OLKETA KWESTIN WEA YOUNG PIPOL GAREM
Why Nao Mi Evritaem Talem Rong Samting?
“Samfala taem mi savve kontrolem tongue blo mi, bat lo olketa narataem hem olsem tongue laek talem samting seleva and hem no followim wanem brain talem hem!”—James.
“Taem mi wari, mi savve talem samting bat no tingting firstaem, and taem mi relax mi savve toktok tumas. So mi no savve win.”—Marie.
Bible sei: “Tongue hem wanfala fire” and “nomata smol fire bat hem savve bonem bigfala area long bush!” (James 3:5, 6) Waswe, staka taem iu savve talem rong samting? Sapos olsem, disfala article savve helpem iu.
Why nao mi talem rong samting?
No perfect. Bible sei: “Iumi evriwan savve sin staka taem. Sapos eniwan hem no sin long toktok bilong hem, hem wanfala perfect man.” (James 3:2) From iumi no perfect, hem isi for iumi sin lo toktok blo iumi olsem hem isi for iumi foldaon taem iumi wakabaot.
“Brain blo mi hem no perfect and tongue blo mi hem no perfect tu, so hem no stret for tingse mi savve kontrolem olketa lo perfect wei.”—Anna.
Toktok tumas. Bible sei: “Tok tumas, bae yu toknogud, no tok tumas, bae yu waes.” (Provebs 10:19) Plande taem pipol wea toktok tumas and wea no savve lisin bae talem samting wea mekem narawan feel nogud.
“Plande taem man wea no toktok tumas nao hem man wea kleva. Jesus nao barava kleva winim evriwan lo earth, bat samfala taem hem no talem eni samting bat hem stap kwaet nomoa.”—Julia.
Tok daonem narawan. Bible sei: “Nogud toktok kat olsem sap naef.” (Provebs 12:18) Wei for tok daonem narawan savve mekem man feel nogud. Man wea talem toktok for daonem narawan maet sei, “Mi just mekfani nomoa!” Bat for mekem narawan feel nogud hem no samting for mekfani lo hem. Bible sei iumi mas lusim wei for “tok nogud, and evri samting wea savve spoelem narawan.”—Ephesus 4:31.
“Mi savve kwiktaem talem olketa joke, bat samfala taem wanem mi talem savve daonem narawan and mekem olketa feel nogud lo mi.”—Oksana.
Taem iu talem samting, iu hard for tekem bak, olsem hem hard for iu putim toothpaste bak insaed lo tube
Kontrolem tongue
Maet hem no isi for iu kontrolem tongue blo iu, bat olketa Bible principle savve helpem iu. Tingim olketa principle hia.
“Yufala mas tingting gudfala abaotem samting ya, taem yufala stap kuaet.”—Sams 4:4.
Samfala taem, best samting for duim hem for stap kwaet and no talem eni samting nomoa. Wanfala young woman wea nem blo hem Laura sei: “Nomata mi kros, mi luksavve maet mi no feel olsem bihaen. Taem datfala feeling hem katdaon, mi savve feel hapi bikos mi no talem samting wea mi laek for talem.” Sapos iumi weit tu-thri second bifor iumi talem eni samting, datwan savve stopem iumi for no talem rong samting.
“Olsem tang blong man hemi testem wea kaikai hemi suit o nomoa, ia blong man hemi traem toktok.”—Job 12:11.
For helpem iu, trae for tingim ansa for olketa kwestin hia bifor iu talem samting:
Waswe, samting mi laek talem hem tru and kaen? Waswe, mi need for talem datfala toktok?—Rome 14:19.
Hao nao bae mi feel sapos samwan talem sem toktok lo mi?—Matthew 7:12.
Waswe, bae hem showimaot mi respectim tingting blo narawan?—Rome 12:10.
Waswe, mi shud talem datfala toktok lo ples and taem olsem?—Eklesiastes 3:7.
“Iufala mas hambol and ting long narawan olsem hem winim iufala.”—Philippi 2:3.
Advaes hia bae helpem iu for garem gudfala tingting abaotem olketa narawan and datwan bae helpem iu for kontrolem tongue blo iu and tingting gud firstaem bifor iu toktok. Nomata sapos iu talem rong samting finis, sapos iu hambol, iu bae kwiktaem sei sorre! (Matthew 5:23, 24) Then disaed strong for kontrolem tongue blo iu.