Wildlife Hem Go Daon 73% Insaed 50 Years—Wat Nao Bible Talem Abaotem Diswan?

Lo October 9, 2024, World Wildlife Fund releasem wanfala report wea mekem iumi wari abaotem effect blo human activity lo wildlife. Hem sei “insaed 50 years (1970-2020), average size blo polulation blo wildlife wea olketa moniterim hem go daon 73%.” Report hia sei: “Tru samting nao, wat bae happen insaed next faev years bae affectim future blo evriting wea laef lo Earth.”

Staka pipol shock lo olketa report olsem. Iumi lovem beautiful planet blo iumi and iumi no laek lukim eniting for spoelem wildlife. Iumi feel olsem bikos God creatim iumi for kea for olketa animal.—Genesis 1:27, 28; Proverbs 12:10.

So maet iu garem kwestin, ‘Hao, bae iumi fit for protectim wildlife lo earth? Wat nao Bible talem abaotem diswan?’

Wanfala hope for future

Nomata iumi waka hard, future blo wildlife lo planet hem no depend lo iumi, bat hem depend lo God. Bible sei lo Revelation 11:18, dat God bae “finisim olketa wea spoelem earth.” Verse hia teachim iumi tufala samting:

1. God bae no allowim pipol for spoelem or distroem earth.
2. Klosap nao God bae duim samting. Hao nao iumi savve? No enitaem lo history man hem garem potential for distroem wildlife lo earth.

Wat nao God bae duim for solvem disfala problem? Hem bae iusim gavman blo hem lo heven, datfala Kingdom, for rul ovarem full earth. (Matthew 6:10) Datfala gavman bae educatim pipol wea obeyim God and trainim olketa for lukaftarem and protectim wildlife lo earth.—Isaiah 11:9.