Wanem Nao Datfala Toktok “Eye for Eye” Hem Minim?

Ansa from Bible

Datfala law wea sei “eye for eye” hem part blo Law wea God givim lo Moses for olketa Israelite and Jesus hem quotem datwan lo Sermon lo Maunten. (Matthew 5:​38, King James Version; Eksodas 21:24, 25; Diutronomi 19:21) Datfala law minim sapos samwan duim nogud samting, panis wea hem kasem mas fitim crime wea hem duim.a

Law hia hem for man wea min for duim olketa nogud samting for spoelem narawan. Law blo Moses sei olsem abaotem man wea duim datwan: “Sapos eniwan hemi brekem bon blong narafala man, yufala mas go brekem bon blong hem tu. Sapos eniwan hemi spoelem ae blong narafala man, yufala mas go spoelem ae blong hem tu. Sapos eniwan hemi faetem narafala man an hemi brekem wanfala tit blong hem, yufala mas go brekem wanfala tit blong hem tu. Nomata watkaen samting eniwan hemi duim fo mekem narafala man fo garekil, yufala mas duim semsamting long datfala man fo mekem hemi garem semkaen kil tu.”​—Levitikas 24:20.

• Why nao olketa garem “eye for eye” law?

• Waswe, olketa Christian mas followim datfala law?

• Samfala rong tingting abaotem “eye for eye” law

• Jesus stretem rong tingting wea pipol garem

Why nao olketa garem “eye for eye” law?

Datfala law abaotem “eye for eye” no minim God letem olketa man wanwan savve changem bak nogud samting wea nara man duim lo hem. Bat law hia helpem olketa judge for panisim man fitim crime wea hem duim. Datfala panis mas no strong tumas or kaen tumas.

Datfala law tu savve stopem olketa man wea plan for spoelem narawan for no duim datwan. Law blo Moses sei: “Taem olketa narafala pipol [olketa wea lukim panis wea narawan kasem from God] i herem nius long samting ya, bae olketa fraet, an no eniwan moa bae duim disfala ravis samting [olsem diswan midolwan lo iufala].”​—Diutronomi 19:20.

Waswe, olketa Christian mas followim datfala law?

Nomoa. Olketa Christian no followim law hia bikos hem part blo Law blo Moses wea Jesus finisim taem hem dae.​—Rome 10:4.

Nomata olsem, law hia showimaot tingting blo God. Olsem example, hem showimaot God laekem tumas samting wea stret. (Sams 89:14) Hem showimaot tu Jehovah disciplinem man wea duim rong samting “fitim wei wea [hem] bin sin agensim” God.​—Jeremaea 30:11.

Samfala rong tingting abaotem “eye for eye” law

Rong tingting: “Eye for eye” law mekem pipol for gohed pei bak.

Tru samting: Law blo Moses sei: “An yufala mas no gohed fo heitem eni wantok o sensimbaek eni ravis wei blong hem.” (Levitikas 19:18) Law encouragem pipol for trustim God and olketa judge for stretem olketa rong samting, and no for pipol pei bak.​—Diutronomi 32:35.