Why Nao Pipol No Savve Mek Peace witim Narawan?​—⁠Wat Nao Bible Talem Abaotem Datwan?

Olketa world leader and international organization no fit for mekem world garem peace. Distaem, war hem big tumas winim enitaem since World War II. Samting olsem tu billion pipol, wea hem quarter lo population blo full world stap lo olketa ples wea war affectim.

Why nao olketa man no savve mekem world garem peace? Wat nao Bible talem abaotem datwan?

Thrifala reason why olketa man no savve mekem world garem peace

1. 1. Pipol garem olketa attitude wea preventim olketa for no even trae for mek peace witim narawan. Bible profesi abaotem hao lo taem iumi, “pipol bae tingim olketa seleva nomoa, laekem tumas selen, tok praod, mekhae long olketa seleva, . . . bae no faithful, . . . no willing for agree, . . . no savve kontrolem seleva, raf, . . . bighed, and praod tumas.”​—2 Timothy 3:2-4.

2. 2. Iumi olketa man, each wan or grup, no garem ability for stretem problem blo olketa withoutim help blo Creator blo olketa, Jehovaha God. Bible sei “man hem no even fit for disaedem step blo hemseleva taem hem wakabaot.”​—Jeremiah 10:23.

3. 3. Satan datfala Devil wea hem wanfala paoaful and wicked ruler, hem influencem pipol lo world and hem “laea long evriwan long earth.” (Revelation 12:9) As long as “full world hem stap long paoa bilong Satan,” war and raoa bae still gohed.​—1 John 5:19.

Hu nao bae mekem full world garem peace?

Bible sei olketa man bae hard for mekem world garem peace, bat God nomoa bae duim datwan.

• “‘Bikos mi savve finis lo wanem mi laekem for iufala,’ hem nao wanem Jehovah talem, ‘mi laek for givim iufala peace, and no trabol, for givim iufala gudfala future and hope.’”​—Jeremiah 29:11.

Hao nao God bae fulfillim datfala promis? “God wea givim peace bae . . . finisim Satan.” (Rome 16:20) God bae iusim wanfala gavman lo heven, wea Bible kolem “Kingdom blo God,” for mekem full world garem peace. (Luke 4:43) Taem King blo datfala Kingdom, Jesus Christ hem rul ovarem earth, pipol bae lane hao for mek peace witim narawan.​—Isaiah 9:6, 7.

• For savve moa, readim article “What Will God’s Kingdom Accomplish?”