Waswe, Olketa Jehovah’s Witness Changem Bible for Fitim Biliv Bilong Olketa?
Nomoa. Taem mifala lukim samting mifala bilivim hem no barava agree witim Bible, mifala changem biliv bilong mifala, no changem Bible.
Mifala transleitim Niu World Bible long 1950, bat mifala start for studyim Bible staka year bifor datwan. Mifala iusim olketa difren Bible wea stap long datfala taem and from study hia, mifala start for garem olketa biliv bilong mifala. Tingim fofala biliv wea Olketa Jehovah’s Witness garem for longfala taem finis, and tingim sapos olketa biliv hia followim really samting wea Bible teachim.
Biliv bilong mifala: God hem no wanfala Trinity. Long July 1882 Zion’s Watch Tower magasin hem sei: “Olketa wea readim olketa buk bilong mifala savve mifala biliv long Jehovah and Jesus, and biliv long holy Spirit tu. Bat datfala teaching wea sei wanfala God nomoa hem stap bat hem thrifala God, hem nating wanfala Bible teaching.”
Samting Bible talem: “Jehovah nao God bilong iumi, and wanfala Jehovah nomoa hem stap.” (Deuteronomy 6:4, The Holy Bible, wea Robert Young hem raetem) “Wanfala God nomoa hem stap, wea hem nao Father, wea hem wakem evri samting, and hem wakem iumi for hemseleva. And tu, wanfala Lord, Jesus Christ.” (1 Corinth 8:6, American Bible Union Version) Jesus seleva hem sei: “Dadi long Heven hem winim mi.”—John 14:28, Douay-Rheims Version.
Biliv bilong mifala: No eni hellfire long Bible wea pipol safa long hem for olowe. Title bilong Zion’s Watch Tower magasin long June 1882, hem kam from Rome 6:23 long King James Version Bible. Datfala title hem “Pei Wea Sin Givim Hem Dae.” Datfala article hem sei: “Toktok long verse hia hem klia and simpol nomoa. Iumi no minim why staka pipol wea sei Bible hem Word bilong God, gohed for talem samting wea difren from disfala scripture. Long tingting bilong olketa, pei wea sin givim hem for man safa for olowe.”
Samting Bible talem: “Soul wea sin bae dae.” (Ezekiel 18:4, 20, King James Version) Panis for olketa wea againstim God, hem no for olketa safa for olowe, bat for olketa “finis for olowe.”—2 Thessalonica 1:9, King James Version.
Biliv bilong mifala: Kingdom bilong God hem wanfala gavman, no samting long heart bilong man. Long December 1881 Zion’s Watch Tower magasin, hem storyim Kingdom bilong God, and hem sei: “Bihaen disfala Kingdom start for rul hem bae finisim nao evri nara Kingdom long earth.”
Samting Bible talem: “Long taem bilong olketa king hia, God long heven bae startim wanfala kingdom wea no eniwan bae finisim: and bae no eni pipol moa tekova long datfala kingdom, bat hem bae smasem and finisim evri kingdom hia, and hem bae stap for olowe.”—Daniel 2:44, King James Version.
Waswe, Olketa Jehovah’s Witness depend long Niu World Bible for sapotim biliv bilong olketa?
Nomoa, bikos mifala gohed for iusim staka difren Bible long preaching waka bilong mifala. Mifala savve givim wanfala Niu World Bible free long eniwan wea laekem taem mifala studyim Bible witim pipol, bat sapos olketa laek for iusim Bible bilong olketa seleva, hem olraet nomoa.