketa nara Christian wea waka witim hem “no salem toktok bilong God, olsem plande narawan duim.” (2 Corinth 2:17) Bat, Paul sei: ‘Taem mifala preachim gud nius bilong God long iufala, mifala waka long day and long naet mekem mifala no fulbae long iufala.’—1 Thessalonica 2:9.
Hem tru, olketa Christian bifor needim selen for sapotim olketa preaching campaign wea olketa duim and waka wea olketa duim for helpem pipol. Bat no enitaem olketa ask selen for waka wea olketa duim for helpem pipol saed lo worship. Man savve chus for givim samting if hem laekem, base lo olketa principle hia:
2 Corinth 8:12: “God hem hapi long man wea willing for givim samting. Hem laekem man for givim samting wea hem garem, and hem no askem man for givim samting wea hem no garem.”
Mining: Motive blo man for givim samting hem moa important winim amount wea hem givim.
2 Corinth 9:7: “Evri man mas givim samting followim wanem hemseleva tingim, nogud hem givim samting bat hem no hapi nomoa for givim datwan, or eniwan forcem hem. God hem lovem man wea hapi for givim samting.”
Mining: God no laek forcem eniwan for givim samting. Hem hapi taem samwan chus for givim samting bikos hemseleva laek for duim datwan.
Wat nao klosap for happen lo greedy religion?
Bible talem klia dat God no acceptim evri religion or evri wei for worship. (Matthew 7:21-23) Lo wanfala interesting profesi, Bible comparem evri false religious organization witim wanfala prostitute bikos olketa waka tugeta witim olketa gavman for mek selen or for kasem olketa nara samting and olketa mekius lo pipol blo evri nation. (Revelation 17:1-3; 18:3) Datfala profesi storyim dat klosap nao God bae finisim false religion.—Revelation 17:15-17; 18:7.
Go kasem datfala taem, God no laekem nogud samting wea false religion duim for laea lo pipol or for mekem olketa stap farawe from hem. (Matthew 24:11, 12) Hem encouragem pipol wea garem hambol heart for lane for servem hem lo wei wea hem acceptim and for ranawe from false religion.—2 Corinth 6:16, 17.