Hao, Evri Religion Semsem? Hao, Evriwan Worshipim Sem God Nomoa?

Ansa from Bible

Nomoa, evri religion no semsem. Bible storyim staka religion lo bifor wea God no hapi lo olketa. Olketa divaedem olketa religion hia lo tufala grup.

First Grup: Olketa religion wea worshipim olketa false god

Bible sei hem “yusles” nomoa for worshipim olketa false god. (Jeremaea 10:​3-5; 16:19, 20) Jehovaha God talem disfala komand lo nation blo Israel bifor, hem sei: “Yufala mas no wosipim eni narafala god moa, yufala mas wosipim mi seleva nomoa.” (Eksodas 20:​3, 23; 23:24) Taem olketa Israelite worshipim olketa nara god, “[Jehovah] hemi barava kros tumas long olketa.”​—Nambas 25:3; Levitikas 20:2; Jajis 2:​13, 14.

Distaem tu, tingting blo Jehovah abaotem wei for worshipim olketa laea “god” hem no change. (1 Corinth 8:​5, 6; Galatia 4:8) Hem talem olketa wea worshipim hem for mas no duim olketa samting wea join witim false religion. Hem sei: “Iufala mas go aot from olketa and no stap witim olketa moa.” (2 Corinth 6:​14-​17) If evri religion semsem and worshipim sem God nomoa, why nao hem talem datfala komand?

Mek-tu Grup: Olketa religion wea God no hapi lo hao olketa worship

Samfala taem olketa Israelite followim wei blo olketa lo false religion taem olketa worship, bat Jehovah no hapi taem olketa mixim tru worship witim false worship. (Eksodas 32:8; Diutronomi 12:​2-4) Jesus tok strong lo olketa bigman lo religion bikos lo hao olketa worshipim God. Olketa act olsem olketa lotu gud bat olketa “ting nating long olketa barava important samting long Law, olsem for duim samting wea stret, for showimaot mercy long narawan, and for faithful.”​—Matthew 23:23.

Distaem tu, only religion wea teachim truth nomoa leadim pipol go lo God. Disfala truth hem stap insaed Bible. (John 4:​24; 17:17; 2 Timothy 3:​16, 17) Olketa religion wea teaching blo olketa againstim Bible hem mekem pipol go farawe from God. Staka teaching wea pipol tingse hem kam from Bible olsem Trinity, soul no savve dae, and bone for olowe lo hellfire, hem teaching wea kam from olketa wea worshipim olketa false god. Olketa religion wea mekhae lo olketa teaching hia “hard waka nating,” or iusles, bikos olketa changem olketa law blo God witim idea blo man.​—Mark 7:​7, 8.

God barava les lo olketa religion wea teachim olketa samting wea no tru. (Titus 1:​16) Tru religion bae helpem pipol for fren gud witim God. Hem bae no talem nomoa for pipol followim samfala kastom, bat hem bae helpem olketa for followim wanem God talem lo evriday laef blo olketa. Example nao, Bible sei: “Sapos eniwan tingse hem worshipim God long stretfala wei, bat hem no kontrolem toktok bilong hem, hem laea long hemseleva and worship bilong hem iusles nomoa. Wanfala wei for worship hem stap wea hem klin and stret long tingting bilong God wea hem Dadi bilong iumi. Datwan nao hem for lukaftarem olketa pikinini wea no garem dadi and mami and olketa widow woman wea kasem hard taem, and for stap klia long olketa rabis wei bilong disfala world.” (James 1:​26, 27)