GOHED FOR LUKAOT!

Gun Violence Increase Evriwea lo World—Wat Nao Bible Talem Abaotem Datwan?

UPDATEM: April 27, 2023

Gun violence continue mekem staka pipol evriwea lo world safa tumas. Tingim samfala recent example nomoa.

“US setim world record for mass killings evri year, wea each week wanfala mass killing happen.”—April 21, 2023, The Guardian.
“Ten lo sem famili, seven female and wan 13 years old boy dae lo mass shooting lo wanfala haos lo South Africa.”—April 21, 2023, AP News.
“Wanfala gunman lo Germany sutim dae six pipol bifor hem sutim hemseleva lo wanfala worship hall blo Olketa Jehovah’s Witness lo Hamburg.”—March 10, 2023, Reuters.

Bible comfortim pipol wea sorre tumas bikos lo olketa sad event olsem. For lukim wanfala real laef example, watchim video DeJanerio Brown: Nomata Mi Sorre Fogud, Hope blo Mi Strong.

Bible helpem iumi tu for understandim why olketa barava nogud samting olsem happen. For start lane abaotem datfala topic, watchim video Why Nao God Letem Wei for Safa Gohed?

Lo July 2022, gun violence happen evriwea lo world:

“Taem samwan sutim dae well known politician lo Japan [former Prime Minister Shinzo Abe], datwan barava disturbing nius lo Japan and pipol evriwea lo world in shock, especially bikos Japan garem low level violent crime and olketa strict gun law.”—July 10, 2022, The Japan Times.
“Pipol lo Denmark in shock from wanfala gunman killim dae thrifala pipol lo wanfala shopping mall lo Copenhagen.”—July 4, 2022, Reuters.
“South Africa: Olketa gunman open fire insaed wanfala bar lo taon blo Soweto and killim dae 15 pipol.”—July 10, 2022, The Guardian.
“Lo weekend blo July 4, wea hem wanfala holiday lo U.S., more than 220 pipol dae from gun violence.”—July 5, 2022, CBS News.

Hao, eni hope violence olsem bae finis? Wat nao Bible talem abaotem datwan?

Violence Bae Finis

Iumi stap lo taem wea Bible describim lo “olketa last day.” Hem taem wea pipol violent tumas and cruel narawe. (2 Timothy 3:1, 3) Violence olsem mekem pipol fraet fogud. (Luke 21:11) Bat, Bible promisim hao lo future violence bae finis and “pipol . . . bae stap lo ples wea peace hem stap, lo olketa sef ples, and olketa ples for rest wea kwaet.” (Isaiah 32:18) Hao nao violence bae finis?

God bae aotem wicked pipol and distroem evri weapon.

“Bae God hemi aotem an torowem olketa ravis pipol.”—Provebs 2:22, SIPB.
“[God] finisim olketa faet long evriples long wol. Hemi gohed fo brekem olketa bou, an hemi gohed fo spoelem olketa spia, an hemi gohed fo bonem olketa samting ya long faea.”—Sams 46:9, SIPB.

God bae finisim olketa problem wea mekem pipol violent taem hem teachim olketa hao for stap lo peace.

“Olketa bae no spoelem eniwan or spoelem eni samting lo holy maunten blo mi, bikos earth bae barava fulap lo knowledge abaotem Jehovah olsem wata hem fulimap lo sea.”—Isaiah 11:9.
Nomata distaem tu, God teachim pipol evriwea lo world for no violent and no iusim olketa weapon, bat for “hamarem sword blo olketa for kamap olketa hou and spia blo olketa for kamap olketa naef for pruning.”—Micah 4:3.

For lanem moa samting abaotem promis lo Bible abaotem taem wea no eniwan lo world bae fraet, readim disfala English article “Freedom From Fear—Is It Possible?”

For lanem samfala nara samting abaotem permanent solution for finisim violence, readim disfala English article “Peace on Earth at Last!”