Hao many Jehovah’s Witness Nao lo World?

Hao nao iufala kaontem namba blo Olketa Jehovah’s Witness?

Mifala kaontem nomoa Olketa Jehovah’s Witness wea busy for preachim gud nius abaotem Kingdom blo God each month. (Matthew 24:14) Diswan includim olketa wea baptaes for kamap Jehovah’s Witness, and olketa wea no baptaes yet bat qualify for duim preaching waka.

Hao, each person mas donatem selen mekem iufala kaontem hem wanfala Witness?

Nomoa. For kamap Witness or garem eni assignment or privilege lo organization blo mifala no depend lo donation wea samwan givim. (Acts 8:​18-​20) Klosap evri donation wea each person givim, no eniwan savve abaotem. Each Jehovah’s Witness givim taem, strong, and wat hem garem for sapotim waka wea mifala duim evriwea lo world fitim wat hem garem, and wat hem laek givim.​—2 Corinth 9:7.

Hao nao iufala savve hao many nao busy for givim witness?

Each month, olketa Witness reportim preaching waka wea olketa duim lo kongregeson blo olketa. Olketa hapi for reportim datwan.

Kongregeson addim evri report and sendem total lo lokol branch office. Then branch sendem total for each kantri or territory lo world hedquarter blo mifala.

Lo end blo evri service year,a olketa workimaot highest namba blo olketa Witness for each kantri during datfala year. Then olketa addim evri figures hia for workimaot namba blo olketa Witness evriwea lo world. Moa information abaotem olketa report for each kantri stap lo website anda lo sekson “Raonem World.” Olketa report hia encouragem mifala, olsem olketa report wea encouragem olketa Christian lo first century.​—Acts 2:​41; 4:4; 15:3.

Hao, iufala kaontem olketa wea associate witim organization bat no preach?

Nomata mifala no includim olketa hia lo namba blo olketa Witness, mifala welkamim olketa lo olketa kongregeson blo mifala. Klosap evriwan attendim Memorial lo dae blo Christ wea happen evri year. So mifala savve workimaot difference blo pipol wea attendim datfala meeting and namba blo olketa Witness. Lo 2024, pipol wea attendim Memorial hem 21,119,442.

Staka wea no attendim olketa meeting blo mifala benefit from free Bible study program. During 2024, mifala conductim average lo 7,480,146 Bible study each month, samfala hem witim tu-thri pipol lo semtaem.

Why nao gavman census figures for namba blo olketa Witness hae winim figures blo iufala?

Staka taem olketa gavman census agency workimaot figures taem olketa askem pipol which religious grup olketa associate witim. For example, U.S. Census Bureau sei lo olketa survey blo olketa, hem for “faendaot if pipol sapotim which religion,” and figures hia “base lo tingting blo each person, and no lo olketa tru samting.” Bat mifala kaontem nomoa olketa wea preach lo pipol and reportim datwan. Olketa nao Jehovah’s Witness, and ino olketa wea sei olketa Witness.