Why Nao Politik Divaedem Pipol?—Wat Nao Bible Talem Abaotem Datwan?

Evriwea raonem world, staka kantri divaed bikos lo politik. Olsem wanfala survey wea Pew Research Center duim lo 2022 hem faendaot “65% blo olketa adult lo 19 kantri storyim dat olketa big disagreement kamap lo kantri blo olketa between pipol wea sapotim olketa difren political party.”

Hao, iu lukim wei for divaed bikos lo politik hem increase lo ples wea iu stap? Why nao datwan happen? Hao, eni solution for datwan? Lukim wat Bible talem.

Olketa attitude wea divaedem pipol

Bible profesi abaotem dat lo taem blo iumi wea hem kolem lo “olketa last day,” staka pipol garem olketa attitude wea mekem hem hard tumas for olketa wan mind.

• “Long olketa last day bae hem barava difren and bae evri samting hem hard tumas. Pipol bae tingim olketa seleva nomoa, . . . no willing for agree.”—2 Timothy 3:1-3.

Nomata staka pipol trae hard for impruvim gavman, olketa no fit for duim datwan. Pipol wea garem difren idea faendem hard tumas for waka tugeta for solvem olketa problem. Datwan pruvim wat Bible talem longtaem bifor hem tru.

• ‘Pipol bosim olketa narafala pipol, so olketa safa.’—Eklesiastes 8:9, SIPB.

Bat Bible storyim solution for datwan, hem nao wanfala gavman wea leader blo hem bae finisim evri problem wea mekem pipol safa.

Wanfala qualified leader wea lovem pipol

Bible storyim Jesus Christ nao leader wea garem olketa qualification for solvem evri problem hia. Jesus garem paoa, authority, and hem laekem tumas for evri pipol garem peace and wan mind.

• “Lo olketa day blo hem, olketa wea raeteous bae gohed gud, and peace bae stap lo evri ples.”—Psalm 72.7

• “Evriwan long evri kantri mas waka fo hem.”—Sams 72:11, SIPB.

Jesus hem best leader bikos hem lovem pipol and laek helpem olketa, especially olketa wea olketa narawan treatim olketa nogud.

• “King ya, hemi gohed fo sevem olketa pipol hu i no garem enisamting, wea i kol go long hem, an hemi gohed fo helpem olketa hu i pua, an olketa wea no eniwan hemi helpem olketa. Hemi save sore long olketa hu i pua an no strong, an hemi sevem laef blong olketa hu i no garem enisamting. An king hemi save stopem olketa hu i mekem olketa safa, an hemi stopem olketa hu i spoelem olketa ya.”—Sams 72:12-14, SIPB.

Lanem moa samting abaotem Kingdom blo God, datfala gavman lo heven wea Jesus nao king lo hem. Lanem wanem iu savve duim for kasem gud samting from rul blo Jesus and for sapotim datwan.

• Watchim disfala video Wanem Nao Kingdom Bilong God?

• Readim disfala article “Kingdom Bilong God—Wanfala Gavman wea No Corrupt.”